4 Olevelela

OLEVELELA TIHEENI?

Olevelela onataphulela okakhela okhwipi ophuciwa vamoha ni wiicela yoowo onarweela wa ophuciwa. Olevelela honooniherya wi yoohesa eyo echu ekhaani naari wi hiyaavo yeeren’ye.

PIIPILIYA ONI: “Mukhale òvilela ni akhwinyu, nave mulevelelaneke wakhalavo nthowa ni mukhwinyu.”—Kolosi 3:13.

“Yoole onamusivela mukhweiye, hanateteiwa avareryaka soohesa sawe, nto onateteiwa ni wiilipixerya wawe okhala muchu aphaama.”—Aaron.

NTAKHARA HEENI TI YOOCHUNEYA?

Wakhala wi mookuha mathowa, munahaala onananariha ethoi anyu ni mmupuweloni—munahaalatho opahula othela wanyu.

“Nookhala nihiku aiyaka yaakivenkaaya nlevelelo wa echu yaakinananre. Waari woovila waalevelela. Ohoolo waya kaahaalevelela. Kookhalano ekeerelani nthowa na olekela olevelela ntakhara yaatannya makacamiho veechokoni.”—Julia.

ECHU YAWEERA

MWIISAALIKHELE

Ekwaha muneeraanyu musooseye nthowa na yeeyo oothelana anyu enreiye ni olonceiye, mwiikohe:

• ‘Apwanne kirimutepa okhalano maana?’

• ‘Apwanne yoohesa ela yohunnuwa chiryene ophiyerya wi kinachuna ovekiwa nlevelelo, naari wi kihithokororye?

MULOCE NI OOTHELANA ANYU

• Enaviravo elukuluku hai wi niwerye olevelelana?

• Tiheeni nnaphwanelaahu weera wi naakuveke olevelelana?

MWEERERYE ELA

• Mwakhala oonyeenyeya, muhimphwanyerye mathowa oothelana anyu.

• Mulevelele yoohesa ya oothelana anyu, muupuwelaka wi ninnahesa “othene hi va itchu sinchipale.”—Tiyako 3:2, Nlakano Nahihano.

“Onakhala wookhweya olevelelana wakhala wi oopiili noohesa, nto ovila wakhala wi muchu mmoha torino nthowa. Onachuneya wiiyeviha wi muchu alevelele.”—Kimberly.

PIIPILIYA ONI: “Akuvà watàna ni mwitxana-à oyaka omilatxuni.”—Mateu 5:25.