MWAHA 114
Makuchuwelo A Onanara Woothene
MANO ti heni munoonanyu va? Ayi, muloko wakhoco mu akavalo awela. Nyenya nkoonani wiiwo anarwelaayawo. Akavalo awo anachimaka orwela wirimu, vasulu va meeku! Mano wirimu wokhalawo chiri akavalo?
Hooye, tahi akavalo enexa. Nosuwela ela, nthowa nawii akavalo hanawerya ochimaka vasulu va meeku, kahiyo? Nyenya Piipiliya onaloca sa akavalo wirimu. Mano moosuwela nthowa nene?
Ti nthowa nawii khalai akavalo ti yaphariheliwa muteko vowana ekhoco. Va nthowa nenla, Piipiliya onaloca sa akavalo oweliwa ekhuruwaka wirimu, othonyerya wii Muluku onahaala owana ekhoco movanyihana ni achu veelaponi yavathi. Mano moosuwela nsina na nipuro na ekhochwene yeela? Harmagedo. Ekhochwene yela enahaala opahula onanara wothene velaponi yavathi.
Yesu tonahaala ohoolela mu owaniwa wa ekhoco yeela ya Harmagedo. Muupuwele wii Yehova oomuthanla Yesu okhala mwene mu epoma’We. Va nthowa nenla, Yesu onnanwara koroa a mwene. Nave nlema nnathoonyerya wii owo onahaala owiipha amwiicani oothene a Muluku. Mano ninnaphwanela otikhina wii Muluku onahaala wapahula oonanara oothene?
Nkakookelani va Mwaha wa 10. Mano tiheeni munoonanyuvo? Aayi, Maahi mancipale yaawo yapahunle oonanara. Mano taani yoowo eerinhe Maahi awo? Ti Yehova Muluku. Vano vareryani va Mwaha wa 15. Tiheeni yeerenyee vavaa? Sotoma ni Komora yaahipahuliwa ni mooro worumihiwa ti Yehova.
Nkakookelani va Mwaha wa 33. Munnoona yeeyo enereya wa akavalo ni ikaaro sakhoco sa asinaYiikuputu. Mano taani yoowo eerinhe maahi wakumuwela? Ti Yehova. Owo aahakhapelela achu awe. Nkoonani Mwaha wa 76. Vavaa munahaala woona wii Yehova aahiphiyerya waahiya achwaawe, aIsarayeli, wii epahuliwe ntakhara a onanara waya.
Hiihaa, hinnaphwanela okhala otikhina wii Yehova onahaala. Orumiha miloko yakhoco awe yawirimu wii amalihe onanara woothene veelaponi yavathi. Nkuupuwelani yeeyo hiiho inahaalaya otaphulela! Khunulani epaaxina ekina eyo nave nkoonani.