-
Tiheeni Piipiliya Onaloceiye sa Okonihana?Mpuhe Okumi Okhala Wookhala!—Ovaanela Vooloca Sa Piipiliya
-
-
MWAHA 41
Tiheeni Piipiliya Onaloceiye sa Okonihana?
Achu ancipale hanakhala ootaphuwa oloca sa okonihana. Piipiliya onnaloca mwaha yoola mookwakwaleya, nyenya owo oneerano yeela mmukhalelo woocicimiheya. Nave yeeyo onaloceiye ti yaphaama wa hiyaano. Eyo ti yoophwanelela woona wi Yehova Mpatuxa ahu. Nave tho owo oosuwela yeeyo eri yoophwanelela wa hiyaano. Owo onnanleela yeeyo nnaphwanelaahu opaka wi nimuhakalalihe, ni yeeyo enahaala onikhaviherya okhala oohakalala okhala wookhala.
1. Tuuvi ori moonelo wa Yehova vooloca sa okonihana?
Okonihana yamahala enarweela wa Yehova. Owo onachuna wi okumanela wuuwu okhale pahiru wa mulopwana ni muthiyana yaawo arepinhe othela waya. Tahi wi pahiru yamahala yeela enaweeriha atheli okhalano anamwane, nyenya tho yamahala yeela ennaweeriha atheli wooniherya opwacha ni osivela aryaayano wa mukina ni mukhwaawe mmukhalelo woohakalaliha. Masu a Muluku anii: “Ohakalaleke ni muthiyana oomiravo aa.” (Masiposipo 5:18, 19) Yehova onachuna wi atheli yaawo ari Akristu ekhale oororomeleya wa oothelana aya wi ehipake mararuwo.—Mwaalakhanye Ahebri 13:4.
2. Ocapaheya tiheeni?
Piipiliya onaloca wi ‘acapaheya . . . hewerya ovolowa mu omwene wa Muluku.’ (1 Korinto 6:9, 10, NN) Masu analociwa Mpiipiliyani awi ocapaheya mu Ekiriki analociwa porneia. Masu ala anaphitaanyerya (1) okonihanaa wa achu ahithelanne, (2) okonihana wa achu a mwiikho woolikana ni (3) waararuxa asinama. Wakhala wi noochawa “ocapaheya” nnahaala omuhakalaliha Yehova nave tho nnahaala weerano yeeyo eri yaphaama wa hiyaano.—1 Tesalónika 4:3.
OHUSERYA MWAWIISEELA
Muthokororye ti mwawiihai muneeraanyu musepe ocapaheya ni mukhalelo muneeraanyu mphure moorweela wa okhalano meecelo aphaama.
3. Muchawe ocapaheya
Mulopwana ooromeleya awiichaniwa Yosefe, aaphwanela owaniha wi akhaleno meecelo aweela. Mwaalakhanye Maphatxuwelo 39:1-12, nave voocharela muthokororye makoho ala:
Tiheeni yaamuceenyenrye Yosefe ochawa?—Moone eversikulu 9.
Munoona wi Yosefe aapaka yoolakelela yoophwanelela? Ntakhara heeni?
Ti mwawiihai amiravo eneeraaya emutakiherye Yosefe wi ewerye ochawa ocapaheya? Moone EXILEMA.
Yehova onachuna wi oothene ahu nichawe mararuwo. Mwaalakhanye 1 Korinto 6:18, nave voocharela muthokororye makoho ala:
Ichu taani sahaala omweeriha muchu opaka mararuwo?
Muni muwerye hai ochawa mararuwo?
4. Nyuwaano munanwerya ovootha saweeha
Tiheeni yaahaala waakanyerya yoolakelela ahu ya okhalano meecelo aphaama? Moone EXILEMA, nave muthokororye nikoho nnacharela:
Mu exilema, vaavaa munna aasuwenleiye saweera saahaala omweeriha ohikhala oororomeleya wa amwaariye, tiheeni aapankeiye?
Ikwaha ikina Akristu oororomeleya anaphwanela owaniha ni muupuwelo ooriipiheya. Tiheeni enahaala wookhaviheryaani ohuupuwelela ichu soohiphwanelela? Mwaalakhanye Filipi 4:8, nave muthokororye makoho anacharela:
Ichu taani nnaphwanelaahu wuupuwela?
Ti mwawiihai omwaalakhanya Piipiliya ni okhala ooweiwa mmuteko wa Yehova oneeraaya onikhaviherye osepa opaka yoocheka?
