Mose ni Aroni yaaya wa Farawo omuleela michaka sa Muluku: ‘Wakhooca waahiya achu aka, kinahaala oruuha epahu ya makeemwe.’ Makeemwe yaasareya ipa soothene sa Ayikuputu, achu ooreela ni oohaawa. Nyenya elapo ya Koseni weiwo Aisarayeli yaakhalaayawo, hiyaariwo makeemwe. Opacerya epahu yaneexexe oya ohoolo, pahiru Ayikuputu ti yaahooxeya. Farawo aaloca ariki: ‘Omveke Yehova wi amalihe epahu yeela. Weerano, kinamwaarowiha achu aa.’ Nyenya vaavaa Yehova aamalinheiye epahu, Farawo aahuumiha murima awe. Apwanne Farawo aahaala otoroka muupuwelo awe?

Yehova aaloca: ‘Farawo akhooca waahiya achu aka, axinama anamwiiceliwaka ophiyerya okhwa.’ Mmeeloni mwaya axinama yaapacerya okhwa. Nto axinama a Aisarayeli hiyaakhwile. Nlelo Farawo aahuumiha murima, nave haacharunwe.

Voocharela Yehova aamuleela Mose okookela wa Farawo wi avonyerye ecuurwa osulu. Ecuurwa yaathatuwa nchupi nave nchupi nlo naasareya mapuro oothene a Ayikuputu. Nchupi nlo naahaaruuhela ithuku sawiicela achu ni axinama oothene o Yikuputu. Naamwi hiiha, Farawo aakhooca waarowiha Aisarayeli.

Yehova aamuruma tho Mose okookela wa Farawo wi amuleele michaka: ‘Weyaano onnakhoma nave honachuna waahiya achu aka wi ecimule! Vano omeelo, kinamuyeeha maralala oowali.’ Mmeeloni mwaya, Yehova aarumiha maralala, etari ni mooro. Awo yaari maralala matokweene yaahintoko omora. Miri ni soolya soothene sa Ayikuputu saapahuwa. Farawo aaloca: ‘Mwaaveke Apwiya wi emalihe etari ni maralala. Miyaano vano kinamoohiyaani mucimule.’ Vaavaa maralala yaamanlaaya, vahilekenle Farawo aahuumiha murima awe.

Mose aaloca: ‘Misope inahaala okhuura yoolya yoothene yaahanle elukuluku ya maralala.’ Misope mincipale saakhuura yoolya yoothene yaahanle mmacani ni mmiri. Farawo tho aaveka ariki: ‘Mumvekele Muluku anyu wi akakhe epahu ela.’ Naamwi Yehova amalinhe misope, Farawo aatitelela wuuma murima.

Yehova aamuleela Mose ariki: ‘Wookolele wirimu ntata naa.’ Moohilekela yaaphiya epiiphi. Achu o Yikuputu hiyaawerya woonana naari woona echu mmahiku mararu. Nyenya Aisarayeli hiyaari mu epiiphi yeeyo.

Farawo aaloca wa Mose: ‘Haweni, nto muhiye wenno ipucepuche sanyu ni imope sanyu.’ Mose aahaakhula: ‘Yakhala yeeyo, weyaano toni onivahe inama soohelelano mukucho wa Apwiya Muluku ahu.’ Farawo aatepa onyeenyeya nave aakhuwela: ‘Pwahavo vaava! Wiikasopeke wi kihiwooneru! Nihiku oneeraawe okooke, onamukhwa!’

Mose aloca ni Farawo wi harwaru amoona. Nyenya ahaakumve opwahavo, owo aloca ni Farawo: ‘Ohiyu eriyari anamukhwa anamwane oopacerya oyariwa o Yikuputu, oopacerya mwaana a Mwene ophiyerya mwaana oopacerya a kapuro.’

Yehova aloca ni Aisarayeli wi epake yoolya yavameekhaaya. Owo aaloca wi: ‘Mwiiphe epucepuche ya muyakha mmoha naari epuri nave nikhami nene muheleno eneneeryo isereemu sa masele anyu. Nave mukhuureke yeeyo muri awiireheryeene mmanke iyuunu muwanre isapatu nave mumpharenle cooco mmatani. Ohiyu yoowo miyaano kinanwoopola.’ Onnaanyiherya mukhalelo taani wa ohakalala yaaryaayano Aisarayeli?

Ohiyu yoole munkeelo a Yehova aaheecelela ipa soothene sa o Yikuputu. Mu ipa saahaarino eneneeryo ya nikhami anamwane oopacerya oyariwa yaanakhwa. Nyenya munkeelo aanahiya ipa seiyo saarino eneneeryo ya nikhami. Yaakhwa anamwane oopacerya oyariwa mu ichoko soothene sa Ayikuputu. Nyenya haavo muchu a Isarayeli aakhwile.

Vaavaa Farawo oonneiye wi mwanawe ookhwa, owo haawenrye ovilelano. Mwawaakuveya owo aaloca ni Mose vamoha ni Aroni ariki: ‘Mpwahevo veeri va achu aka. Haweni mwaweepese Apwiya anyu. Mukuse muhuwo anyu ni ipucepuche sanyu muroweke!’

Ohiyu ni masuwa, Aisarayeli yaacimulawo o Yikuputu, ooreheryeya moorweela wa imusi ni mahimo. Alopwanaru yaari awaakhwana 600.000 waahiya athiyana ni anamwane. Navetho yaakhalawo achu yaachanre wi yamulapele Yehova. Ovinya vaavaa awo yaakhala awoopowa!

Wi eweryeke wuupuwela wi Yehova taawooponle, awo yaalamuleliwa opaka yoolya yavameekhaaya ekwaha emoha va muyakha. Yoolya eyo yiichaniwa Paskha.