Yesu vamoha ni oohuserya awe annakhala o Petaniya mahiku mararu ovinyerya vaavaa aphin’yaaya erwaaka o Yeriko. Vano, wooxixelo wa nihiku na Noomorela Muteko, 10 a Nisani, awo annacimula eyaaka o Yerusalemu. Yesu oovoliwa. Mwawiihiiha, vaavaa onooneiye mwiri wa mukuukhu, onnaacamela wi oone waawiimale.

Vano omakuchuwelo wa mweeri wa Marsu, nyenya elukuluku ya mukuukhu mweeri wa Yunyu. Nyenya mwiri ole waahipehererya ophuwela makukhu. Mwawiihiiha Yesu onuupuwela wi akhweya onahaala ophwanyamo sawiima. Nave vaavaa onaacameleiye, onnoona wi hiwaano sawiima. Mukhalelo wa makukhu woonwoka. Voocharela Yesu onnaloca: “Ahikhaleru mutxhu oni alye sawima sà.” (Marko 11:14) Moohilekela, mwiri ole onnapacerya onyaala, yootaphulela aya enahaala osuweliwa wooxixelo wa nihiku noocharela.

Voohilekela, Yesu ni oohuserya annaphiya o Yerusalemu. Owo onnavolowa mu empa ya Muluku yeeyo aavareryenleiye othana wa nihiku na osilo. Olelo owo onneera echu ekina ohiya pahiru ovareryela; onneera echu yoolikana ni yeele eenreiye mu iyaakha raru muculi mu Paskha a 30 E.K. (Yohani 2:14-16) Ekwaha ela, Yesu onnawiikarela vaate “alipa a marotxa ni ale yakula mwemmo.” Owo tho ‘onnapitxula mesa a yale yatxintxa ikhorowa ni mipatxo sa yale yakuliha ikakaiya.’ (Marko 11:15) Owo haneemererya wi muchu ateexe maroca awe nave avire veeri va empa ya Muluku wi aakuve okwasa, ayaaka okuliha nipuro nikina.

Ntakhara heeni Yesu oneereiye echu ntoko yeela wa alipa oocinca ikhorowa ni anamatumiha a axinama mu empa ya Muluku? Owo onnaloca: “Herempwe wi: Empa aka eni yitxhaniweke empa ya mavekelo wa maloko othene, nto nyuwo mpanke yeyo nikhuku na ampava?” (Marko 11:17) Ni mathowa aphaama, Yesu onnawiichana awo ntoko ampava woona wi yaanaawalameliherya achu yaale yaathuma axinama wi evahe mukucho. Mmoonelo wa Yesu, awo yaari ntoko alipa awiiya naari ampava.

Moohilekela, alipa eephepa atokotoko, alipa oorepa, ni asitokweene akina yaahiiwa yeeyo Yesu eenreiye, nave yaanachuna omwiipha elukuluku yeele. Nyenya hiyaawenrye. Awo yaahaleela mukhalelo wa omwiipha nthowa nawi yaathukumana achu ancipale wi enwiriyane Yesu.

Ayuta vamoha ni yaale yaavolonwe mmalapelo a Ayuta, yaarwa nthowa na Paskha. Variyari va yaawo, yaakhalavo Akriki yaawo tho yaaruule ntakhara efesta ya Paskha. Akriki ala yaamwaacamela Filipi, akhweya nthowa na wi nsina nawe naanooniherya wi aari Mukiriki nave eloca wi anachuna omoona Yesu. Filipi onnakhwa minikwa waakhanle wi yaahaala okhala yaphaama, nthowa na yeela, onnamuleela Antreya. Oopiili annaya omuleela Yesu, yoowo akhweya nlelo ori mu empa ya Muluku.

Yesu onnasuwela wi okhwa wawe wohaacamela nave wi ela hiyaari elukuluku ya omaliha minikwa sa achu naari okhala oovuwa. Owo onnawaakhula oohuserya yaale apiili moorweela wa niphwanaphwaniho, ariki: “Yophiya elukuluku yovuwihiwa Mwana a mutxhu. Eparipari txhiryene kinnolelani wi enuku ya trigo yamisiwa ehikhwa, enakhala yeyoru, nto yakhwà, ennima vantxipale.”—Yohani 12:23, 24.

