Yosefe aari mwaana mukhaani a Yakopo. Annawe yaahoona wi atiithinya yaanatepa omusivela Yosefe. Onuupuwela wi yaanahakalala ni yeeyo? Yaanamukhalela nrima Yosefe ni omwiica. Vaavaa Yosefe aalonheiye echu yavameekhaaya owo aahaaleela asinnawe yooloha eyo. Vano awo yaahuupuwela wi muhoolo, Yosefe ahaala okhala mutokweene waapwaha yaawo. Nthowa na yeeyo yaanamwiica vancipale!

Nihiku nikina asinna a Yosefe yaanakukhula ipucepuche waacamela epooma ya Sikemi. Yakopo aamuruma Yosefe wi awoone asinnawe. Ari ocai, asinnawe yaamoona arwaaka nave yaaloca eriki: ‘Mmoone mulipa oolohaahu onnarwa. Haya wookhweyavo, nimwiiphe.’ Awo yaamphara nave yaamurihela mu ekhokwe yawiixa. Nyenya munnawe Yuta aaloca: ‘Nihimwiiphe, naatumiherye achu ala o Isimayeli.’ Mwawiihiiha, yaahaatumiherya alipa a maroca yaawo yaakele o Yikuputu nave eliviwa ni ikopo 20 sa mivira.

Vanonto, asinna a Yosefe yaakuxa yoowara awe enaaniha nnikhami na epuri nave yaahaarumihela atiithi aya ni michaka iha: ‘Mvarerye phaama ni moone yaari ya mwaninyu.’ Yakopo aahuupuwela wi Yosefe aakhuuriwe ti enama yawoopiha. Aatepa othanana. Haavo aawenrye ommaaliha.

Aaphiyaleiye o Yikuputu, Yosefe aatumihiwa ntoko kapuro wa mwene nsina nawe Potifare. Nto Yehova haamucuwanle Yosefe. Potifare aahoona wi Yosefe aanalapa phaama ni aari oororomeleya. Ohoolo waya, Yosefe aavahiwa owerya wa olamulela ichu soothene sa Potifare.

Potifare mwaariye aahoona wi Yosefe aari ooreera ni a ikuru. Nihiku nnihiku, muthiyana owo aanamveka wi ekone vamoha. Tiheeni Yosefe enreiye? Aanakhooca ariki: ‘Apwiyaka hakihiihenrye echu wohiyaani nyuwaano ntakhara nyuwaano mwa amwaaraya. Nkinawerya weera yoonanara ni omuchekela Muluku!’

Ekwaha emoha, mwaara a Potifare aamukhinyeererya Yosefe wi akoneno. Aaphara yoowara awe, nyenya Yosefe aachawa. Vaavaa Potifare aaphiyaleiye owaani, mwaariye aahootha wi Yosefe aachuna omukoniha. Potifare aatepa onyeenyeya, nave aamukeriha Yosefe mukalaposo. Nyenya Yehova aari ni Yosefe.

Vaavaa Yosefe aareiye mukalaposo, mwene o Yikuputu Farawo aakhalano yooloha yaahiwenrye otaphuleliwa ni muchu mukina. Mulapeli mmoha aamuleela Farawo wi Yosefe ahaala owerya otaphulela yooloha awe. Farawo aamwiichaniha mwawaakuveya Yosefe.

Farawo aaloca: ‘Kohiiwa wi weyaano onnawerya otaphulela sooloha, vano okileele yootaphulela ya yooloha aka.’ Yosefe aamwaakhula Farawo: ‘Miyakha mithanu namiili sa muhoolo o Yikuputu woothene onamukhalawo oreela. Ohoolo waya inamurwawo miyakha mithanu namiili sa etala. Wa nthowa na yeeyo mmuthanle muchu amiruku ni mumvahe otokweene wa o Yikuputu.’ Farawo aahaakhula: ‘Weyaano ene onamukhala mweeciha a omwene aka. Kinnoovaha omwene wa o Yikuputu.’ Tiheeni yaamweerinhe Yosefe otaphulela yooloha ya Farawo? Yehova taamukhavihenrye.

Mu elukuluku yeeyo ya miyakha mithanu namiili, owo aakhala mulipa ookhapelela soolya. Ohoolo waya etala yaatepa, hiiha ntoko Yosefe aalonceiye. Achu oothene yaachuna yoolya yaanaya wa Yosefe wi ethume. Atiithi awe Yakopo yaahiiwa wi yookhalawo yoolya o Yikuputu, awo yaahaaruma anaaya khumi wi eyewo yakule yoolya.

Anamwane a Yakopo yaaya wa Yosefe, mwawaakuveya owo aahaasuwela awo. Nyenya awo hiyaamusuwenle Yosefe. Awo yaamukokhorela hiihaa ntoko owo alonheiye ari mwaana. Woona wi Yosefe aanakhwela osuwela yaakhanleno mukhalelo yoole woonanara murima, owo aloca wa yaawo: ‘Nyuwo mwa alipa oohoca, nyuwo mwaarweenle ohocela mpuro woohilipihiwa wa elapo ahu.’ Awo yaahaakhula: ‘Naari tahi yeeyo. Hiyaano naari khumi napiili mukhaanixa ohanle ni atiithinya nave mukina hakhanle.’ Yosefe ahi: ‘Mmuruuhe munninyu mukhaani, hiiha nnamoona mwaalocaka yeeparipari.’ Awo yaarowa owannyaya waaleela atiithi aya.

Vaavaa amusi a Yakopo yaachunaaya yoolya wanawiili, owo ahaaruma anaawe okookela o Yikuputu, elukuluku yeeyo awo yaamukuxa Peniyamini munnaya mukhaani. Akhwelaka oweererya akhwaawe, Yosefe aamukuha kanika awe a mivira mmurupa wa Peniyamini nave awootherya wi aahiiya. Vaavaa alapeli a Yosefe yaamphwannyaaya kanika a mivira mmurupa, anna a Peniyamini yaatepa othanana. Awo yaaveka wi Yosefe awoonihe ekoi ohiya Peniyamini.

Vanonto Yosefe aasuwela wi asinnawe yaahiya mukhalelo aya wa khalai. Moohilekela Yosefe aapacerya winla nave ahi: ‘Ti yoomi Yosefe! Atiithi aka nivano aakhala?’ Annawe yaahaleeliheya vancipale, owo aalocano: ‘Nto vano muhiiniwe murima nave muhikhale awuukhuwa mmurimani mwanyu wa nthowa na okikuliha. Ti Muluku okiruuhale wenno nyuwaano muhaakumve, wi kiwerye ovuluxa okumi anyu. Mukookelewo wa atiithi aka nave mwaaruuhe wa miyo.’

Awo yaarowa waaleela atiithi aya michaka ihe yaaruuhalaaya o Yikuputu. Ivinre iyaakha sincipale, Yosefe ni atiithi awe yakumana wanaawiili.