5. Malakiheryo a Yehova ta mphurelo ahu
Yehova oosuwela yeeyo eri ya mphurelo wa hiyaano. Owo onnanihusiha mukhalelo wa okhalano meecelo aphaama ni mphurelo onakhumelela mu weerano yeeyo. Mwaalakhanye Masiposipo 7:7-27 naari moone EXILEMA, nave voocharela muthokororye makoho anacharela.
Ti mwawiihai mmiravo onalociwa mu yoorepa iivoliihenryeiye mu yaweeha?—Moone Masiposipo 7:8, 9.
Mwawiiwanana ni Masiposipo 7:23, 26, mararuwo annakumiherya sookhumelela soowaawa. Wakhala wi nookhalano meecelo aphaama, makacamiho taani nnahaalaahu osepa?
Ti mwawiihai okhalano meecelo aphaama oneeraaya onikhaviherye okhalano okumi okhala wookhala?
Achu akina anuupuwela wi yeeyo Piipiliya onaloceiye sa okonihana wa achu a mwiikho woolikana tahi wooniherya osivela. Nyenya Yehova Muluku oosivela onachuna wi achu oothene ekhaleke ohakalala okhala wookhala. Wi eyo yeereye nnaphwanela okhala mwawiiwanana ni yeeyo owo onaloceiye wi ti yoophwanelela. Mwaalakhanye 1 Korinto 6:9-11, nave muthokororye makoho anacharela:
Mmoonelo wa Muluku, apwanne okonihana wa achu a mwiikho woolikana pahiru emoha ya soochunachuna soohiphwanelela nnaphwanelaahu osepa?
Wi nimuhakalalihe Muluku, oothene ahu ninnaphwanela opaka matorokelo mookumini. Apwanne wiilipixerya wuuwu ti wamphurelo? Mwaalakhanye Salumu 19:8, 11, voocharela muthokororye makoho ala:
Munoona wi malakiheryo a Yehova tawookololowa? Waakhanle wi aa ntakhara heeni, naari waakhanle wi hooye ntakhara heeni?
Yehova ohaakhaviherya achu yaawo yahaarino meecelo aphaama wiiwelela malamulo awe. Owo tho onanwerya wookhaviheryaani
ACHU AKINA ANI: “Okonihana wa achu apiili anasivelana echu yaweemereryeya.”
Tiheeni mwaahaalaanyu oloca?
MUKWASU
Okonihana yamahala enarweela wa Yehova wa mulopwana ni mwaariye.
Makoho awuuluulela
Ocapaheya enaphitaanyerya eheeni?
Tiheeni enahaala onikhaviherya osepa ocapaheya?
Ntakhara heeni wiiwelela malakiheryo a Yehova oryaaya waphaama wa hiyaano?
OTHOLATHOLA
Moone ntakhara heeni oryaaya woochuneya wa Yehova wi mulopwana ni muthiyana anakhala vamoha anaphwanelaaya orepiha othela waya.
“O que a Bíblia diz sobre morar juntos sem se casar?” (Artigo do jw.org)
Naamwi Piipiliya alocaka wi okonihana wa achu a mwiikho woolikana ti yoocheka, muthokororye ntakhara heeni eyo henooniherya wi nnaphwanela owiica achu aneerano yeeyo.
Muhuserye ntakhara heeni malamulo a Muluku vooloca sa okonihana annanikhapelela.
Mu yaweereya “Elas me trataram com dignidade,” moone tiheeni yaamuceenyenrye mulopwana mmoha otoroka mukhalelo awe wa okonihana ni achu a mwiikho mmoha wi amuhakalalihe Muluku.
“A Bíblia muda a vida das pessoas” (A Sentinela, 1.º de abril de 2011)
a Meerelo yaala oohiphwanelela anaphitaanyerya okonihana mmakupa oohiyanahiyana ntoko mwaano, waamakhucu, naari waapapela mwiikho wa muchu ohiri oothelana ahu.
-
-
Tiheeni Piipiliya Onaloceiye sa Othela ni Okhala Muciye?Mpuhe Okumi Okhala Wookhala!—Ovaanela Vooloca Sa Piipiliya
-
-
MWAHA 42
Tiheeni Piipiliya Onaloceiye sa Othela ni Okhala Muciye?
Mu sookhovelela ikina, achu anuupuwela wi muchu onahaala ohakalala pahiru wakhala wi oothela. Mwawiihiiha, tahi wi atheli oothene toohakalala naari wi aciye hanahakalala. Mweeparipari Piipiliya onaloca wi okhala mutheli naari okhala muciye soothene samahala sa Yehova.
