EPIIPILIYOTEKA ya Watchtower
EPIIPILIYOTEKA
ya Watchtower
Elomwe
  • PIIPILIYA
  • SOOLALEERYIWA
  • MITHUKUMANO
  • kp ipaax. 20-21
  • Okhala Waya Oowiriyana Waavuluxa Ikumi Saya

Henaphwanyeya exilema mu nikupa nenla.

Munikhurumuwele, yookhala ehesen'ye nichunaka owoonihaani exilema ela.

  • Okhala Waya Oowiriyana Waavuluxa Ikumi Saya
  • Khalani Oolipelela!
  • Miyaha Soophwanaphwana
  • Onamoona Woomaaleleya Onnakhwaniherya Yooloherya Yeeparipari
    Mulipeleli Alaleyaka Omwene wa Yehova (A Vanlakani)—2018
Khalani Oolipelela!
kp ipaax. 20-21

Okhala Waya Oowiriyana Waavuluxa Ikumi Saya

YESU KIRISTU aahilopola vooloca sa makuchuwelo a mathoriheryo a ichu a aYuuta, yaarino mathipelo mu empa ya Muluku o Yerusalemu. Owo haalonce nihiku nene ela yahaalaaya weereya. Nyenya, owo aaloca ichu sahaala weereya ophiyerya otoloxiwa. Yesu aahaaleela oohuserya awe wi ekhale oolipelela nave ekhume mmapuro awoopiha awo.

Yesu aaloca: “Munirianyu mone Yerusalemu arukuryeryiwe ti miloko ya alipa-ekhocho, suwelashani vavo wi otoloshiwa waya wohachamela.” Owo tho aaloca: “Mwarwa-mona yotakhala yotolosha elapo . . . yemenle mu nipuroni nawéla . . . yawo ari m’Yudeya etchawele o miakoni.” Yesu aahaalipiha tho oohuserya awe wi ehikookele muculi wi ekuxe muhakhu aya. Waachuneya ochawa mwawaakuva wi evuluxe ikumi saya.—Luka 21:20, 21; Mateyu 24:15, 16.

Wi amalihe ekhoco yoolekela omala eyo, Céstio Galo aahoolela muloko wa asurutatu aRoma moovanyihana ni Yerusalemu mu eyaakha ya 66 Elukuluku ya Kiristu (E.K.) Owo aaphiyerya ovolowa mmucecheni mmo nave aarukurerya empa ya Muluku. Muceche waasareya mawoowo. Oothene yaale yaari oolipelela yaanasuwela wi epahu yaari vakhiviru. Mano yaaya ochawa mwawiihayi? Mootikiniha, Céstio Galo aahaakuxa asurutatu awe akookela muculi. AYuuta oomwaryeya moovanyihana ni aRoma yaawiikara awo. Vanonto yaari elukuluku ya ochawa mu Yerusalemu ni mu Yudeya moothemwene!

Mu eyaakha yoocharela aya, asurutatu aRoma yaakooka ehooleliwe ti Vespasiano ni mwanawe Tito. Elapo yoothene yaavolowa mu ekhoco. Mu eyaakha ya 70 E.K., aRoma yaamurukuryerya Yerusalemu mukhuryakhurya. Iphiro soothene mmucecheni saachiyeleliwa. (Luka 19:43, 44) Makhuuru a achu oohiyana muupuwelo mpuwa mwa muceche yaaniiphana mukina ni mukhwaawe. Achu yaahalenle yaahiphiwa ni aRoma nari okerihiwa okapuro. Muceche ni empa ya Muluku saatoloxiwa khuluwi. Moovarihana ni Josefo, mulipa a miyaha a iyaakha nsana noopacerya, yaahooxiwa nave yaakhwa aYuuta ancipale opwaha milyawu mmoha. Empa eyo okhala wookhala hepakiwe tho.

Waakhanle wi aKiristu yaahipwahiherya okhala mu Yerusalemu mu eyaakha ya 70 E.K., awo yahaala wiiphiwa nari okerihiwa okapuro vamoha ni muchu ori oothene aari mmucecheni mmo. Vanonto, alipa oorepa miyaha a elukuluku yakhalai, aaloca wi aKiristu yaahiiwelela soolopola sa Muluku nave yaakhuma—mu Yerusalemu ni mu Yudeya moothemwene—echawela mmiyaakoni onakhuma nsuwa, muhice wa Yordano. Akina yaachawenle oPeela, eporoviinsia ya Periya. Awo yaakhuma mu Yudeya nave hiyaakoonke. Wiiwelela moothokororya soolopola sa Yesu waavuluxa ikumi saya.

Mano Nyuwo Munnawiriyana Moothokororya Soolopola sa Mathipelo Oororomeleya?

Vaculi va owiriyana soolopola sincipale sooheraneya achu ancipale hanathokororya soolopola soothene. Nyenya, owiriyana soolopola poti ovuluxa okumi anyu.

Eyaakha ya 1975 oChina, saahilociwa soolopola wi ochikinyeya wa elapo waahaala weereya. Ahooleli yaahaalamulela achu. Nave achu awo yaawiriyana. Achu masana masaneene yaahivuluwa.

Mweeri wa Abril Eyaakha ya 1991 oFilipina, achu yaakhala vakhiviru ni Mwaako wa Pinatubo yaaloca wi mwiixi ni ecuurwa yooviha saakhuma vamwaakoni. Vaculi va ovareryiwa miyeeri miili yaweereya eyo, Philippine Institute of Volcanology and Seismology (Anahuserya Ophuleya wa Miyaako ni Ochikinyeya wa Elapo), yaalopola waacamela wa epahu yawoopiha eyo. Moohilekela, vakhiviru khiviru achu 35,000 yaakumihiwa mmapuro yaale. Wooxixelo nihiku na 15 mweeri wa Junho ophuleya otokotoko wahikumiha mabilyawu mancipale a itonelaata sa matope ooviha, evonyerya osulu ni mmapuro oothene a epooma eyo. Owiriyana moothokororya waavuluxa ikumi masana mancipale.

Piipiliya onnalopola ntakhara makuchuwelo a mathoriheryo a ichu amutano. Olelo, hiyaano nnakhala mmahiku ookuchula. Vawoona wi makuchuwelo annaacamela, nyuwo munnapwahiherya okhala oolipelela? Nyuwo munneera echu wi mukhume mu nipuro nawoopiha? Mano mwawaakuveya, nyuwo munnaalopola akina wi yeere echu emohamoha?

Owiriyana moothokororya soolopola, waavuluxa ikumi sa achu ancipale vaavaa Mwaako wa Pinatubo waamwanryaaya ecuurwa yooviha

[Eruku va epaaxina 20]

Owiriyana moothokororya soolopola, waavuluxa ikumi sa achu ancipale vaavaa Mwaako wa Pinatubo waamwanryaaya ecuurwa yooviha

[Eruku va epaaxina 21]

AKiristu yaale yaawiriyanne soolopola sa Yesu yaakhapeleliwa vaavaa Yerusalemu aatoloxiweiye mu eyaakha ya 70 E.K.

    Soolaleeryiwa sa Lomwe (1995-2024)
    Okhumavo
    Ovolowa
    • Elomwe
    • Ovaha
    • Orehererya
    • Copyright © 2025 Watch Tower Bible and Tract Society of Pennsylvania
    • Malakiheryo a Opharihela
    • Malakiheryo a Sookhuweya
    • Configurações de Privacidade
    • JW.ORG
    • Ovolowa
    Ovaha