Niphwanaphwaniho Vooloca sa Mina Khumi

Naamwi mukwaha wa Yesu ori ophiya o Yerusalemu, owo onatitelela okhala vaate va Sakeyu vamoha ni amuhuserya awe. Awo aneemererya wi “omwene wa Muluku” moohilekela onahaala otikitheryiwa nave Yesu ntoko Mwene. (Luka 19:11) Awo haniiwexexa phaama mwaha ola, hiiha ntoko ahiniiwexexaaya wi Yesu tho onaphwanela okhwa. Mwawiihiiha owo onnapharihela niphwanaphwaniho wi aakhaviherye osuwela wi Omwene woorakamela chiryene.

Owo onnaloca: “Mulopwana mmoha òsuwanyeya àtximula, àya worakamawo, wi avahiwe omwene ni akòke.” (Luka 19:12) Mukwaha owo waahaala okhala wa elukuluku yawaaca. Mwawooneya Yesu tori “Mulopwana mmoha òsuwanyeya” yoowo aakele “worakamawo” wirimu, weiwo Atiithinya anayaaya omvaha owerya wa omwene.

Mu niphwanaphwaniho, ahaakumve ocimula “Mulopwana mmoha òsuwanyeya,” owo onnawiichana amulapeli khumi nave onnaannya ikhorowa sa mina, aaleelaka: “Mulapekeno seiho ophiyerya nihiku na okòka waka.” (Luka 19:13) Mweeparipari ikhorowa sa miina sootepa okhalano esisapo. Ekhorowa ya mina emoha nlivelo nenlo namalapa onalima aaphwanyeiye mu miyeeri miraru.

Akhweya amuhuserya aasuwela wi awo ari ntoko amulapeli khumi ale alociwe mu niphwanaphwaniho, yaawo Yesu omanleiye waalikanyiha ni anamalapa a mmacani. (Mateu 9:35-38) Mweeparipari, tahi wi owo onaaveka amuhuserya awe oruuha soohepha sa mmacani. Ohiya yeeyo, oohepha ori mwa amuhuserya akina yaawo anahaala ophwanya mpuro mu Omwene wa Muluku. Amuhuserya annapharihela yeeyo aryaayano wi ewerye waapaka akina yaawo anahaala okhala mikelampa sa Omwene.

Tiheeni Yesu onuupululeiye xaxaxa mu niphwanaphwaniho nenla? Owo ooloca wi achu a elapo awe “yanamwitxa [mulopwana mmoha òsuwanyeya]. Yaharuma atxhu akina otxuli wawe wi yalotxe eriki: ‘Hiyo hinnakhwela wi owo anlamuleke.’” (Luka 19:14) Amuhuserya aasuwela wi Ayuta hamweemerenrye Yesu, ophiyerya wi akina annachuna omwiipha. Yesu amanle okhwa ni oya wirimu, Ayuta anamooniherya moonelo aya vooloca sa yoowo moorweela wa owiikara amuhuserya awe. Amwiicani yaala anneerano mookwakwaleya yooniheryaka wi hanamuchuna Yesu okhala ntoko mwene.—Yohani 19:15, 16; Saweriwa T’arummwa 4:13-18; 5:40.

Ntoko wa amulapeli khumi, eni epharihele hai ikhorowa saya sa mina ophiyerya “mulopwana mmoha òsuwanyeya” waakhela “omwene” ni okooka? Yesu onnathariha: “Owo akònkeiye, akhenle omwene, àwitxhana amulapeli yale annyileiye ikhorowa, wi asuwele marotxa mutxhu ti mutxhu aphwannyeiye. Opatxerya àhi: ‘Pwiya mina sà ìhatxereyana nikhumi nimoha’. Owo àhi: ‘Òhera phama, mulapeli aphama. Vano wisonihalawe okhala òroromeleya ni itxhu vakhani, akhelá otokwene wolamulano ipoma khumi.’ Àrwa anawili ni àhi: ‘Pwiya, mina sà ìhatxereryana iphiyerya mithanu.’ Ni wa yola àhi: ‘Weyanotho olamuleke ipoma thanu.’”—Luka 19:15-19.

Wakhala wi amuhuserya ahiiwexexa wi awo ari ntoko amulapeli yaawo anapharihela ichu aryaayano wi yaapake amuhuserya akina awaaca, awo anamusuwela wi Yesu onahaala ohakalala. Nave awo ananwerya ororomela wi onahaala oreeliha wiilipiserya waya. Mweeparipari, tahi wi amuhuserya oothene a Yesu arino mikhalelo soolikana mu okumi aya naari okhalano ikari ni mavyakelo oolikana. Naamwi hiiha, Yesu onaakhela “omwene,” onahaala owuupuwelela ni oreeliha wiilipiserya waya woororomeleya ntakhara waapaka amuhuserya.—Mateu 28:19, 20.

Nkoonani ohiyana orivovo, vaavaa Yesu onakuchuleiye niphwanaphwaniho nawe: “Àrwa [mulapeli] mukina ni àhi: ‘Pwiya, mina a mmoha, olá, kamankaka vakuwoni. Miyo kàmova, ntakhara weyano wamutxhu awuma murima, onakusa ohikun’hawevo ni onahepha ohanlawevo.’ Vano owo àhi: ‘Mulapeli ònanara murima, miyo kinothoriha ni masu olontxawe. Wanasuwela miyo kiri mutxhu awuma murima, wi kinakusa kihikun’hakavo, ni kinahepha kihanlakavo. Vanonto wahànnyerya ni ikhorowa saka alipa òrèla niha ikhorowa? Miyo kikòkaka kamphwanya satxereryen’ye.’ Nave àhi wa yale yàri vavale: ‘Mmwakhe mina ni mmunnye orino khumi.’”—Luka 19:20-24.

Nthowa na ohaacererya muhakhu woomwene wa pwiya awe, kapuro ola onnayeleela soothene. Amuhuserya annaroromelihiwa woosiilo olamulela ni Yesu mu Omwene wa Muluku. Mwawiihiiha orweela wa yeeyo Yesu onathariheiye vooloca sa mulapeli ookuchula, enakhala ntoko wi ahiiwexexa wi wakhala wi awo hiyaanono mvai mmuteko aya, heni ephwanye mpuro mu Omwene owo.

Masu a Yesu anaphwanela waaceenyerya amuhuserya oororomeleya waaceererya wiilipiserya waya. Yesu onnakuchula niphwanaphwaniho nawe ariki: “Kinnolèlani wi yole orino onamwatxereriwa, nto yole ohirino, onamwakhiwa ni yele ene oryeiyeno.” Owo onnaaceererya alocaka wi, yaale “yahakhwela wi miyo kikhale mwene,” anahaala wiiphiwa. Voocharela, onnatitelela mukwaha awe ayaaka o Yerusalemu.—Luka 19:26-28.