Mukhaviherye Oreera wa Parataiso Oomunepani
“Kinamukhaliha novuwa nipuro kinakhalàkavo.”—ISA. 60:13, BNM.
MACIPO: 102, 75
MUNANWERYA WAAKHULA?
Tiivi ekhanle yoochuna ya alapeli eeparipari a Yehova?
“Paradaiso” murummwa Paulo aamonneiye tiheeni?
Nnii nimureerihe hai parataiso oomunepani?
1, 2. Masu awii “enyikalelo” enaahiwa eheeni mu Soorepa sa Eheepri?
YEHOVA Muluku ooloca: “Erimu ti ehitxe aka, elapo ya vathi ti enyikalelo ya inani saka.” (Isa. 66:1, BNM) Alocaka sa “enyikalelo” awe owo ahii: “Kinamukhaliha novuwa nipuro kinakhalàkavo.” (Isa. 60:13, BNM) Oneerano yeeyo mwawiihai? Nave enataphulela eheeni wa hiyaano nnakhala va “enyikalelo” ya Muluku?
2 Masu awii “enyikalelo” anaphariheleya elapo ya vathi, nave tho mu Soorepa sa Ehepri enaahiwa empa ya Muluku yeeyo yaaphariheliwa ni Aisarayeli akhalai. (1 Math. 28:2; Sal. 132:7) Empa eyo naari nipuro na malapelo aweela veelaponi ya vathi, nave yaari yooreera vamiithoni va Yehova woona wi yaanacicimiha elapo ya vathi yeeyo ekhanle enyikalelo ya Yehova.
3. Empa etokweene yoomunepani ya Muluku tiheeni, nave epacenrye liini?
3 Olelo, nipuro na malapelo aweela tahi empa yawooneya veelaponi ya vathi. Yookhalavo empa yoomunepani yeeyo enamucicimiha vancipale Yehova opwaha yooteka vyakala. Enaahiwa yamahala yeeyo enakhaviherya waataana ni Muluku moorweela wa mukucho wa Yesu Kiristu. Empa etokweene yoomunepani ya Muluku epacenrye okhala mu 29 E.K. vaavaa Yesu aapatisiweiye ni athanliwa ntoko mulipa eephepa a empa eyo.—Ahe. 9:11, 12.
4, 5. (a) Salmo 99 onooniherya hai yoochuna ya alapeli eeparipari a Yehova? (b) Nikoho taani nnaphwanelaahu wiipakela?
4 Ninnathamalela vancipale empa yoomunepani, ophitaanyerya yamahala ya woopola! Eyo ennaneeriha omuthamala Yehova ni olokoha nsina nawe. Ninnahakalala osuwela wi olelo opwaha alapeli 8.000.000 annamucicimiha Yehova. Achu a malapelo makina anuupuwela wi anahaala omucicimiha Muluku pahiru vaavaa aneeraaya ehiye elapo ya vathi wi yakhaleke wirimu, nyenya Anamoona a Yehova anniiwexexa wi anaphwanela omurumeela Muluku hiihaano veelaponi ya vathi.
5 Mwawiihiiha, ninneeravo echu mwawiiwanana ni Salmo 99:1-3, 5. (Mwaalakhanye.) Yoorepa ela ennooniherya wi Moose, Aaroni ni Samuwele yaanakhaviherya marehereryo a malapelo eeparipari mu elukuluku aya. (Sal. 99:6, 7) Olelo, Akiristu awoocihiwa ari veelaponi ya vathi annarumeela va nchaco na empa yoomunepani eweheryaka oya wirimu wi yarumeele ntoko alipa eephepa ni Yesu. Macikhwi a “ipuchepuche sikina” annaakhaviherya moororomeleya. (Yoh. 10:16) Naamwi makhuuru yaala meeli erino ewehereryo yoohiyana, ari awiiwanana mu omulapela Yehova veelaponi ya vathi, yeeyo ekhanle enyikalelo ya Muluku. Nyenya ti waphaama muchu ti muchu wiikoha: ‘Kinnakhaviherya chiryene marehereryo a malapelo aweela yaawo Yehova otikithenryeiye?’
TAANI ONARUMEELA MU EMPA YOOMUNEPANI YA MULUKU?
6, 7. Nikacamiho taani naakhumelenle variyari va Akiristu oopacerya, nave tiheeni yeeren’ye mu 1919?
6 Ivinrevo iyaakha vakhaani vaavaa waapaken’yaaya muloko Weekiristu, waakhumelela omwaryeya yoowo waaloheryiwe. (Saw. 20:28-30; 2 Ates. 2:3, 4) Ovinyerya elukuluku yeele, waakhala woovila waasuwela yaawo yaarumeela mu empa yoomunepani ya Muluku. Ohoolo waya, Yehova aahuupulula moorweela wa Mwene Yesu Kiristu.
