Yaakhalavo epooma emoha yiichaniwa Ur, waacamela o Papeli, weiwo achu yaalapelaaya amuluku ancipale omuhiya Yehova. Nyenya o Ur aakhalawo mulopwana yoowo amulapa pahiru Yehova. Mulopwana owo ti Aparahamu.

Yehova aamuleela Aparahamu ariki: ‘Ohiye elapo aa, nave ovinyevo wa atiithi aa, oye elapo kineeraaka koothoonyere.’ Muluku tho aapaka nlakano: ‘Nloko naa nnamukhala ntokweene, kinamooreeliha. Wa nthowa na weyaano, kinamureeliha maloko oothene a vathi.’

Aparahamu haasuwenle elapo Yehova aamulenleiye, nyenya owo aanamuroromela Yehova. Mwawiihiiha, Aparahamu, mwaariye Sara ni atiithi awe Tera ni musulwawe Loti yaamaka maphuta aya nave yaapacerya weeca mukwaha woorekama.

Elukuluku Aparahamu ni mwaariye yaaphiyalaaya elapo Yehova aalonceiye, Aparahamu iiso arino iyaakha 75. Elapo eyo yiichaniwa Kanani. Mweelapo yeeyo Muluku aaloca ni Aparahamu nlakano nla: ‘Elapo yoothene yeela onoonaawe kinamwaavaha anamwane aa.’ Elukuluku yeeyo Aparahamu ni Sara yiiso yuuluvanle nave ehirino mwaana. Vano Yehova aahaala waakhwaniha hai nlakano nawe?

Saavira iyaakha sincipale Aparahamu ni Sara ethelanne. Awo yaahiya empa aya yaphaama o Ur, eya yaanakhala mmixakalani. Nyenya Sara haakhala awiikhupanyerya, nthowa nawi aanamuroromela Yehova.

Woona wi Sara aanakhwela okhalano mwaana, owo aaloca ni Aparahamu: ‘Haweni wa mulapeli aka Hakari akhweya yoowo onamooyarelaani mwaana vanipuroni vaka.’ Ohoolo waya Hakari aakhalano mwaana nsina nawe Isimayeli.

Ivinre iyaakha sincipale, vaavaa Aparahamu aareiyeno iyaakha 99 ni Sara iyaakha 89, yaaphiya aleco araru. Aparahamu aahaawopa wi yiichuuwe ni elye va muuruxi wa mwiri. Wohaasuwela aleco awo yaari taani? Yaari ankeelo! Awo yaaloca ni Aparahamu eriki: ‘Muyakha onacharela elukuluku si yeela, weyaano ni mwaariya munahaala okhalano mwaana.’ Sara aaniiwa ari mpuwa mwa muxakala. Owo aatheya nave ahuupuwela: ‘Apwanne evelevelo, kinahaala okhalano mwaana mi kuuluvanle?’

Muyakha woocharela, Sara aamuyara mwaana, hiiha ntoko Yehova aalonceiye moorweela wa ankeelo. Aparahamu aamuchuwa nsina na Isaki, nenlo nnataphulela ‘waacererya otheya.’

Vaavaa Isaki aareiyeno iyaakha thanu, Sara aamoona Isimayeli amutheyaka Isaki. Sara achunaka omwaakiha mwanawe, owo aaloca ni Aparahamu wi amurowihe Hakari ni mwanawe Isimayeli. Woopaceryani, Aparahamu haachuna omwiiwelela owo. Nyenya Yehova aaloca ni Aparahamu ariki: ‘Omwiiwelele Sara. Ntakhara ni Isaki weyaano onamukhalano nloko na achu.’