Enuku emoha ya tiriku enakhala ntoko wi hiyaano esisapo. Nyenya wakhala wi yoomisiwa nave ‘ekhwà,’ ntoko enuku eyo ennamela nave moovira wa elukuluku enunnuwa ekhalano sawiima sincipale. Moolikana, Yesu ti yooworu pahi ori oophaameya. Nyenya, moorweela wa okhala oororomeleya wa Muluku ophiyerya okhwa, onahaala weeriha wi ancipale yaawo aniikhooca nave anakhala oororomeleya ntoko yoowo, yaakhele ekumi yoohimala. Nthowa na yeeyo, Yesu onnaloca: “Mutxhu onasiveliwa ti ekumi awe, yeyo enammurimela; nto yowo onakhotxa ekumi awe mwelaponi mu, onamukhapelela mwa ekumi yohimala.”—Yohani 12:25.

Tahi wi Yesu onuupuwela pahi sa yoowo meekheiye, woona wi onnaloca ariki: “Ole onakhwela okilapa miyano, akitxhareke; ni weiwo kiryakawo, weiwotho onamukhalawo mulapeli aka. Yowo oni akilapeke, Atithi aka anammutxitximiha.” (Yohani 12:26) Chiryene yamahala etokweene! Yaawo anacicimihiwa ni Atiithi anahaala okhala vamoha ni Kristu mu Omwene awe.

Uupuwelaka ohooxeya otokweene ni okhwa wootakhala yoowo onanweherya, Yesu onnaloca: “Vano murima aka ori wothanana. Kini kilotxeni? Kere: Tithi, okivuluse wa elukuluku yela?” Tahi wi Yesu onachuna okhooca waakhwaniha yoochuna ya Muluku. Owo onnaaceererya: “Nto wa nthowa na yela kirwelaka elukuluku yela.” (Yohani 12:27) Yesu onneemererya soothene Muluku olakelenleiye, ophitaanyerya okhwa wawe ntoko mukuchovo.

Mu empa ya Muluku nihiku na Noomorela Muteko, 10 a Nisani, Yesu onnaloca sa okhwa wawe waacamenle. Uukhuwaka nthowa na mukhalelo eyo yaahaalaaya ovolowela nsina naphaama na Muluku, Yesu onnaloca: “Tithi vuwihá nsina nà.” Nsu ntokweene orweela wirimu ninnaakhula: “Kòvuwiha, nave kinanvuwihatho wiliwili.”—Yohani 12:27, 28.

Achu ari vaavale annakhala oohaleeliheya. Akina anuupuwela wi etari yompe. Akina annaloca: “Munkelo olotxa ni yowo!” (Yohani 12:29) Nyenya, nle naari nsu na Yehova achu yaamanlaaya wiiwa! Nave ela tahi ekwaha yoopacerya achu aniiwaaya nsu na Muluku nlocaka ni Yesu.

Iyaakha raru ni emeya muculi, vaavaa Yesu aapatisiweiye, Yohani Mpatisi ahiiwa nsu na Muluku nlocaka sa Yesu, nriki: “Ola ti mwanaka òkhweleyasa, kinaphwanyakamo nihakalaliho naka.” Voocharela, mu Paskha a eyaakha ya 32 E.K., Yakopo, Yohani vamoha ni Petro yaahoona ncicimiho na Yesu. Alopwana ala araru yaahiiwa nsu na Muluku nlocaka nriki: “Ola ti Mwanaka òkhweleyasa, kinaphwanyakamo ohakalala waka: mun’wiriyaneke.” (Mateu 3:17; 17:5) Nyenya vano, ekwaha ela yaneeraru, Yehova onnaloca mmukhalelo yoowo achu ancipale anaweryaaya wiiwa!

Yesu onnaloca: “Nsu nla hanrumiheliwe wa nthowa naka, nto wa nthowa nanyu.” (Yohani 12:30) Ela yaari yawooniherya wi mweeparipari owo Mwaana a Muluku, Mesiya aalaiheryiwe.

