Yohuserya 4

Mummo Muniiryanyu Muhuseryele Molocha Sa Muluku

Munahaala ohuserya volocha sa Yehova mwa omwalakhanya Biblia. Elukuluku yakhalai, Muluku ahaathanla atchu akina wii etikitherye mwa orepa mupuwelelo Awe. Sorepa iho initchaniwa Biblia. Olelo, ninnahuserya volocha sa Muluku mwa omwalakhanya Biblia. Wokhala wii m’Bibliani orimo masu nari mitchaka sa Yehova, owotho onitchaniwa Masu a Muluku. Ninnaphwanela wemererya yeyo Biblia onlochiiye, nthowa nawii Yehova hanotha. “Ori wohiweryeya wii Muluku oothe.” (aHebri 6:18, Tradução do Novo Mundo, NM) M’masu a Muluku murimo eparipari.—Yohane 17:17.

Biblia ti emoha ya samahala yokhweleyasha yeyo Muluku onivanhiiye. Ori ntoko ekarata ya tithi osivela wa anamwane awe. Owo onnanlela volocha sa nlakano na Muluku na otatusha elapo yavathi okhala mapuro otikiniha wii ekhaliwekemo, paradaiso. Onnanthoriherya yeyo owo apankiiye khalai, yeyo onapakiiye hihano ni yeyo onahaaliye wera muholo wa anamwane awe ororomeleya. Onnanikhaviheryatho omaliha sokachamiha sahu ni okhala ohakalala.—2 Timoteo 3:16, 17.

Anamona a Yehova ti asiinthamwene a Muluku; awo anahaala wokhaviheryaani osuwela yeyo Biblia onahusihiiye. Nyuwo mwalelaru pahi wii munatchuna omuhuserya Biblia. Hanaveka etchu va yeyo. (Mateyu 10:8) Opwaha vavaa, munnaphwanela ophiya vamithukumanoni seekristu, hiiho ineriwano m’mapuro a mathamalelo awitchaniwa Ipa sa Omwene. Wakhala wii nyuwo munahaala ophiyaka vamithukumanoni seekristu, munahaala wachererya mwawakuveya omusuwela Muluku.

Nyuwo munahaala owerya ohuserya etchu volocha sa Muluku wa itchu hiiho owo opankiiye. Mwa yotakiherya, Biblia onii: “Muluku ahipachusha erimu ni elapo yavathi.” (Genesis 1:1) Vavaa Yehova apachunshiiye “erimu,” owo ahipaka Nsuwa. Mwawihihaa, mano eyo enanlela eheni volocha sa Yehova Muluku? Ennanlela wii owo okhalanosha ikuru. Mekhayaru owo tonawerya opaka etchu yakurusha ntoko Nsuwa. Ennanlelatho wii Yehova ta miruku, ti yosuwanyeya wii aanaphwanela okhala ni miruku wii apake Nsuwa, nenlo nnanivaha oviha ni omwaleela, navetho honamalaru.

Mapachusheryo a Yehova annathonyerya wii owo onnansivela. Nkuupuwelani miloko yothene ya sawiima iri velaponi yavathi. Yehova akaawerya onivaha muloko mmoharu wa yawiima wa hiyo—nari ni mmoharu. Munipuroni mwaya, Yehova onivaha miloko minchipale sa sawiima, ni ohiyanatho otokwene wa makhalelo, mainuwelo, ikore ni masivelo. Eyo enathonyerya wii Yehova ti Muluku awii, opwaha va osivela, oritho ovahasha, othokororya ni amahala.—Salmo 104:24.