1. Tisivi siri miphurelo sa okhala muciye?
Piipiliya onii: ‘Yoole onathela naari onatheliwa onneerano phaama, nyenya yoole oni ahithele naari ahitheliwe onamweerano phaamasha.’ (Mwaalakhanye 1 Korinto 7:32, 33, 38.) Mmukhalelo taani muchu yoowo ori muciye ‘oneereiyeno phaamasha?’ Akristu yaawo ari aciye haniipiwa murima ni soothowa sa iyaya naari mwaaraya. Mwawiihiiha awo annakhalano otaphuwa wawaaca. Ntoko yootakiherya awo annapharihela elukuluku aya mmuteko wa Yehova, akhweya moorweela wa oya elapo ekina wi yalaleerye michaka yaphaama. Opwaha soothene, awo annakhalano elukuluku yawaaca wi emwaacamele Yehova.
2. Tisivi siri miphurelo sa orepiha othela?
Okhala muciye, othela naari otheliwa, soothene sookhalano miphurelo saya. Piipiliya onaloca wi “okhala eeli onnareera opwaha okhala muchu meekheiye.” (Eklesiyaste 4:9) Eyo eparipari xaxaxa wa Akristu yaawo anapharihela miruku sa Mpiipiliyani vooloca sa othela. Vaavaa mulopwana ni muthiyana anarepihaaya othela waya awo annapaka nlakano na osivelana, ocicimihana ni okhapelelana mukina ni mukhweiye. Eyo ennavaha okhapeleleya waapwaha yaale anakhala vamoha ehirepinhe othela waya. Nave orepiha othela onneeriha wi anamwane ephwiiwe mookhapeleleya.
3. Tuuvi ori moonelo wa Yehova vooloca sa othela?
Vaavaa Yehova aatikithenryeiye othela woopacerya, owo aahi: “Mulopwana aahiyeke atiithinya ni amannya, aphitaane ni mwaariye.” (Maphatxuwelo 2:24) Yehova onaachuna wi mulopwana ni muthiyana athelanne, esivelaneke nave ekhaleke vamoha mmahiku oothene a okumi aya. Owo oneemererya omwalana wakhala wi mulopwana naari muthiyana oopaka mararuwo. Mmukhalelo yoola, Yehova oomvaha yoowo ochekeliwe olakelela omwalana naari omulevelela.a (Mateu 19:9) Yehova haneemererya waaceya, eyo tiwi Mukristu okhalano mulopwana opwaha mmoha naari muthiyana opwaha mmoha.—1 Timóteo 3:2.
OHUSERYA MWAWIISEELA
Moone ti mwawiihai aciye ni atheli aneeraaya ekhale oohakalala—ni mukhalelo anahaalaaya omuhakalaliha Yehova.
4. Mukhalelo aciye aneeraaya epharihele phaama okumi aya
Yesu aanoona ociye okhala ntoko yamahala. (Mateu 19:11, 12) Mwaalakhanye Mateu 4:23, nave voocharela muthokororye nikoho nla:
Ti mwawiihai Yesu aapharihenleiye otaphuwa wa okhala muciye wi aarumeele Atiithi awe ni waakhaviherya akina?
Akristu ari aciye ananwerya opaka ichu hiiha ntoko Yesu eenreiye. Moone EXILEMA, nave voocharela muthokororye nikoho nla.
Ti mwawiihai Mukristu ori muciye onahaaleiye opharihela otaphuwa wawe, wi akhaleno yootaphulela ya ekumi mmuteko wa Yehova?
Nyuwaano mwaanasuwela?
Piipiliya hanaloca iyaakha muchu onaphwaneleiye othela naari otheliwa. Nyenya owo onnamuceenyerya muchu oweherya ophiyerya osuwela wi “nchuno nawe na okonihana” noovukuwa, eyo ti wi elukuluku yeeyo nchuno na okonihana nnakhalaaya noolipa nave nnamweerihaaya muchu opaka yoolakelela yoohiphwanelela.—1 Korinto 7:36.
5. Mmuthanle mwamiruku yoowo munayaanyu opakano othela
Omuthanla yoowo nnayaahu opakano othela yoolakelela yoochuneya nnaphwanelaahu opaka. Mwaalakhanye Mateu 19:4-6, 9, nave muthokororye nikoho nnacharela:
Ntakhara heeni Mukristu ohinaphwaneleiye waakuvela othela?
Piipiliya onamookhaviheryaani osuwela mikhalelo saphaama sa mulopwana oophwanelela naari sa muthiyana oophwanelela. Opwaha soothene, munaphwanela omwaavya muthiyana naari mulopwana onamusivela Yehova.b Mwaalakhanye 1 Korinto 7:39 ni 2 Korinto 6:14. Nave voocharela muthokororye makoho ala:
Ntakhara heeni nnaphwanelaahu omuthela naari otheliwa ni muchu yoowo onamurumeela Yehova?
