Liivuru Akhalai Yoowo Onanikhaviherya Mmahiku Ahu Yaala
Achu ancipale annamucicimiha Piipiliya nthowa nawi masu a Muluku. Nyenya Piipiliya onanleela ichu sincipale, ohiya pahiru onleela mukhalelo wa omulapela Muluku. Owo tamphurelo mu okumi ahu wa nihiku nnihiku.
Ntoko yootakiherya, moone yeeyo achu akina aloncaaya vooloca sa mukhalelo Piipiliya aakhavihenryeiye moorweela wa omwaalakhanya ni opharihela miruku sawe mu okumi aya.
“Ekumi aka ti yaphaama hiihaano. Ekumi ni muupuwelo aka wooreheryeya. Vano kinnahakalala.”—Fiona.
“Moorweela wa omuhuserya Piipiliya, koowerya ophwanya yoolakelela ni yootaphulela ya okumi.”—Gnitko.
“Ekumi aka yooreheryeya vancipale. Kinalapa vakhaani nave kinnakhalano elukuluku wi kikhale vamoha ni echoko aka.”—Andrew.
Sookhalavo sootakiherya sincipale ntoko seiha. Achu ancipale orukurerya elapo, anneemererya wi Piipiliya onnawerya ovaha ohoolela mu okumi wa nihiku nnihiku.
Hankooni nthokororye ti mwawiihai Piipiliya oneereiye aakhaviherye achu okhalano . . .
Mwiili waphaama
Muupuwelo waphaama
Waataana waphaama veechokoni ni asinthamwene
Opharihela phaama ikhorowa
Wunnuwa makupa oomunepani
Mwaha onacharela, onahaala wooniherya wi ohiya pahiru Piipiliya waakhaviherya achu omusuwela Muluku, owo tho onnakhaviherya mmikhalelo soohiyanahiyana.