Yohuserya 17

Wii Mutchu Akhale Ni Nthamwene, Onatchuneya Okhale Nthamwene

Onthamwene wiithipenle mu osivela. Vavaa muniryanyu muhuseryekeru sa Yehova, munahaala omusivelaka vanchipale. Vavaa osivela wanyu wa wa Muluku oniryaya wachereryeyeke, otchuna wanyutho wa omurumela onahaala wachereryeyakatho. Eyo enahaala owerihani okhala ohuserya a Yesu Kristu. (Mateyu 28:19) Mu wiiphitanya ni etchoko yohakalala ya Anamona a Yehova, munanwerya okhala ni onthamwene ni Muluku wawiikhalelaru. Mano munaphwanela wera eheni?

Munaphwanela othonyerya wii munnamusivela Muluku mwa wiiwelela malamulo awe. “Ntakhara wowu tusivela wa Muluku, wi nikhapelele malamulo awe: nave malamulo awe hari óveliha.”—1 Yohane 5:3.

Thokororyani seiyo munahuseryanyu. Yesu ahithoriha mwaha yowo onaphwanaphwaniha yeyo. Mutchu owaraala aatenke empawe va mwala. Mutchu oolosowa aatenke empawe veehavani. Vavaa yoompaya etcheku etokwene, empa yotekiwa va mwala hiyuuwale, nyenya empa yotekiwa veehavani yahuuwa mwawoopiha. Yesu aalonche wii yawo aniiwa ohusiha wawe ni othokororya ari ntoko mutchu owaraala, yowo aatenke va mwala. Nyenya yawo aniiwa ohusiha wawe ni ohithokororya ari ntoko mutchu oolosowa yowo aatenke veehavani. Mano nyuwo munatchuna ophwana-phwana naani wa yala?—Mateyu 7:24-27.

Wiivelela. Wiivelela ontaphulela omphiyerya Yehova mu nivekelo ni omulela wii munatchuna wera yotchunawe okhala wokhala. Vawerano yotchuna ya Muluku, nyuwo munathonyerya wii mwa ohuserya a Yesu Kristu.—Mateyu 11:29.

Opatiso. “Patisiwani ni orapiha sotcheka sanyu mwa wiitchana nsina nawe.”—Saweriwa Tarummwa 22:16, NM.

Khalani oweiwasha mu wera yotchuna ya Muluku. “Etchu yeyo munirianyu mwere, pharani muteko morwela m’murimani, ntoko mwa Apwiya, tahi wa atchu ho[y]e.”—aKolose 3:23.