YOOHUSERYA 13
Oloca Masu Oolipiha
ECHU YAWEERA: Mwaakhaviherye oowiriyana anyu wiiwexexa mukhalelo mwaha onavolowelaaya ikumi saya, nave nwooniherye echu ya opaka wa yeeyo awo ahusenryaaya.
MUKHALELO WA WEERANO:
● Nwuupuwele oowiriyana anyu. Muupuwelele ntakhara heeni oowiriyana anyu anachunaaya sooleeliherya seiya nave tiheeni xaxaxa eni yaakhaviherye.
● Variyari va mwaha anyu, nwooniherye oowiriyana anyu echu ya opaka. Ovinyerya omapacereryo, muchu ti muchu onawiiwaani onaphwanela wuupuwelaka wi, ‘Eyo ennakivolowela.’ Vaavaa munalocaanyu mwaha ti mwaha, mooniherye mukhalelo wa opharihela. Mukhaleke ooluluwanya.
Moosivela, muthokororye ophariheleya wa malakiheryo a Piipiliya nave mmukhalelo oni wooniherye wi munniiwexexa mukhalelo anuupuwelaaya. Ohiya oweeriha akina okhalano mathowa, mulipihe osivela ni nroromelo naya, muroromelaka wi mirima saya inahaala oceenyeryeya opaka ichu moophwanelela.
[Ekaaxa va epaxina 16]
MMUTEKO WOOLALEERYA
Vaavaa muniirehereryaanyu oya mmuteko woolaleerya, muupuwele sa yeeyo enaphwanyeya mu michaka ni nyaha sini sikhale soochuneya wa achu a ekulucu anyu. Muloce echu eri yawunlaana naari enaakacamiha achu. Mmuceenyerye muchu oloca mootaphuwa vooloca sa echu enatannya murima. Voocharela nwiriyane naakhulo, nave wakhala wooweryeya muloce echu enahaala omukhaviherya.