Yohuserya 13

Wiisachiherya Ni Okhwiri Ti Soonanara

Satana onatchuna wii nyuwo mwiisachiheryeke. Anchipale annamuhela makeya wa makholwaaya akhwiye nari wa minepa wii yisaakihe mu yoonanara. Awo annerano ela nthowa na woova ikuru sa elapo ya minepa. Annawara anele nari ikhulula sawiisachiheryano. Annawurya “mureche” nari woocha mmwiilini nthowa nawii aniiwa owo wokhalano ikuru sawiisachiheryano. Akina annavitha mpa nari othipela vathi itchu seiyo awo anupuwelelaaya wii sokhalano ikuru sawaakiha. Akina annapharihela muteko “mureche” wawiisachiheryano nthowa nawi anroromela wii murechowo onahaala weeriha wii marochaya yecheke phama, elukuluku ya weehiwa oshikola weeche phama nari yatchunaka waakamela wii etchuniweke.

Yawaakiha yaphamasha yeyo nyuwo muryanyuno movanyihana ni Satana ti ompaka Yehova okhala nthamwene anyu. Yehova Muluku ni angelo awe takuru vanchipale ompwaha Satana ni masololo awe. (Yakobo 2:19; Yawupulula 12:9) Yehova ori otchunasha othonyerya ikuru sawe wa asiinthamwene awe—yawo tchiryene ari ororomeleya wa yowo.—2 Kronika 16:9.

Masu a Muluku anii: “Muhisachiheryeke.” Yehova onnavanyihanano wiisachiherya ni okhwiri, nthowa nawii merelo yawo annawerya omweeriha mutchu okhala a Satana, Musaserya.—Levitiko 19:26.