7 Mu 1919, yaanooneya yaale yeemereryiwa ni Yehova nave yaarumeela mu empa yoomunepani. Awo yaahookololiwa omunepani wi omurumeela waya Muluku okhale waweemereryeya. (Yes. 4:2, 3; Malak. 3:1-4) Yaapacerya waakhwaniheryeya yawoona yeeyo murummwa Paulo onneiye khalai.
8, 9. Mutharihe makhalelo mararu a “paradaiso” mu yawoona ya Paulo.
8 Yawoona ya Paulo enaphwanyeya mu 2 Akorinto 12:1-4. (Mwaalakhanye.) Yeeyo Paulo onneiye yiichaniwa Yawupulula. Yaathoonya yaweereya ya omwaahiyu, ohiya echu yaakhanlevo mweelukuluku awe. Vaavaa Paulo ‘áshopholiweiye . . . aya wirimu waneraru,’ “paradaiso” taani owo aamonneiye? Parataiso owo aahaala okhala awooneya, mmoha oomunepani ni mukina a wirimu, nave oothene anahaala okhalavo mweelukuluku emohamoha omwaahiyu. Onanwerya othoonya: (1) Parataiso awooneya a veelaponi ya vathi, yoowo onahaala orwa (Luka 23:43); (2) parataiso oomunepani onahaala okhala mu elapo yahiihaano; ni (3) mukhalelo wooreelihiwa onahaala okhala wirimu mu “Paradaiso a Muluku”.—Yaw. 2:7.
9 Ntakhara heeni Paulo aaloca wi aahiiwa “masu óhiweryeya olocheya, yawo ahinemyeryeryiwa wa mutchu wulummwa”? Hiyaari elukuluku wi Paulo atharihe ichu sootikhiniha sa yawoona awe. Nyenya, olelo ti woophwanelela naari waweemereryiwa oloca mareeliho yaawo ari variyari va achu a Muluku.
10. Ntakhara heeni masu awi “parataiso oomunepani” ni “empa yoomunepani” tahi echu emoha?
10 Ikwaha sincipale ninnapharihela masu awi “parataiso oomunepani.” Onaahiwa mukhalelo ahu wooreelihiwa woomunepani, echu yoohiyana ni elapo ela yeeyo enanikhaviherya okhala mmurecele ni Muluku ni annihu. Hannaphwanela oloca wi “parataiso oomunepani” emohamoha ni “empa yoomunepani.” Empa yoomunepani marehereryo Yehova otikithenryeiye wi ekhalevo malapelo eeparipari. Parataiso oomunepani onnaasuwanyeiha yaale aneemereryiwa ni Muluku ni anamulapela mu empa Awe yoomunepani.—Malak. 3:18.
11. Ekari taani eniiwanana ni parataiso oomunepani nryaahuno olelo?
11 Ti yaphaama osuwela wi, opacerya 1919 Yehova onnaweemererya achu wi elape ni yoowo mu omutikitherya ni omwaacererya parataiso oomunepani veelaponi ya vathi! Munnawerya woona makupa anyu mmuteko yoola wootikhiniha? Vaavaa munuupuwelaanyu yeela, apwanne hamunalipiheya otitelela olapa vamoha ni Yehova mweerihaka wi “enyikalelo” awe ekhale yoocicimiheya?
MAREHERERYO A YEHOVA ANNAPWAHIHERYA OREERA
12. Tiheeni nnaroromelaahu vooloca sa waakhwanela wa Yesaya 60:17? (Moone eruku yoopacerya.)
12 Matorokelo a marehereryo a Yehova a veelaponi ya vathi yaaloheryiwa mu Yesaya 60:17. (Mwaalakhanye.) Amiravo naari yaale ari avyaani mu eparipari aahaalakhanya naari ahiiwa vooloca sa matorokelo yaawo. Mwaanyiherye ekari anna ni arokora yaaraayano ya woona matorokelo yaawo! Hiwaavo minikwa wi aalekecheya wi Yehova onnahoolela marehereryo Awe moorweela wa Mwene Yesu. Nave oothene hiyo ninneemererya yeela. Wiiwa masu a anna yaala ennalipiha nroromelo nahu wa Yehova.
13. Mwawiiwanana ni Salmo 48:12-14, tiheeni nnaphwanelaahu weera?
13 Moohipwacha elukuluku nimalinhaahu nri mweeparipari, nnaphwanela waaleela akina sa marehereryo a Yehova. Okhalano parataiso oomunepani mweelapo yeela yoonanara ni yoohikhalano osivela, echu yootikhiniha chiryene! Nnaphwanela oleela “imusi sinorwa” sootikhiniha sa marehereryo a Yehova naari “Ziyoni,” ni eparipari vooloca sa parataiso oomunepani.—Mwaalakhanye Salmo 48:12-14.
