Vaavaa anamahocela a Isarayeli yaakelaaya o Yeriko, yaaphiya vaate va muthiyana mmoha awiichaniwa Rahapi. Vaavaa mwene o Yeriko iiwaleiye, aahaarumiha anakhoco vaate wa Rahapi. Rahapi aawiipithiha anamahocela apiili opathoni wa empa nave aahaathoonyerya anakhoco ephiro ekina. Owo aahi wa anamahocela: ‘Koosuwela wi Apwiya ahoovahaani elapo ela. Vano mulipele mu nsina na Apwiya wi mukhale ooreera murima ni miyaano. Mukivahe eneneeryo yawi nyuwaano munahaala waavuluxa amusi aka.’

Anamahocela yaamwaakhula: ‘Nnamvuluxa okumi anyu. Okuhe mukoi woophilivila va exanela.’

Rahapi aahaakuruxa ni mukoi va exanela. Awo yaaya o mwaako nave yaahiipitha mahiku mararu nave ohoolo waya yaakookela wa Yosuwa. Voocharela Aisarayeli yaalapuwa Muhice Yortano nave yaahiireherya wi evolowe mu elapo. Yeriko yaari epooma yoopacerya okuxa. Yehova aahaaleela wi erukureryake epooma ekwaha emoha va nihiku ophiyerya mahiku mathanu nameeli. Nihiku nookuchula, awo yaarukurerya epooma ikwaha thanu napiili. Voocharela anamukucho yaahoopa mapeka aya, anakhoco yaakhuwela vatokovene. Ixiri sa epooma saapacerya wuuwa! Nyenya empa ya Rahapi yeeyo yaatekiwe va exiri hiyaakumunwe. Rahapi ni emusi awe yaavuluwa nthowa nawi yaanamuroromela Yehova.

Maloko oothene o Kanani yaahiiwa yeeyo yeeren’ye o Yeriko. Yaalakelela othukumana vamoha wi ewane ni Aisarayeli. Nyenya Akapawoni yaarino muupuwelo woohiyana. Awo yaawara ikuwo soothaala eya wa Yosuwa nave eloca: ‘Hiyaano nnarwa woorakamawo. Wa nthowa na ovuwa wa Apwiya Muluku anyu, nohiiwa soothene Apwiya yenraaya o Yikuputu ni Mowape. Vano ninnoovekaani wi mwaataane ni hiyaano.’

Yosuwa aaheemererya opaka murecele ni yaawo. Yaavinraaya mahiku mararu, aahoona wi yaakhuma vakhiviru vaya. Awo yaarweela o Kanani. Yosuwa aahaakoha Akapawoni: ‘Vano nyuwaano muniwokeleni?’ Awo yaahaakhula: ‘Vawiiwa ichu Apwiya yenraaya hiyaano naakhalano woova otokotoko. Ninnoovekaani wi muhiniphe.’ Yosuwa aakhapelela nlakano nave haawiphale.

Voohilekela, mamwene o Kanani ni anakhoco aya yaapacerya waahooxa Akapawoni. Yosuwa ni anakhoco awe yaaheeca ohiyu woothene wi yaavuluxe. Wooxixelo yaapacerya ekhoco. Akanani yaapacerya ochawa. Mmapuro oothene yaachawelaayamo, Yehova aanaamorihela maluku matokweene a maralala. Voocharela Yosuwa aamveka Yehova wi eemexe nsuwa. Ntakhara heeni Yosuwa aaveka yeela woona wi opacerya khalai nsuwa hinintonko weemela? Ti nthowa nawi aamuroromela Yehova. Nsuwa hinanenle nihiku noothene ophiyerya Aisarayeli yaavootha mamwene o Kanani ni anakhoco aya.