Munuupuwela wi Yehova onoona hai vaavaa nnapakaahu othela ni muchu yoowo ohinamusivela Yoowo?
Wakhala wi asinama eeli oohiyana aaphitaanyiwa vamoha, awo anahaala ohooxeya. Moolikana, Mukristu yoowo onapaka othela ni muchu yoowo ohinamurumeela Yehova, onahaala tho ohoolela makacamiho mancipale
6. Mukhaleno moonelo wa Yehova vooloca sa othela
Mu Isarayeli akhalai, alopwana akina yaanamwalana ni asaaraya ni mathowa oohiphwanelela. Mwaalakhanye Malakiya 2:13, 14, 16, nave voocharela muthokororye nikoho nla:
Ntakhara heeni Yehova onniica omwalana ehirivo mathipelo a Mpiipiliyani?
Oraruwa ni omwalana onnatannya makacamiho wa muchu ohirino nthowa ni wa anamwane
Moone EXILEMA, nave voocharela muthokororye nikoho nla.
Waakhanle wi nyuwaano mpanke othela ni muchu ohinamurumeela Yehova, tiheeni munaphwanelaanyu weera wi othela wanyu okhale woohakalala?
7. Mpharihele muteko yeeyo Yehova onaloceiye vooloca sa othela
Akhweya onamuchuneya wiilipiserya wi muchu aphariheleke malakiheryo a Yehova vooloca sa othela.c Nyenya Yehova onnaareeliha yaawo aniilipiserya weerano hiihaa. Moone EXILEMA.
Mwaalakhanye Ahebri 13:4, nave voocharela muthokororye makoho ala:
Mmoonelo anyu munoona wi ti yoophwanelela opharihela muteko yeeyo Yehova onaloceiye sa othela? Waakhanle wi aa, ntakhara heeni, naari waakhanle wi hooye, ntakhara heeni?
Mu ilapo sincipale, alamuleli annaalamulela achu orepiha othela waya naari omwalana. Yehova onaweherya wi Akristu yiiweleleke malamulo yaala. Mwaalakhanye Tito 3:1, nave voocharela muthokororye nikoho nla:
Waakhanle wi moothela naari mootheliwa, munnaroromela wi moorepiha othela mwawiiwanana ni malamulo?
ACHU AKINA ANANWERYA OKOHA: “Ntakhara heeni orepiha othela? Tahi yaphaama okhala vamoha pahiru?”
Mwaahaala waakhula hai?
MUKWASU
Othela ni okhala muciye samahala inarweela wa Muluku. Atheli ni aciye ananwerya okhalano oohakalala wakhala wi annakhala mwawiiwanana ni yookhwela ya Yehova.
Makoho awuuluulela
Ti mwawiihai muciye onahaaleiye opharihela phaama okumi awe?
Ntakhara heeni Piipiliya onaloceiye wi pahiru nnaphwanela othelana ni muchu yoowo onamurumeela Yehova?
Nthowa taani nimoha Piipiliya oneemereryeiye omwalana?
OTHOLATHOLA
Enataphulela eheeni othela pahiru “mwa Apwiyaru”?
“Perguntas dos leitores” (A Sentinela, 1.º de julho de 2004)
Moone ixilema raru ikhaani seiyo inahaala wookhaviheryaani opaka yoolakelela yaphaama vooloca sa waakamela ni othela.
Moone ntakhara heeni munna mmoha onuupuweleiye wi Yehova omvaha ichu sincipale soochuneya opwaha seiho ohin’yeiye muculi.
Waakhanle wi muchu onnuupuwela omwalana naari omwalamwala, ichu taani onaphwaneleiye othokororya?
“Mucicimihe ‘Yeeyo Muluku Ophitaannyeiye’” (Mulipeleli a Tesempuru a 2018)
a Moone Yooleeliherya 4 yeeyo enaloca sa omwalamwala ohirivo mararuwo.
b Mu sookhovelela ikina, asitiithi tanamuthanla yoowo onahaala opaka othela ni mwanaya a mwaamulopwana naari mwaamuthiyana. Mmikhalelo ntoko seiya, yoolakelela ya asitiithi oosivela ori woona waakhanle wi muchu owo onnamusivela Yehova, ohiya ikhorowa naari muhakhu.
c Waakhanle wi munakhala ni mulopwana naari muthiyana muhirepinhe othela, omuhiya muchu owo naari orepiha othela ni yoowo yoolakelela ya nyuwo mukhatiinyu.
-