Yohuserya 8

Okumi Wa Etchoko Yowo Onamuhakalaliha Muluku

Nipuro tani mulipa othela oriyeno vatchokoni? (1)

Timwawihai mulipa othela omphwaneliye omwechiha mwariye? (2)

Tisivi siri mirichi sa tithi? (3)

Muteko tani omphariye muthiyana otheliwa vatchokoni? (4)

Muluku ontchuna eheni wa asitithi ni anamwane? (5)

Tavini ari makhalelo a Biblia volocha sa omwalamwala ni omwalana? (6, 7)

1. Biblia onlocha wii mulipa othela ori muru, akhweya ooholela, a etchoko. (1 Akorinto 11:3) Mulipa othela onaphwanela akhale ni mwariye mmoha pahi. Awo eli anaphwanela okhala othelana phama mopharihana ni nlamulo.—1 Timoteo 3:2; Tito 3:1.

2. Mulopwana onaphwanela amusiveleke mwariye ntoko mummo onaisiveliye owo mekheiye. Onaphwanela omwechihaka ntoko mummo Yesu onwechiheriye ohuseryawe. (Aefeso 5:25, 28, 29) Hanaphwanela ommana mwariye nari ohimwechiha phama. Nnya, onaphwanela onvaha mahala ni nchichimiho.—Akolose 3:19; 1 Petro 3:7.

3. Tithi onaphwanela olapaka mwakuru wii akhaviheryeke etchoko. Onnaphwanela ovaha yolya, yowara ni wokhalavo wa amwariye ni anamwene. Tithi onnaphwanela othokororya sothowa sa omunepani sa etchoko. (1 Timoteo 5:8) Owo tonaholela mu okhaviherya etchoko ohuserya etchu volocha sa Muluku ni sokhwela Sawe.—Detronomiu 6:4-9; Aefeso 6:4.

4. Muthiyana onaphwanela okhala okhaviherya aphama wa iyawe. (Genesis 2:18) Owo onnaphwanela omukhaviherya iyawe mu wahusiha anamwane. (Proverpio 1:8) Yehova ontchuna wii muthiyana otheliwa apwatcheke etchokoawe mwa makhalelo osivela. (Proverpio 31:10, 15, 26, 27; Tito 2:4, 5) Owo onaphwanela ovaha nchichimiho na wishela wa iyawe.—Aefeso 5:22, 23, 33.

5. Muluku ontchuna wii anamwane ewiweleleke asitithiaya. (Aefeso 6:1-3) Onnaweheryeryiwa wii asitithi yahusihe ni waleliha anamwane. Asitithi annaphwanela omaliha elukuluku ni anaya emuhuseryaka Biblia ni yawo, epwatchaka sothowa saya sa omunepani ni samupuweloaya. (Detronomiu 11:18, 19; Proverpio 22:6, 15) Asitithi hanaphwanela walaka anamwanaya mmakhalelo owali nari onanara.—Akolose 3:21.

6. Vava alipa othelana aryayano sokachamiha sa ohiwanana mukina ni mukhwawe, anaphwanela wavya ovarihela muteko miruku sa Biblia. Biblia onnanchenyerya woniherya osivela ni okhurumuwela. (Akolose 3:12-14) Masu a Muluku hanemeryerya omwalamwala okhala ntoko makhalelo aphama a othoriha sokachamiha sikhani. Nnya vakinavo muthiyana onnona okhala waphama omuhiya iyawe wakhala wii (1) ola mochiya maru onnakhocha ovaha yolya etchoko awe, (2) wakhala wii owo tohosha, yowo onopopiha okumi wa muthiyanowo, nari (3) ovanyiha wawe tiwotepasha ni onamukhochiha omulapela Yehova.—1 Akorinto 7:12, 13.

7. Alipa othelana annaphwanela okhala ororomelana mukina ni mukhwawe. Mararuwo ari yotcheka wa Muluku navetho wa mukhwinyu a muthelani. (Ahebri 13:4) Okonihana ni mutchu ohiri mukhwinyu a muthelani teri etchu emoha yeyo Biblia onemeryeriye omwalana niwitho muthele. (Mateyu 19:6-9; Aroma 7:2, 3) Yehova onnamunanara atchu omwalana ohikhanlevo nthowa norwela mbibliani ni othelanatho ni mutchu mukina.—Malakiya 2:14-16.

[Iruku va epaaxina 16, 17]

Muluku onnaweheryerya wa asitithi yahusiheke anamwanaya ni waleliha

[Eruku va epaaxina 17]

Tithi osivela onnavakulela etchokoawe omwilini ni somunepani