Ohiya yeeyoru, okumi woororomeleya wa Yesu onnathariha mukhalelo achu anaphwanelaaya okhala nave onnavaha onamoona wi Satana Musaserya, mulamuleli a elapo, onnaphwanela othorihiwa. Yesu onnaloca: “Vano enamuthorihiwa elapo. Mutokwene a elapo ela onamuriheliwa vate.” Ohiya wi okhwa wa Yesu, yoowo waari vakhiviru, okhale ntoko ovoothiwa, onahaala okhala ovootha. Mwawiihai? Owo onnathariha: “Nave miyo kathomeyiwà, atxhu othene anamurwa wa miyano.” (Yohani 12:31, 32) Moorweela wa okhwa wawe va mwiri, Yesu onahaala weeriha wi achu emuchareke, ni ohula ephiro ya wookumini woohimala.

Yaakhulaka masu a Yesu awi ahaala ‘othomeyiwà,’ muloko wa achu onnaloca oriki: “Nsuwenle ni sorempwa wi Kristu onamukhala mahiku othene. Vano onawerya hai olotxa: ‘Enaphwanela wi Mwana a mutxhu athomeyiwe? Tani Mwana a mutxhu yowo?’” (Yohani 12:34) Naamwi yoonne ineneeryo soothene, ophitaanyerya wiiwa nsu na Muluku, achu ancipale haneemererya wi Yesu mweeparipari Mwaana a muchu, Mesiya aalaiheryiwe.

Ntoko enreiye khalai, Yesu onnaloca sa yoowo meekheiye ntoko “ekamama.” (Yohani 8:12; 9:5) Owo onnaceenyerya muloko wa achu: “Elukuluku vakhani ekamama eri mwa nyuwo. Mwetxeke si vava muryanyuno ekamama, wi muhiphwanyiwe t’epiphi . . . . Vava muryanyuno ekamama, mwemererye ekamama, wi mukhale anamwane a ekamama.” (Yohani 12:35, 36) Voocharela Yesu onnapwahavo, woona wi nihiku na 10 a Nisani tahi nihiku na okhwa wawe. Owo onahaala ‘othomeyiwa’ va mwiri nihiku na 14 a Nisani.—Galasya 3:13.

Nuupuwelaka sa muteko wa Yesu, onakhala wawooneya wi sooloherya saanaakhwanela vaavaa Ayuta yahaamuroromelaaya yoowo. Mulipa a miririmu Isaiya aaloherya wi miitho a achu yahaala oruuheliwa evaasi ni mirima saya saahaala wuumihiwa, nave wa nthowa na yeela hiyaahaala ocharuwa wi epenuxiwe. (Isaiya 6:10; Yohani 12:40) Chiryene, Ayuta ancipale yaakhooca sawooniherya saavaha onamoona wi Yesu aari Moopoli aalaiheryiwe, yoowo ori ephiro ya ekumi.

Nikotemu, Yosefe o Arimateya, ni ahooleli akina a Ayuta “yàmwemererya” Yesu. Nyenya apwanne anahaala wooniherya nroromelo naya? Naari wi heni yeereno nthowa na woova wiikariwa o sinakooka naari nthowa na ‘okhwela ovuwa wa atxhu’?—Yohani 12:42, 43.

Yesu onnathariha ichu inavolowela okhalano nroromelo: “Yole onakemererya miyo, hanakemererya miyo, nto yole okirumme, nave yole onakòna miyo onamòna yole okirumme.” Iparipari seiho Muluku aamurummeiye Yesu ohusiha nave Yesu aatitelenleiye olaleerya ti soochuneya vancipale, wa nthowa na yeela owo ooloca: “Yole onakikhotxa ni ohinakhela masu aka, òkhalano muthoriha awe: nsu kilontxaka, nenlo nnammuthoriha nihiku nomaliha.”—Yohani 12:44, 45, 48.

Voocharela Yesu onnakuchula ariki: “Nkilontxe ni ikuru saka pahi, nto Atithi akirumme t’akilènle yawera ni yolotxa. Nave kòsuwela wi oruma waya ti ekumi yohimala. Tiva itxhu kinalotxaka, kinnalotxa ntoko Atithi akilènlaya.” (Yohani 12:49, 50) Yesu oosuwela wi moohilekela onahaala oyeeha nikhami nawe ntoko mukucho wa achu yaawo anamuroromela yoowo.—Aroma 5:8, 9.