Mutitelele Omurumeela Yehova ni Ohakalala
MUUPUWELE nihiku noohakalaliha muukumini mwanyu. Apwanne nihiku mwaathenlaanyu naari mmuyanraanyu mwaana oopacerya? Naari nihiku mpatisiwa anyu? Nno naari nihiku nookhweleyaxa nave noohakalaliha muukumini mwanyu. Nave mu nihiku nenle, anna ni arokora anyu yaatepa ohakalala osuwela wi munnamusivela Muluku ni murima anyu woothene, okumi, muupuwelo ni ikuru!—Marko 12:30.
Moohikhwa minikwa, munnakhalano ohakalala mu omurumeela Yehova ovinyerya vaava mpatisiwa anyu. Nyenya, alaleeryi ancipale aayeleela ohakalala yaaryaayano woopaceryani. Ntakhara heeni eneereyaaya? Mathowa taani nryaahuno a otitelela omurumeela Yehova ni ohakalala?
NTAKHARA HEENI AKINA ANNAYELEELA OHAKALALA WAYA?
Michaka ya Omwene sinnanivaha ohakalala wawaaca. Ntakhara heeni? Nthowa nawi Yehova onnalaiherya wi moohilekela Omwene owo onahaala omaliha elapo ela yoonanara ni oruuha elapo yahiihaano ya Muluku. Sofoniya 1:14 onnaleela: “Nihiku ntokotoko na esara y’Apwiya nohatxamela, nokhuvèla, nnarwa ni wakuva.” Nyenya wakhala wi ninnoona wi yoohalawo elukuluku ya owehererya, nnahaala oyeleela ohakalala naaryaahuno. Ela enahaala okukuca omurumeela wahu Muluku.—Masiposipo 13:12.
Vaavaa nnamalihaahu elukuluku ni anna vamoha ni arokora ahu, ninnalipiheya otitelela omurumeela Yehova ni ohakalala. Meecelo aphaama aachu a Yehova ananwerya onlekecha wa malapelo eeparipari ni onikhaviherya omurumeela Muluku ni ohakalala otokweene. (1 Pedro 2:12) Nyenya tiheeni enahaala weereya wakhala wi munnihu naari murokora oolakiwa nthowa na ohiiwelela malamulo a Muluku? Ela enahaala waaceecheiha akina a mulokoni ni waayeleeliha ohakalala waya.
Wiithukumanyerya onanwerya tho oniyeleeliha ohakalala wahu. Mmukhalelo taani? Elapo ya Satana enneererya onlekecha wi nnaphwanela othuma ichu seiyo chiryene nihinachunaahu. Mwawiihiiha nnaphwanela wuupuwela masu a Yesu: “Havo onawerya walapa asitokwene eli: ntakhara oni anammwitxa mmoha nave anamukhwela mukina, nari ani anammutxhuna mmoha ni anamunyemula mukina. Nyuwo himunawerya omulapa Muluku ni musurukhu.” (Mateu 6:24) Hiyaano haniwerya omurumeela Yehova ni ohakalala nave elukuluku emohamoha neereryaka okhalano soothene nnaphwanyaahu mu elapo yeela.
MUHAKALALE MU OMURUMEELA YEHOVA
Omurumeela Yehova tahi murici mutokweene wa yaale anamusivela yoowo. (1 Yohani 5:3) Muupuwele yeeyo Yesu oolonceiye: “Rwani wa miyo othene nyuwo muri òvelavela ni ònyokoliwa, wona wi miyo kinan’witxhuwihani. Ireyani muritxi aka ni huseryani wa miyo kiri òrèra murima ni awiyeviha, nave munampwanya witxhuwa wa minepa sanyu, wona wi muritxi aka honalimelasa ni ori woveya.” (Mateu 11:28-30) Okhala Mukiristu eeparipari ti yawiichuuwiha nave ennaruuha ohakalala. Chiryene nookhalano mathowa aphaama a ohakalala mmuteko wa Yehova. Vano hankooni nthokororye mararu a yaawo.—Habakukhi 3:18.
Nnamurumeela Namavaha ahu a Okumi, Muluku a oohakalala. (Saweriwa T’arummwa 17:28; 1 Timóteo 1:11) Noosuwela wi okumi ahu onarweela wa Mpatuxa ahu. Mwawiihiiha hankooni ntitelele omurumeela yoowo ni ohakalala, moohipwacha iyaakha kavi nimalinhaahu ovinyerya vaava nipatisiwa ahu.
Mmuthokororye Héctor, yoowo aamurumeenle Yehova ntoko aweeceeca a ekulucu, mu iyaakha 40. “Naamwi uuluvanle,” nlelo onnahakalala omurumeela Yehova. (Salumu 92:12-14) Wiiceliwa wa mwaariye onnakukuca muteko awe mu omurumeela Muluku, nyenya Héctor hanayeleela ohakalala wawe. Owo onnaloca: Naamwi eri yoothananiha woona ekumi ya mwaaraka elalaka nave ekhalaka yookacamiha omukhapelela, miyaano nkineemererya wi ela ekiyeleelihe ohakalala waka mu omurumeela Muluku eeparipari. Kisuwelaka wi okumi aka ti wa Yehova, yoowo ompatunxe muchu ni yoolakelela, nthowa nnakeeriha omurumeela yoowo ni murima aka woothene. Kinniilipixerya okhala a mvai mmuteko wa olaleerya, nave hiyaavo echu ekina enavira mmuupuweloni mwaka opwaha oweherya Omwene wi kihiyeleele ohakalala waka.”
