3. Ti mwawiihai mukhalelo woomunepani oryaaya wookhweleya, nave muchu onawerya hai okhalano?

³ Mukhalelo Woomunepani: Ti wookhweleyaxa wa kapuro mmulokoni okhalano mukhalelo woomunepani ohiya okhalano osuwela wavameekhaaya nari owerya wooyariwano. Muchu oomunepani onneererya woona ichu hiihaa ntoko Yehova ni Yesu anoonaaya. (1 Akor. 2:15, 16) Owo onnooniherya “yawima ya munepa.” (Akal. 5:22, 23) Owo mulaleeryi a mvai onahela sookhwela sa Omwene va nipuro noopacerya. (Mat. 6:33) Nyuwano mwakhalano yookhovelela ya yoohuserya ya muchu mukhateiye munanwerya wunnuwiha mikhalelo soomunepani. Eyo yaahaala ophitaanyerya omwaalakhanya Piipiliya mahiku oothene, waalakhanya irevista A Sentinela ni Despertai!, orehererya ni ophiya mithukumano sa muloko. (Sal. 1:1, 2; Ahe. 10:24, 25) Amuceenyeryaka mmiravo Timoteo wi aye vahoolo mmukhalelo woomunepani, Paulo aarepa: ‘Owehererye . . . mahusiheryo aa.’ (1 Tim. 4:15, 16) Mwawiihiiha mulape mwakuru mu miyaha anyu mu Exikola ya Orummwa WooMuluku. Murehererye orummwa wanyu, nave munalaleerya moohihiyererya. Mukhaleno soolakelela soomunepani ntoko opiyoneero, muteko wa Beteli, nari ovolowa Exikola ya Piipiliya ya Anna Oohithela. Mukhalelo woomunepani onahaala wookhaviheryaani ‘otchawa minkhela yomiravo.”​—2 Tim. 2:22.

Ovuwihiwa wa Muteko wa Mmacani

Ovinyerya opaceryiwa wa waalikheliwa itila piili vayaakhani wa Ipa sa Omwene ni achu oovyakihiwa, nto Fevereru, Ipa sa Omwene 48 soorehereryiwa. Naamwi elukuluku enamalihiwa henalokohiwa ntoko muteko wa mmacani, orehereryiwa wa Ipa sahu sa Omwene ti muteko waweela vamoha ni wiilipixerya wahu mu orummwa wa mmacani onnamucicimiha Yehova nave onnaweeriha achu oophwanelela ovolowa mmalapelo eeparipari.