Mose aamaliha iyaakha 40 akhalaka o Miriya. Aathela nave aakhalano anamwane. Nihiku nimoha akukhulaka ipucepuche sawe waacamela Mwaako Sinai, aahoona echu yootikhiniha. Aahoona mwiri ovarelaka, nyenya hiwaasya ni mooro! Vaavaa Mose aacamenleiye wi oone phaama, aahiiwa nsu nlocaka: ‘Mose, weemele! Orule isapatho ntakhara nipuro oryaawevo ti nooreelihiwa.’ Ti Yehova yoowo aalonce moorweela wa munkeelo.

Mose aapacerya woova nave aakhuneela ethoi awe. Nsu nlo naaloca tho: ‘Kohoona ekoi ya achu a nloko na Isarayeli. Kirwenle owoopola yaawo wookapuroni wa achu o Yikuputu, wi kaakerihe elapo yooreera. Vano kinnooruma wi wavihewo o Yikuputu nloko naka.’ Ela yaamutikhiniha Mose!

Mose aakoha: ‘Achu yakikoha wi taani okirumme, waakhula keere hai?’ Muluku aamwaakhula: ‘Waaleele wi Yehova Muluku a Aparahamu, Muluku a Isaki ni Muluku a Yakopo tokirumme wa nyuwo.’ Mose aaloca: ‘Achu a Isarayeli hekeemererya, hekiwiriyana.’ Yehova aamuroromeliha Mose wi aahaala omukhaviherya. Aamuruma Mose wi arihele vachayani ekopo awe. Ekopo eyo yaathatuwa ekhala enowa! Vaavaa Mose aaphanreiye mwiila wa enowa eyo yaakookela okhala ekopo. Vanonto Yehova aaloca: ‘Hiiha anamweemererya wi miyaano kohiisooneiha wa weyaano.’

Mose ahi: ‘Miyaano nkinasuwela oloca phaama.’ Yehova aamuroromeliha ariki: ‘Kinamoohusiha yeeyo onayaawe oloca, nave kinammuruma munna aa Aroni wi ookhaviheryeke.’ Asuwelaka wi Yehova aari ni yoowo, Mose aahaakuxa amwaariye ni anaawe nave aakookela o Yikuputu.

Aisarayeli yaanalapa mwakuru ntoko akapuro. Yehova aamuruma Mose ni Aroni wi yamuleele Farawo michaka iha: ‘Waahiye achu aka ecimule wi yakichapele.’ Farawo aawaakhula ariki: ‘Apwiya awo taani vawi kaawiriyane nave kaahiye achu Aisarayeli ecimule?’ Farawo aanaalapiha mwakuru nave Yehova aalakelela omulaka Farawo. Onnasuwela yeeren’ye hai? Aapaka Ipahu Khumi Oyikuputu. Yehova aaloca ni Mose: ‘Mwene ootepa wuuma murima. Opeherye wooxixelo ene wakumane ni yoowo omuhiceni Nilu. Oloce ni yoowo mwa nsina naka oriki: Ni ekopo kipharenlaaka mmatani, kinammana maahi a muhice Nilu, nave maahi ala anamuthatuwa nikhami.’ Mose aamwiiwelela Yehova nave aaya wa Farawo. Farawo aanamoona Aroni amanaka maahi a muhice Nilu ni ekopo awe nave maahi yaathatuwa nikhami. Muhice waananara, ihopa saakhwa, nave maahi awo hiyaawuriwa. Naamwi hiiha, Farawo aakhooca waahiya Aisarayeli.

Evinre mahiku mathanu nameeli, Yehova aamuruma Mose oya wa Farawo wi amuleele michaka iha: ‘Weyaano wakhooca, miyaano kinamusareiha elapo yoothene ni anaphulu.’ Aroni aahookola ekopo awe nave anaphulu yaasareya elapo yoothene. Achu yaanaaphwanya anaphulu mpa, vaniphaani ni mparathoni. Anaphulu yaasareya voothevene! Farawo aamuleela Mose wi amveke Yehova wi amalihe epahu ya anaphulu aroromelihaka wi aahaala waahiya Aisarayeli. Vano Yehova aamaaliha epahu nave Oyikuputu woothewene waasareyawo anaphulu ookhweene. Elapo yaapacerya wunkha. Nyenya yaamanlaaya Farawo aakhooca waahiya achu.

Yehova aaloca ni Mose ariki: ‘Omurume Aroni wi atheteye ekopo awe ni amane echaya. Nchupi na echaya nnamuthatuwa atupusi Oyikuputu woothene.’ Moohilekela atupusi yaasareya voothevene. Anamiruku a Farawo yaaloca eriki: ‘Ola owerya wa Muluku.’ Nyenya Farawo aakhooca waahiya Aisarayeli.