MWAHA WA EKAAPA | OVINYA MOOKHWANI TI WOOWERYEYA?
Munii Muroromele Hai—Ovinya Mookhwani?
Apwanne ti woophwanelela weemererya wi alipa ookhwa heviihiwa mookhwani? Murummwa Paulo haarino muupuwelo yoowo. Mooveereliwa owo aarepa: “Namuweheryeryaka Kristu mukumini yolaru, hiyo nri óhasuwa ópwaha a atchu othene. Nyenya vano Kristu óvíhiwa wukhwani yawima yamulepulo ya yawo enarupa.” (1 Akorinto 15:19, 20) Paulo aanaroromela wi ovinya mookhwani echu yeeparipari. Oviihiwa mookhwani wa Yesu onnaroromeliha yeela.a (Saweriwa Tarummwa 17:31) Ti nthowa nene Paulo aamwichanneiye Yesu “yawima yamulepulo”—owo aari muchu oopacerya oviihiwa mookhwani wa okumi woohimala. Woona wi Yesu aari oopacerya, moohikhwa minikwa anahaala okhalavo akina tho.
Nla nthowa nimoha na ororomela ovinya mookhwani. Yehova, Muluku a eparipari. “Muluku ahinótha.” (Tito 1:2) Yehova hantonko wootha, nave harwa ootha. Apwanne aanwerya ororomeliha ovinya mookhwani, naari wooniherya wi ookhalano ikuru sa weerano yeeyo eniiha eri yawootha? Eyo henaweryeya!
Ntakhara heeni Yehova oolakelela waaviiha achu? Nthowa na osivela wawe. Yupu aakoha: “Mutxhu okhwile onnakòkela akhala? . . . Vanonto nyuwano munamukitxhana nave miyano kinamwakhula; nyuwano munamwèliwa murima ni miyano, ntakhara mukipatunse.” (Yobi 14:14, 15, BNM) Yuupu aalekecheya wi Tiithi awe oosivela a wirimu aahaala okhalano munkhela wa omviiha mookhwani. Apwanne Muluku ootorokeya? Yehova ta “mahiku othene.” (Malakiya 3:6, BNM) Muluku nlelo onnachuna owoona alipa ookhwa erino okumi nave oohakalala. Eri ntoko yeeyo tiithi onachuneiye amanle omuyeleela mwanawe mookhwani. Echu eri yoohiyana ti yawii, Muluku ookhalano ikuru sa weerano onachuneiye.—Salmo 135:6.
Yehova onahaala omvaha ikuru Mwanawe wi aruuhe murecele wa yaale anathanana nthowa na waayeleela oosiveliwa aya mookhwani. Mano Yesu onoona hai vooloca sa ovinya mookhwani? Ahaakumve omviiha Lasaro, Yesu aahoona osooseya wa arokora ni asinthamwene a Lasaro, nave Yesu “ahinla”. (Yohane 11:35) Mu elukuluku ekina, Yesu amphwanya naamukhwele a o Nayini, yoowo aamuyelenle mwanawe mmoharu mookhwani. Yesu “ámoriwa ikharari ntakhara a yowo, alochano, Ohinle.” Moohilekela Yesu aamviiha mwaana owo. (Luka 7:13) Mwawiihiiha, Yesu onnasooseya ntakhara okhwa. Owo onahaala otepa ohakalala vaavaa oneereiye atatuxe othanana okhala ohakalala mweelapo yoothene!
Montoko othanana? Akhweya mohuupuwela wi okhwa honavileleya. Nyenya nookhalavo nikhaviheryo: ovinya mookhwani yoowo Muluku onahaaleiye weerano moorweela wa Mwanawe. Muupuwele wi Muluku onachuna wi moone nikhaviheryo nenlo. Owo onachuna wi muwaakhele oosiveliwa anyu wanaawiili. Nkaanyiheryani opaka soolakelela vamoha, musuwelaka wi hamurwa muhiyana!
Lionel, yoowo oromoliwe woopaceryani onnaloca: “Kaapacerya ohuserya vooloca sa ovinya mookhwani. Omapacereryo, waari woovila weemererya, nave nkaamuroromela muchu aakihusiha ichu seiya. Nave kaamwaalikhela Piipiliya nave kaahoona wi yaari yeeparipari! Vano kinnaweherya ni murima woothene owoona ataata aka wanaawiili.”
Mwaanachuna osuwela sincipale? Anamoona a Yehova anahaala ohakalala owoonihaani mu Piipiliya anyu mathowa anaweeriha ororomela ovinya mookhwani wa omwaahiyu.b
[Masu a vathi]
a Wi musuwele sawooniherya wi Yesu ooviihiwa mookhwani, mmoone liivuru A Bíblia—Palavra de Deus ou de Homem? ipaaxina 78-86 olaleeryiwe ni Anamoona a Yehova.
b Moone mwaha 7 wa liivuru Piipiliya Onahusiha Eheeni Chiryene? olaleeryiwe ni Anamoona a Yehova. Onnaphwanyeya tho mu www.jw.org/ngl.
[Yooleeliherya va epaaxina 8]
Okhwa nikacamiho ntokweene, nyenya Muluku ookhalano nikhaviheryo naphaama