14, 15. Matorokelo taani apakiwe opacerya mu 1970, nave ni mphurelo taani?
14 Moovira wa iyaakha, yaale ari awunnuwela ahoona matorokelo anareeriha makupa a veelaponi ya vathi a marehereryo a Yehova. Ntoko yootakiherya, khalai miloko saakhalano murummwa a muloko ohiya nikhuuru na atokweene, elapo emoha yaanakhalano ooweherya ohiya Nikhuuru na Efiliyale, nave muchu aahoolela aakhala mutokweene a Sociedade Torre de Vigia a Estatu Unitu ohiya Nikhuuru Noolamulela na Anamoona a Yehova. Eparipari wi anna yaala awiiveleela yaanakhaviheryiwa. Nyenya pahiru muchu mmoha taahoolela opaka soolakelela mmilokoni, mu ifiliyale ni nipuro nahu ntokweene na elapo yoothene. Opacerya 1970, yaapakiwa matorokelo wi murici wa ohoolela ohikhaleke wa muchu mmoha pahiru, nyenya wa nikhuuru na atokweene.
15 Apwanne matorokelo yaala aakumiherya mphurelo? Aai. Ntakhara heeni? Ntakhara matorokelo awo yaathipeleya mu wiiwexexa wookwakwaleya woorweela mu Soorepa. Ohiya wi okhalevo ohoolela wa muchu mmoha, olelo marehereryo annaphura moorweela wa mikhalelo soothene sa ‘samahala sa atchu’ Yehova ovanheiye.—Aef. 4:8; Masi. 24:6.
16, 17. Matorokelo taani ahiihaanoru anootikhinihaani, nave ntakhara heeni?
16 Muupuwele tho matorokelo ahiihaanoru ntoko otorokeya wa mapakeliwo ni miyaha sa soolaleeryiwa sahu, ophitaanyerya mukhalelo wa okawa. Echu yoohakalaliha ovaha soolaleeryiwa sahu saphaama ni soophara muteko mu orummwa wahu! Nave vaavaa nnapharihelaahu mavyakelo amutano wi nlaleerye eparipari ntoko site jw.org—ninnooniherya osivela wa Yehova ntakhara achu, woona wi onnaavaha ohoolela yoowo anachunaaya ancipale ahiryaayano.
17 Muhicuwale matorokelo apakiwe mu mithukumano sahu wi nikhaleno elukuluku ya Malapelo a Echoko naari yoohuserya ya muchu mukhateiye. Ninnathamalela tho matorokelo a mithukumano sa ekulucu ni sa muceche. Ninnoona wi mithukumano iho sinnareera eyaakha ti eyaakha! Moohikhwa minikwa ninnahakalala ni ovyakiha yoowo onavahiwa mu ixikola sahu sincipale soomuluku. Ninnoona nikhaviheryo na Yehova mmatorokelo yaala oothene. Owo onnaaceererya oreera wa marehereryo awe ni oreera wa parataiso oomunepani nryaahuno hiihaano!
NYUWAANO MUNII MUKHAVIHERYE HAI OREERA WA PARATAISU OOMUNEPANI
18, 19. Nnii nikhaviherye hai ooreera wa parataiso oomunepani?
18 Yehova oonivaha ekari ya okhaviherya oreera wa parataiso ahu oomunepani. Ninneerano yeeyo moorweela wa olaleerya mwa mvai michaka yaphaama ya Omwene ni waapaka oohuserya. Vaavaa nnamukhaviheryaahu muchu oya vahoolo ophiyerya opatisiwa, ninnakhaviherya wunnuwa wa parataiso ahu oomunepani.—Yes. 26:15; 54:2.
19 Nnanwerya tho waaceererya oreera wa parataiso ahu oomunepani moorweela wa orehererya omuchu ahu Weekiristu. Weerano hiiha ennaweeriha achu ookhwipi woona oreera wa parataiso owo. Meecelo ahu aweela ni a murecele aakhalano ikuru sa waapurulela achu wa Muluku ni marehereryo awe ni wa Kiristu, opwaha masuwelelo a Mpiipiliyani.
20. Mwawiiwanana ni Masiposipo 14:35, tiivi enaphwanela okhala yoolakelela ahu?
20 Mwaanyiherye ohakalala Yehova ni Yesu anakhalaayano vaavaa anoonaaya oreera wa parataiso ahu oomunepani! Ohakalala nnapuhaahu orweela wa okhaviherya oreera yoola eri yawooniherya ya ohakalala nnahaalaahu okhalano nlapaka wi Elapo ya Vathi ekhale parataiso chiryene. Nikhaleno mmuupuweloni Masiposipo 14:35, BNM, onii: “Mamwene annatxhuwela amulapeli òwerya olapa.” Neereke mwa miruku vaavaa nniilipixeryaahu omureeriha parataiso oomunepani!