Yehova aamwiicana Mose ariki: ‘Owele vamwaako va kiryaakavo. Waphiya osulu nno miyaano kinamonnya mapawa a maluku kirempaakavo malamulo.’ Mose aawela omwaako nave aakhala weiwo mahiku 40. Ari weiwo, Yehova aarepa Malamulo Khumi mmapawa meeli a maluku nave aamunnya Mose.

Moovira wa elukuluku, Aisarayeli yaahuupuwela wi Mose aanalekela okooka. Yaaloca ni Aroni: ‘Onipakele muluku wi aneeciheke.’ Aroni aawaakhula: ‘Mwaathukumanye amuneela a ewooro.’ Owo aahaatothowiha amuneela awo nave apaka yoophwaniherya ya mwaasana amope. Vano achu yaaloca eriki: ‘Ti yoola Muluku ahu onivihale Oyikuputu!’ Yaanamulapela mwaasana amope ni omuchapela. Apwanne yaari yoonanara? Aai, ntakhara achu yaapaka nlakano wi yaahaala omulapelaka pahiru Yehova. Nyenya vano yaananariha nlakano.

Yehova aahoona echu yeereya, aamuleela Mose ariki: ‘Okhuruwe ni waakuva, ntakhara achu aa aahiya ephiro kaarummaka ochara. Ahiipakale eruku ya mwaasana amope.’ Mose aakhuruwa, arino mapawa meeli.

Mose aacamelaka omixakalani, aanawiiwa achu yiipaka. Aawoona yiinaka ni emucicimihaka mwaasana amope. Mose aatepa onyeenyeya. Aarihela vachayani mapawa meeli, nave yaaphweeya. Moohilekela aamunyaanya mwaasana amope. Nave aamukoha Aroni: ‘Nthowa taani waachekinhaawe vatokovene achu ala?’ Aroni aamwaakhula: ‘Ohinyeenyeye yooweene woosuwela mukhalelo wa achu ala. Yaanakiveka muluku vano miyaano kaatothowiha ewooro va mooro akhala mwaasana amope ola.’ Aroni haaphwanela weerano yeeyo. Mose aawela omwaako wi amveke Yehova nikhurumuwelo.

Yehova aahaakhurumuwela yaale yaachuna omwiiwelela. Weyaano onnoona ntakhara heeni waari woochuneya Aisarayeli ochara ohoolela wa Mose?

Vaavaa Mose aareiye o Mwaako Sinai, Yehova aamuleela wi apake muxakala mummo Aisarayeli yaahaalaaya omulapakamo Yehova. Awo yaahaala oteexaka muxakala owo vaavaa yaapakaaya mukwaha.

Yehova aaloca: ‘Waaleela achu eveleele ichu aryaayano wi opakiwe muxakala.’ Aisarayeli yaaveleela ewooro, eparata, muthipo ni maluku asisapo. Awo tho yaaveleela manyapara a axinama ni ichu ikina. Yaatepa ovaha ichu sincipale ophiyerya wi Mose aloca ariki: ‘Sookwana! Mmaale oruuha ichu.’

Achu ancipale, alopwana ni athiyana yaakhaviherya otekiwa wa muxakala owo. Yehova aahaavaha miruku sa oteka. Akina yaanapacha, ovathaanya naari osona. Akina yaanarehererya maluku, olapa ni ewooro naari othala miri.

Achu yaateka muxakala hiiha ntoko Yehova aarummeiye. Yaahelavo ekuwo yooreera wi ekawanye muxakala mmakupa meeli: Nipuro Naweela ni Nipuro Naweelaxa. Mu Nipuro Naweelaxa yaakhalamo ekaaxa ya nlakano yeeyo yaari ya mwiri ni ewooro. Mu Nipuro Naweela yaakhalamo makeesi oohuruweliwa ni ewooro, yaakhalamo tho meesa ni altare a mikucho soopahiwa. Vaate yaakhalavo eyope ya muthipo ni altare. Ekaaxa ya nlakano yaanawuupuxerya Aisarayeli nlakano nenlo yaapankaaya ni Yehova. Woosuwela nlakano tiheeni? Enaahiwa ororomeliha weera echu.

Yehova aamuthanla Aroni ni anamwane awe aasilopwana wi erumeeleke mmuxakala ntoko anamukucho. Muteko aya waari orehererya nipuro nenle ni oveleela mikucho wa Yehova. Muchu eemereryiwa ovolowa mu Nipuro Naweelaxa aari Aroni pahiru yoowo aari mulipa eephepa. Owo avolowa ekwaha emoha va eyaakha wi aveleele mukucho wa oleveleliwa soocheka sawe, sa emusi awe ni soocheka sa Aisarayeli oothene.

Aisarayeli yaakwaaxa oteka muxakala evinre eyaakha emoha opacerya vaavale yaakhummaaya o Yikuputu. Vano awo yaanamulapa Yehova mmuxakalani mummo.

Muxakala waasareya waarya wa Yehova nave vasulu vaya naakhuruwelavo neeku. Vaavaa neeku naakhalaaya va muxakala, Aisarayeli yaanatitela okhala. Nyenya vaavaa neeku napwahaayavo, awo yaanakuxa muxakala nave yaanapaka mukwaha echaraka neeku nenlo.