OKUMI WEEKRISTU
Mithukumano sa Miceche sa Vayaakhani—Ikari wi Nooniherye Osivela
Ntakhara heeni ninnapuha mithukumano sa muceche sa vayaakhani? Hiiha ntoko Aisarayeli akhalai, mmahiku ahu mithukumano sa muceche sinnanivaha ekari ya omulapa Yehova vamoha ni annihu a munroromeloni macikhwi macikhweene. Hiyaano ninnapuha yoolya yincipale yoomunepani. Nave tho ninnahakalala omaliha elukuluku ni amusi vamoha ni asinthamwene. Othamalela wahu onnaniceenyerya ophiya va muthukumano wa muceche mmahiku oothene mararu.
Vaavaa nnathukumanaahu vamoha, nnaphwanela wuupuwelaka ohiya pahiru yeeyo nnahaalaahu ophura, nyenya tho mukhalelo nnahaalaahu wooniherya osivela wa akina. (Gal 6:10; Ahe 10:24, 25) Vaavaa nnahulaahu nsele ntakhara munna naari murokora ahu naari waavya nipuro vaavaa nnahaalaahu okiraathivo, nnooniherya wi ninnathokororya sa akina ohiya aneene meekhihu. (Fil 2:3, 4) Mithukumano sa miceche sinnanivaha ekari ya waapaka asinthamwene avyaani. Ohaakumve naari omanle muthukumano vamoha ni elukuluku yawiichuuwa, nnanwerya ochekula ni muchu yoowo nihimusuwenlaahu. (2Kor 6:13) Hiihaa nnanwerya opaceryiha onthamwene onahaala wiikhalelaru! Opwaha soothene, vaavaa achu akina ananoonaaya nooniheryaka osivela weeparipari, awo ananwerya olakelela okhala vamoha ni hiyo mu omurumeela Yehova.—Yoh 13:35.
MOONE EXILEMA “OSIVELA HONAMALARU”! MITHUKUMANO SA MICECHE MU ILAPO IKINA, NAVE MWAAKHULE MAKOHO ANACHARELA:
Osivela taani wooniheryiwe wa yaale a ilapo ikina yaaruule va mithukumano sa miceche sa eyaakha ya 2019?
Ntakhara heeni wiiwanana ni osivela variyari va achu a Yehova oryaaya wawooneya?
Mikhalelo taani sa osivela Weekristu sooniheryiwe ni anna a Nikhuuru Noolamulela?
Muni mooniherye hai osivela yoowo onooniheryiwa mmithukumano sahu sa miceche?
Mmukhalelo taani osivela Weekristu waawiiwananinhaaya annihu o Alemanya ni Koreya Oohico?
Tiheeni enaphwanela okhala yoolakelelaahu?