yaakhala mmapuro orukurerya muceche wa Petelehemu, yaanakhalano eparipari yawi awo ni ipucepuche saya ehikhale vaate ohiyu, mweeri wa Tesempro!

Nyenya, Piipiliya onaloca wi akukhula yaari vanlakani vene ewehereryaka ipucepuche saya ohiyu yoole Yesu aayariweiye. Mweeparipari, namarepa a Piipiliya Luka onnooniherya wi mu elukuluku yeele akukhula “yakona weiwo, wi enakhapelela ohiyu muhuwo wa iputxeputxe” waacamela oPetelehemu. (Luka 2:8-12) Moone wi akukhula yaakhala o nikuwani ohiyu, tahi wi yaamweececa pahiru othana. Awo yaakhalano ipucepuche saya o nikuwani ohiyu. Mano yooloca eyo yawi akukhula yaakhala o nikuwani, enniiwanana ni elukuluku yooriirya ni yoorupa epula yincipale Opetelehemu, mweeri wa Tesempro? Hooye, heniiwanana. Mwawiihiiha, ichu ineereya mu elukuluku aayariwe Yesu, sinooniherya wi Yesu haayariwe mweeri wa Tesempro.a

Piipiliya, Masu a Muluku annaloca ichu sincipale sa okhwa wa Yesu, nyenya onaloca ichu vakhaani pahiru sa oyariwa wawe. Ela ennaneeriha wuupuwela masu a Mwene Soolomoni aalonceiye wii: “Nsina notxitximiheya ti norèra opwaha yawunkhela yowalamela. Ti norèra nihiku n’okwa opwaha nihiku n’oyariwa.” (Eklesiyaste 7:1) Ti nthowa nenla Piipiliya onaloceiye ichu sincipale sa orummwa ni okhwa wa Yesu, nyenya ichu vakhaani pahiru vooloca sa oyariwa wawe.

MASU AWAACEERERYA

Ninnaphwanela Ocicimiha Mahiku a Ochapela?

MAHIKU ochapela a ikerexa ni a mulaponi anachapeliwa mmapuro mancipale a elapo olelo, haniiwanana ni Piipiliya. Mano mahiku ochapela awo epacenrye hai? Waakhanle wi nyuwo mootholathola, mwahaala otikhiniheya ni yeeyo aliivuru analocaaya sa mahiku ochapela awo ari awunlaana mmapuro munakhalaanyu. Thokororyani sawooniherya vakhaani.

Paskha. “Hiwaamomo echu enathoonyerya wuupuweleliwa wa nihiku na Paskha, mu Nlakano na Hihano,” onnaloca Encyclopedia Britannica. Paskha opacenrye mwawiihai? Opacenrye ni malapelo a amalapo. Naamwi elociwaka wi mahiku ochapela ala enuupuweleliwa ovinya muukhwani wa Yesu, nyenya mihapo inapakiwa mu elukuluku ya Paskha haniiwanana ni ekiristu. Ntoko yootakiherya, vooloca sa muhapo wa “namarokolo a Paskha,” The Catholic Encyclopedia, enii: “Namarokolo ti eneneeryo ya amalapo nave okhala wookhala nthoonyeryo na oyara.”

Ochapela Muyakha Muvyaani. Nihiku ni mihapo siniiwanana ni ochapela Muyakha Muvyaani sinnahiyana elapo ti elapo. Vooloca sa mapacereryo a ochapela Muyakha Muvyaani, The World Book Encyclopedia, enii: “Mulipa oolamulela a o Roma Júlio Kaisara aathanla nihiku noopacerya na mweeri wa Yanero okhala Nihiku noopacerya na Muyakha Muvyaani wa 46 E.K. Aroma yaanachapela nihiku nla nthowa na Yano, muluku a milako mitokotoko, milako mikhaani, ni a mapacereryo. Mweeri wa Yanero onakhuma mu nsina na muluku Yano, yoowo aarino ithoi piili—ethoi emoha yaaweha ohoolo ni ekina yaaweha oculi.” Mwawiihiiha, wuupuweleliwa wa Muyakha Muvyaani opacenrye ni mihapo sa amalapo.

Halloween. Vooloca sa efesta ela enalikana ni muhapo wa owuupuwelela achu ookhwa, The Encyclopedia Americana enii: “Mikhalelo sa mihapo sa waalapela achu ookhwa seiyo iniiwanana ni Halloween, inapaka makupa a muhapo wa Druida [onamukucho wa Acelta akhalai] wa ilukuluku sa khalai Ekiristu ehaakumve. Acelta yaakhalano ifesta sa amuluku eeli atokotoko—muluku a nsuwa ni muluku aachu ookhwa . . . , efesta ya muluku aachu ookhwa yaapakiwa va noopacerya na mweeri wa Novempro, mapacereryo a Muyakha Muvyaani wa a Celta. Vakhaani-vakhaani efesta ya waalapela achu ookhwa yaahipacerya okerihiwa mu muhapo wa Ekiristu.”

Mahiku Makina a Ochapela. Honaweryeya oloca ifesta soothene inapakiwa veelaponi yoothene. Nyenya, ochapela iwo onnaacicimiha achu naari marehereryo aachu ahineemereryiwa ni Yehova. (Yeremiya 17:5-7; Saweriwa T’arummwa 10:25, 26) Muhele mmuruni, tho, wi mapacereryo a ifesta sa ikerexa annavolowela wakhala wi ifesta iho sinnamuhakalaliha Muluku naari hooye. (Isaiya 52:11; Wupulula 18:4) Ikano sa Piipiliya ilociwe Mmwaha 16 wa liivuru ola inahaala wookhaviheryaani nyuwo wi musuwele moonelo wa Muluku vooloca sa ochapela mahiku a mulaponi.