Yehova oonivaha mukucho wa woopola, anivahaka ekeri ya okhalano okumi woohakalaliha. Chiryene “Muluku òtepa wakhwela atxhu a mwelaponi, ophiyerya onvaha Mwana awe mmoharu, wi mutxhu onamwemererya yowo, ahirimele, nto akhalano ekumi yohimala.” (Yohani 3:16) Aai, soocheka sahu sinanwerya okhurumuweliwa wi nikhaleno ekumi yoohimala wakhala wi nohooniherya nroromelo wa yamahala yoosivela ya Muluku yawoopola. Chiryene nla nthowa naphaama na othamalela! Nave othamalela wahu ntakhara woopola onahaala onceenyerya omurumeela Yehova ni ohakalala.
Munna oniichaniwa Jesús, yoowo akhala o Mexiko, aaloca: “Kaari kapuro a muteko aka, olapa ilukuluku thanu soocharelana naamwi wahaari wookhinyereryiwa weerano hiiha. Kaaneerano yeeyo wi kikhaleno ikhorowa sincipale. Voocharela kaahuserya vooloca sa Yehova ni mukhalelo owo omvanheiye mwanawe oosiveliwa ntakhara achu. Kaakhalano nchuno ntokweene na omurumeela yoowo. Mwawiihiiha kaaveleela okumi aka wa Yehova, nave kimanle olapa va empresa mu iyaakha 28, kaalakelela ohiya nave kaavolowa mu orummwa wa elukuluku yoothene.” Ti hiiha Jesús aapacenryeiye omurumeela Yehova moohakalala.
Ninnakhala ni muupuwelo waweela, yoowo onanihakalaliha. Apwanne munnuupuwelela mukhalelo wa okumi anyu muhaakumve omusuwela Yehova? Murummwa Paulo aawuupuxerya Akiristu o Roma wi awo ‘yari akapuro a yotxheka’ nyenya yaakhala “akapuro a wokololowa.” Woona wi awo yaakhalano okumi waweela, yanwerya omoona phatamari a okumi woohimala. (Aroma 6:17-22) Hiyaano tho nnachariha malakiheryo a Yehova, mwawiihiiha nri ootaphuwa orweela wa othanana onarweela wa mukhalelo wa okumi woonanara. Chiryene ela ennaruuha ohakalala!
Mmuthokororye Jaime, yoowo aheemererya wi Muluku ookhala nave eemererya othatuwa nave aari tho namawaniha. Jaime aapacerya ophiya mmithukumanoni Seekiristu nave aatikhiniheya ni osivela aaphwanyeiye mummo. Wi atoroke mukhalelo awe wa okumi, Jaime aaphwanela omveka Yehova wi amukhaviherye omweemererya Yoowo. Jaime ooloca: “Vakhaani vakhaani, kaahoona wi ookhala Tiithi oosivela ni Muluku aikharari. Okhapelela malakiheryo eekhaikhai a Yehova annakaakiha. Kahitoroken’ye, kii keereke kikhwile, hiiha ntoko yeeren’yaaya ni asinthamwene aka a owana. Mu okumi aka woothene kiphwannye ohakalala pahiru mu iyaakha kimalinhaaka kimurumeelaka Yehova.”
MUHIVELAVELE!
Nnaphwanela woona hai vaavaa nnaweheryaahu okuchuwa wa elapo ela yoonanara? Muupuwele, hiyaano nneerano yookhwela ya Muluku nave ninnamoona phatamari a okumi woohimala. “Nihivelaveleno wera saphama, wona wi, nahivololà, nnamuhepha mwa elukuluku aya.” (Galasya 6:8, 9) Nnikhaviheryo na Yehova, hankooni niilipixerye, olapa mwakuru wi nunnuwihe makhalelo nnachunaahu wi nivuluwe “mohosiwani otokwene,” ni otitelela omurumeela Yehova ni ohakalala.—Wupulula 7:9, 13, 14; Tiyako 1:2-4.
Nnaphwanela ororomela wi Yehova onahaala oreeliha wiilipixerya wahu ntakhara wi oosuwela muteko nnapharaahu ni osivela nnooniheryaahu wa yoowo ni nsina nawe. Wakhala wi nootitelela omurumeela owo ni ohakalala, nnahaala okhala ntoko Tavite, yoowo olonce: “Mahiku othene Apwiya anakhala vamithoni vaka, ari omononi waka wolopwana, nkirwa kòtxeya. Wa nthowa na yela murima aka onnahakalala, nave munepa aka onnatxhapa: à mwili akatho onnitxhuwa mmuretxeleni.”—Salumu 16:8, 9.