OKUMI WEEKIRISTU

Muhusihe Eparipari

Ovinyerya mu Setempuru, Okumi ni Muteko Ahu Weekiristu Yoochariha ya Mithukumano, enahaala okhalano makupa mavyaani a mapaceryiho a ntakiheryo arino muru “Muhusihe Eparipari.” Yoolakelela ahu ori ovuwiha iparipari sa Piipiliya nipharihelaka makoho ni soorempwa.

Wakhala wi nohoona wi muchu owo ookhalano nchuno, nnanwerya opaka mathipelo a oxekurya wahu moorweela wa yoolaleeryiwa, naari tho moorweela wa omooniha exilema ya mu jw.org. Niilipixerye wi nimuxekurye mwawaakuveya wi nthokororye mwaha naahiyerenryaahu. Mapaceryiho yaala mavyaani ni makupa aanaxikola, anahaala orweela mu mukwasu wa mwaha ti mwaha onaphwanyeya mu liivuru Tiheeni Piipiliya Onanihusiheiye? Mmakupa yaala nnahaala ophwanyamo makoho ni soorepa sinahaala onikhaviherya ekwaha yooxekurya naari weeciha yoohuserya nimpharihelaka pahiru Piipiliya.

Orivo mphiro mmoharu pahi onakeriha wookumini woohimala. (Mat 7:13, 14) Woona wi nnaloca ni achu a ikerexa ni makhuuru oohiyanahiyana, nnaphwanela ohusiha iparipari sa Piipiliya, seiho sinahaala okhala sa mphurelo wa muchu ti muchu. (1Tim 2:4) Vaavaa nnahaalaahu olocaka miyaha soohiyanahiyana sa Piipiliya nave wunnuwiha mavyakelo ahu a “olaleryaka masu èparipari ni murima worèra,” ohakalala wahu onahaala waaceereryeya, nave nnamukhalano mphurelo mu ohusiha wahu eparipari wa akina.​—2Tim 2:15.

OKUMI WEEKIRISTU

Mukipici wa Vameekhaaya wa Omukawa Mulipeleli mu Setempuru

Achu oothene annachuna ohakalalihiwa. (Ekle 4:1) Variyari va mweeri wa Setempuru, nnaphwanela wiilipixerya wi nimukawe Mulipeleli, yoowo oni aloce mukhalelo wa ophwanya nihakalaliho. Mpake makupa mu mukipici yoola. Nyenya, woona wi nnachuna oloca ni achu ni waahakararya, nihihiyeke irevista vaate ohikhaliwevo.

MASU OOLOCA

“Velukuluku vaya oothene hiyo ninnachuna ohakalalihiwa. Vano, taani onavaha nihakalaliho nawaakhwanela? [Mwaalakhanye 2 Korinto 1:3, 4.] Erevista ela ennathokororya ti mwawiihai Yehova onavaheiye nihakalaliho.”

Wakhala wi muchu owo ohooniherya nchuno nave ohaakhela erevista, . . .

▸ MMOONIHE EXILEMA, NTAKHARA HEENI OMUHUSERYA PIIPILIYA?

Mumvahe yoohuserya ya Piipiliya.

▸ MPAKE MATHIPELO A OXEKURYA ONACHARELA

Mpake nikoho nenlo munahaalaanyu waakhula vaavaa munachikaanyu, ntoko, “Ntakhara heeni Muluku oneemereryeiye makacamiiho?”