Yohuserya 18
Khalani Nthamwene A Muluku Mwawiikhalelaru!
Opaka onthamwene onatchuneya olipiherya; navetho wii onthamwenowo opwahiherye onatchuneyatho olipiherya. Olipiherya wanyu wa okhala ni opwahiherya okhala nthamwene a Muluku onahaala orelihiwa vanchipale. Yesu ahilocha wa yawo yamuroromela wii: “Munarwa-musuwelasha eparipari, nave eparipari enarwa-yotaphulani.” (Yohane 8:32) Mano eyo enataphulela eheni?
Nyuwo munnawerya ohakalala ni otaphuwa ovinyerya hihano vaava. Munnawerya okhala otaphuwa omahusiheryo owoka ni sawotha seiyo imwaramwashiwe ti Satana. Munnawerya okhala otaphuwa omukhalelo wokhala ni yohiwehererya yowo onaathananiha mamilyawu a atchu yawo ahinamusuwela Yehova. (aRoma 8:22) Asiinthamwene a Muluku ari otaphuwa mu “wova okhwa.”—aHebri 2:14, 15.
Nyuwo munanwerya ohakalala ni otaphuwa mu elapo yahihano ya Muluku. Ori wotikiniha mwawihai otaphuwa weiwo nyuwo muniiryanyu muhakalaleno muholo! Elapo ya Paradaiso enahaala okhala yohikhala ni ikhocho, irecha ni ipahu. Yohikhalano alipa ohawa ni atala. Yohikhalano alipa awuluvala ni okhwa. Wohikhalamo woova, ohooshiwa nari weereliwa mohikhala ekhaikhai. Biblia onnalocha sa Muluku wii: “Hamunalipa mata, nave munnakhwánya ikumi sothe sene hiho sinahawelelaya.”—Salmo 145:16.
Asiinthamwene a Muluku anahaala okhala ni okumi wawiikhalelaru. Okumi wohimala ti yamahala ya esisapo yowalamela ya Muluku wa yawo othene anavyavya okhala asiinthamwene awe. (aRoma 6:23) Nkuupuwelani yeyo okumi wohikhala ni makutchuwelo oniryaya otaphulele wa nyuwo!
Munahaala okhala ni elukuluku yopaka itchu sinchipale. Akhweya munahaala otchuna ohuserya wiipa matchipo ni kitare. Akhweya munahaala otchuna ohuserya opintara ikwatru nari okhala owaka ithapwa. Akhweya munahaala otchuna osuwela itchu volocha sa inama nari miri. Akhweya nari ti woweryeya otchuna wecha mukwaha ni osuwela ilapo sohiyana-hiyana ni atchu ohiyana-hiyana. Okhala ni okumi wohimala onahaala opakiha sothene seiyo okhala soweryeya wa nyuwo!
Munahaala okhala ni elukuluku yopaka onthamwene vanchipale. Okhala ni okumi wawiikhalelaru onahaala wopakihani wasuwela atchu akina anchipale yawo ari asiinthamwene a Muluku. Munahaala ophiyerya osuwela owerya waya wa osuwela ni mikhalelo saya saphama, navetho awo anahaala okhala asiinthamwene anyu. Nyuwo munahaala wasivelaka nave awo anahaala wosivelakani. (1 aKorinto 13:8) Okhala ni okumi wohimala onahaala wovahani elukuluku yawii mukhale nthamwene a othene velaponi yavathi! Nave yaphaamasha opwaha sothene: onthamwene anyu ni Yehova onahaala okhala wolipasha movira wa iyakha masana-masanene. Vanonto nyuwo mukhale nthamwene a Muluku mwawiikhalelaru!