Isaki aarino iyaakha 40 amuthelaka Repeka. Owo aanamusivela vancipale. Ohoolo waya, awo yaakhalano anamwane apiili maphapo.

Oopacerya iichaniwa Esawu, anaawiili iichaniwa Yakopo. Esawu aari mulipa oosaya, nave waanatepa omusivela waasaya asinama. Nyenya Yakopo waamusivela okhala owaani.

Mmahiku a khalai, mwaana oopacerya aanahalano imaca sincipale ni ikhorowa atiithi awe ekhwaaka. Eyo yaari echu yoohiyeryiwa. Wa emusi ya Isaki, yoohiyeryiwa eyo yaavolowela soolaiherya sa Yehova wa Aparahamu. Esawu haapwanche wi mareeliho awo toochuneya, nyenya Yakopo aanasuwela wi yaari oochuneya.

Nihiku nikina, Esawu aaya owaani avoliwe vancipale nthowa na omala nihiku nanteero asayaka. Owo aahoona wunkhela wa yoolya yeeyo Yakopo aapen’yeiye nave ahi: ‘Koovelavela! Okivahe yoolya, echu eyo yoophilivila.’ Yakopo ahi: ‘Kaariki koovahe yoolya, okitumiherye toko otokweene aa.’ Esawu ahi: ‘Ti yaphaama! Miyaano kinnakhwa etala! Otokweene aka onaya okiphurela eheeni?’ Onuupuwela wi yeeyo Esawu eenreiye yaari echu yoophwanelela? Hooye. Esawu aayeleela echu yoochuneya nthowa na nruru na ikhuce.

Vaavaa Isaki uuluvanleiye, yaaphiya elukuluku wi amureelihe mwaana ole oopacerya. Nyenya Repeka aamukhavihenrye Yakopo yoowo aari mwaana mukhaani, wi aakhele mareeliho. Vaavaa Esawu aasuwenleiye, aakhala oonyeenyeya nave aanachuna omwiipha munnawe. Isaki ni Repeka yaamukhapelela Yakopo ni emuleela: ‘Ochawe oye wa munnaka Lapani okhale weiwo ophiyerya elukuluku munna aa oneereiye akhurumuwe.’ Yakopo awiiwelela asitiithi awe wi oopole ekumi awe.

Yehova aamulaiherya Yakopo wi aahaala omukhaviherya ntoko aamukhavihenreiye Aparahamu ni Isaki. Yakopo akhala o Harani, weiwo aathela nave aakhalano emusi etokweene, ni muhakhu muncipale.

Yehova aaloca ni Yakopo ariki: ‘Okookele elapo ya atiithi aa.’ Vano Yakopo vamoha ni emusi awe yaapaka mukwaha mutokweene. Yakopo aakumana ni achu akina nave yaaloca ni yoowo: ‘Esawu onnothikirerya nave ookhalano alopwana 400!’ Yakopo anamoova Esawu wi ahaala omuhooxa ni emusi awe. Owo aamveka Yehova ariki: ‘Mukivuluxe mmatatani mwa Esawu.’ Mmeeloni mwaya Yakopo aarumiha yoovaha wa Esawu: ipucepuche, ipuri, imope, akamelu ni apuuru.

Ohiyu Yakopo ari mukhateiye, aamoona munkeelo! Munkeelo owo aanawanano. Awo yaawana ophiyerya wooxixelo. Naamwi Yakopo eeteten’ye haamuhin’ye. Munkeelo aaloca: ‘Kihiye kipwaheke.’ Nyenya Yakopo aamwaakhula: ‘Nkinoohiya wi opwahe ohipacenrye okireeliha.’

Voocharela Munkeelo aamureeliha Yakopo. Vanonto Yakopo aaroromela wi Yehova ahaala omwaakiha wa Esawu.

Wooxixelo ene, Yakopo aamoona Esawu ari ocai ni alopwana 400. Yakopo aavirela emusi awe nave aakokhora wa munna awe ikwaha thanu napiili. Esawu aaya wa Yakopo nave aamukhupaarela. Ala yaahinla nave yahaataana mukina ni mukhwaawe. Yehova onne hai yaweereya ya Yakopo mphironi?

Voocharela, aakookela owannyawe nave Yakopo aapwaha. Anamwane a Yakopo yaari 12. Masina aya ti ala: Rupeni, Simiyone, Levi, Yuta, Tani, Nafetali, Kati, Aseri, Isakari, Sepuloni, Yosefe, ni Peniyamini. Mwaana mmoha—Yosefe—aaphariheliwa ni Yehova wi aavuluxe achu. Onnasuwela yeeren’ye hai? Hanko noone.