Vaavaa Aisarayeli yaacimunlaaya o Mwaako Sinai, yaaheeca mu ntakhwa na Parani eyaaka o Katesi. Eri weiwo Yehova aamuleela Mose: ‘Waarume achu wi yahocele elapo ya Kanani kinayaaka waavaha achu a Isarayeli.’ Mwawiihiiha Mose aahaathanla alopwana 12 nave aaloca ni yaawo: ‘Mvolowe mweelapo, mvarerye phaama mukuma yoowo. Nwoone achu awo yaari awuupa, yance naari yaari vakhaani. Mvarerye elapo eyo yaari yooreera naari yoonanara, achu yaakhalaka mu ipooma soolipihiwa naari mmixakalani.’ Anamahocela 12 ophitaanyerya Yosuwa ni Kalepi yaacimula eyaaka o Kanani.

Yaavinraaya mahiku 40, anamahocela yaakooka epharenle sawiima sa elapo eyo. Awo yaaloca: ‘Ti elapo osaren’yewo saphaama soothene, nto achu amanke weiwo tawuupa ni a ikuru, ipooma saya ti sawinnuwa ni soolipihiwa.’ Nto Kalepi aahi: ‘Haya ncimule! Nakuxe ilapo seiyo, hiyaano chiri nnamukuxa!’ Woosuwela ntakhara heeni Kalepi aaloca yeela? Nthowa nawi owo vamoha ni Yosuwa yaanamuroromela Yehova. Nyenya anamahocela akina yaaloca: ‘Hinnawerya owana ni yaawo tawuupa onipwaha hiyaano! Achu a weiwo toorakama. Nave vamiithoni vaya naari ntoko misope.’

Aisarayeli yaapacerya woova. Yaapacerya oceenya ni oloca: ‘Nimuthanle mutokweene mukina ni nikookele o Yikuputu.’ Yosuwa ni Kalepi yaahi: ‘Muhaarukunuwele Apwiya Muluku, muhiwooveke achu a elapo eyo. Apwiya ari ni hiyaano.’ Nyenya Aisarayeli hiyawiriyanne. Awo yaanachuna omwiipha Yosuwa ni Kalepi!

Tiheeni Yehova enreiye? Owo aahi wa Mose: ‘Naamwi keenre ichu sincipale, Aisarayeli hanakiiwelela. Awo anamukhala mutakhwani mu iyaakha 40 nave anamukhwa mwemmo. Pahiru anamwane, Yosuwa ni Kalepi teni evolowe mu elapo kaaroromelinhaaka waavaha.’

Elukuluku yeeyo Aisarayeli yaaryaaya mutakhwani, Kora, Tatani ni Apiramu vamoha ni achu 250 yaammwareela Mose. Awo yaaloca ni yoowo: ‘Nyuwaano munnatepano. Achu oothene a nloko na Isarayeli taweela. Apwiya ari veeri vaya. Vano nthowa heeni munachunaanyu okhala atokweene a achu oothene a nloko na Apwiya?’ Yehova haasiveliwe. Yehova onne wi achu ale yaammwareela yene!

Mose aaloca wa Kora ni akhaviheryi awe ariki: ‘Weyaano Kora ni achu aa omeelo mukuse miyeyo musareihe makhala oovarela, nave ohoolo wa Apwiya muhelemo manlela a munyawa. Vano onamooneya yoole Apwiya amuthanlilaya.’

Mmeeloni mwaya, Kora vamoha ni alopwana 250 yaarwa okumana ni Mose mmuxakala wa muthukumano. Nave yaavaha mukucho ekhalaka ntoko yaari anamukucho. Yehova aamuleela Mose ni Aroni: ‘Mmwalane ni achu awo.’

Kora aavolowa mmuxakala wa muthukumano vamoha ni Mose, nyenya Tatani, Apiramu vamoha ni imusi saya yaakhooca ovolowa. Yehova aahaaleela Aisarayeli wi emwalane ni imusi sa Kora, Tatani ni Apiramu. Aisarayeli yaapwahavo mwawaakuveya. Tatani, Apiramu vamoha ni imusi saya yaakhumela vaate va mixakala saya. Mootutuxa echaya yaahuleya nave yaahaamirya! Waakhuruwa mooro ni omusuka Kora vamoha ni alopwana 250 yaawo yaari mmuxakala wa muthukumano.

Yehova aamuleela Mose: ‘Okuse ikopo sa atokweene oothene a nihimo. Okuse ikopo iho khumi napiili, nave va emoha ti emoha orepevo nsina na nihimo. Ekopo ya nihimo na Levi orepevo nsina na Aroni. Ikopo iho okuhe mmusakalani wa muthukumano, ekopo ya muchu kimuthanlilaaka, enamphuwela.’

Mmeeloni mwaya, Mose aaruuha ikopo soothene nave aawooniha asitokweene. Ekopo ya Aroni yaaphuwela ithutu. Mwawiihiiha, Yehova aahooniherya wi aamuthanla Aroni wi akhale namukucho.