Yohuserya 6
Paradaiso Ohaachamela!
Itchu soonanara hiiho vano inereya velaponi yavathi sinathonyerya wii Paradaiso ohaachamela. Biblia olocha wii wahaala okhalavo ilukuluku sawopiha elukuluku vakhani ahaakunve orwa Paradaiso. Nnakhala vano mu ilukuluku sawihihaa! Itchu ikina hiiho Biblia aalonchiye wii inahaala weereya ti iha:
Ikhocho itokwene. “Nloko nimoha na atchu n’narwa-n’roshana ni nloko nikina, ni omwene ni omwene mukina.” (Mateyu 24:7) Yooloherya ela yohaakhwanela. Ovinyerya eyakha ya 1914, waakhalavo ikhocho pili selapo ni ikhocho ikhaani sinchipale. Mwa hiiho aakhwa mamilyawu a atchu.
Irecha sawuulana. Onarwa okhalavo, “epahu m’mapuro ori ori.” (Luka 21:11) Mano hiiho sinneereya? Ayi. Erecha yawuuchiha sammwilini (Cancro), irecha sa murima, okothomola otokwene, malaria, Sida ni irecha sikina inaaipha mamilyawu a atchu.
Othowa wa yolya. Mu elapo yothene yavathi, wokhalavo atchu ahirinono yolya yawaakhwanela. Eyakha yothene, mamilyawu a atchu annakhwa ni etala. Yela ti eneneryo ekina yawi Paradaiso onahaala orwa mwawaakuveya. Biblia onii: “Vanarwa-vakhala etala.”—Marko 13:8.
Ochikinyeya. “Onarwa okhalavo . . . ochikinyeya wa elapo m’mapuroni ni mapuro makina.” (Mateyu 24:7, NM) Elatho ennereya mweelukuluku ahu. Atchu opwaha milyawu mmoha aakhwa ni ochikinyeya wa elapo ovinyerya 1914.
Atchu oonanara. Atchu yahaala okhala “ósivela icharama” ni “awisivela mkhataya.” Yahaala okhala “ósivela hiho sinatheiha mutchu, óhikhala ómusivela Muluku.” Anamwane yahaala okhala “óhiwiwelela yawo yáyanre.” (2 Timoteo 3:1-5) Mano himuneemererya wii olelo vava akhalavo atchu anchipale awihihaa? Ti atchu ahinamuchichimiha Muluku nave annapakiha sokachamiha wa yawo anaavyavya ohuserya etchu volocha sa Owo.
Ipahu. Onarwa okhalavotho “wachasha wa óhiléleya.” (Mateyu 24:12) Ori wochichimiheryeya wii munnemererya wii ipahu vano sohaachereryeya ohiyana ni iyakha samuchuli. Atchu makupa othene annakumanano mukhalelo yola wa waakhiwa itchu saya, ophoreihiwa ni wereliwa soonanara.
Sothene iha inathonyerya wii Omwene wa Muluku wohaachamela. Biblia onii: “Munirianyu mone itchu iha sirikimwereya, suwelashani wi Omwene wa Muluku ori vakhiviru.” (Luka 21:31) Mano Omwene wa Muluku tiheni? Ti epoma ya wirimu ya Muluku yeyo enahaala omutikitherya Paradaiso velaponi yavathi. Omwene wa Muluku onahaala ovolowa mmapuroni mwa ipoma sa atchu.—Danieli 2:44.