2. Tiheeni Piipiliya onanleeleiye vooloca sa Yehova?

Piipiliya onaloca wi opwaha amuluku oothene achu anaalapelaaya, Yehova ti Muluku mmoharu eeparipari. Ntakhara heeni? Aakhalavo mathowa mancipale. Yehova ookhalano owerya otokweene, nave owo pahiru tori “Awirimurimu velaponi yothene ya vathi.” (Mwaalakhanye Salumu 83:18, NN.) Piipiliya onnamwiichana owo “a ikuru soothene,” nthowa nawi owo ookhalano owerya wa opaka yeeyo onachuneiye oopaka. Owo ‘mpatusha a ichu soothene’—elapo yoothene ni ikumi soothene veelaponi yavathi. (Wupulula 4:8, 11) Nave pahiru Yehova tokhanle opacerya woopacerya, nave harwa akhalano makuchuwelo.—Salumu 90:2.

Nnaphwanela omulapa pahiru Yehova, woona wi owo Mpatuxa ahu. (Wupulula 4:11) Eyo enataphulela wi nnaphwanela omusivela ni omulapela pahiru yoowo, nihipharihenle iruku naari soophwaniherya.—Mwaalakhanye Isaiya 42:8.

Omulapa wahu onaphwanela okhala “waweela woomuhakalaliha” Yehova. (Aroma 12:1) Ela enataphulela wi nnaphwanela okhala mwawiiwanana ni malakiheryo awe. Ntoko yootakiherya, yaale anamusivela Yehova annasivela nave annachariha malakiheryo awe vooloca sa othela. Nave annasepa meerelo oonanara, ntoko omulya soona, olya mirece, ni ohapaliwa.a