Loti aanakhala vamoha ni ataata awe Aparahamu, o Kanani. Awo yaakhalano muhuwo muncipale nave hisaakhwana mpuro yaakhalaayawo. Aparahamu aaloca ni Loti ariki: ‘Vano hiyaano nimwalamwale onnoona elapo yoothene ela: Waya omoono woothiyana, miyaano kinaya woolopwana.’ Aparahamu haarino nrima, tahi yeeyo?

Loti aathanla makupa ooreera waacamela epooma nsina naya Sotoma. Waari mpuro waariwo maahi, wooreera okhalawo muhuwo. Vano owo aathaamela o Sotoma vamoha ni emusi awe.

Achu o Sotoma ni a muceche wa Komora yaari oonanara murima. Mwawiihiiha, Yehova aalakelela opahula miceche seiho. Woona wi Yehova aanachuna omvuluxa Loti ni emusi awe, aahaaruma ankeelo wi emulopole avinyewo muceche yoowo ntakhara Yehova ahaala otoloxa.

Loti haakhummewo mwawaakuveya. Owo annalekela. Vano ankeelo yaamukuxa Loti ni amwaariye vamoha ni anaawe apiili aasithiyana ni emukumiherya vaate wa muceche, emuleela eriki: ‘Ochawe! Ovuluxe ekumi aa! ohiwehe oculi. Oheemele vamureyareyani! Ochawele omwaako wi ohikhwe!’

Ephiyaka muceche wa Sowar, Yehova aapacerya osuka o Sotoma ni Komora. Miceche soomiili saatoloxiwa. Mwaara a Loti haamwiiwelenle Yehova nave aaweha oculi, owo aathatuwa nluku na maakha! Nyenya Loti ni anaawe aasithiyana yaavuluwa, ntakhara yaamwiiwelela Yehova. Awo yakhala oothananaxa woona wi mwaara a Loti hiiwelenle. Nyenya yaanahakalala nthowa na omwiiwelela Yehova.

Aparahamu aamuhusiha mwanawe Isaki omusivela Yehova ni ororomela malakano oothene a Yehova. Nto vaavaa Isaki aareiyeno iyaakha 25, Yehova aamveka Aparahamu weera echu yoovila. Echu taani?

Muluku aaloca wa Aparahamu: ‘Omukuxe mwaana aa Isaki, yoowo weyaano onatepaawe omukhwela nave oye elapo ya Moriya.’ Aparahamu haasuwenle ntakhara heeni Yehova aamuruma weerano yeela. Naamwi hiiha aamwiiwelela Yehova.

Mmeeloni mwaya wooxixelo, Aparahamu aamukuxa Isaki ni alapeli awe apiili nave aaya o Moriya. Evinre mahiku mararu, yaapacerya woona miyaako. Aparahamu aahaaleela alapeli awe wi enwehererye wi avahe mukucho vamoha ni Isaki. Owo aamunnya Isaki ikhuuni wi ateexe, nave Aparahamu aakuxa mwaalo. Isaki aahaakoha atiithi awe ariki: ‘Tiithi, vano epucepuche ene nnayaahu opaha eri woowi?’ Aparahamu aamwaakhula ariki: ‘Enama eyo ya mukucho, Muluku onamunivaha.’

Vaavaa yaaphin’yaaya omwaako, awo yaareherya nipuro na opakavo mukucho. Voocharela Aparahamu aammaka Isaki wi akhale mukucho.

Aparahamu aakuxa mwaalo. Mweelukuluku yeeyo, munkeelo a Yehova aamwiichana Aparahamu ariki: ‘Aparahamu! Ohimwiiphe mmiravo owo. Ohimweerele yoonanara! Vano miyaano koosuwela wi onnamwiiwelela Muluku, ntakhara honwateelinhe mwaana aa mmoha.’ Voocharela aahoona epucepuche yeelopwana yanke va miri ni manyaka aya. Aamutaphula Isaki mwawaakuveya nave aakuxa epucepuche eyo wi ekhale mukucho.

Opacerya nihiku nenle, Yehova aamwiichana Aparahamu nthamwene awe. Woosuwela nthowa nene? Aparahamu aaneera yeeyo Yehova amvekeiye naamwi ahisuwelaka mathoweene.

Yehova aahuuluula oloca nlakano nla: ‘Miyaano kinamooreeliha vatokovene ni kinamwareeliha achu a nloko naa ntoko itheneeri sa wirimu.’ Yehova aaroromeliha wi aahaala waareeliha achu aphaama a emusi ya Aparahamu.