Apwanne ti Yeela Muluku Aakhweleiye?
ALAKHANYANI eyornali. Mvareryeni televisau, naari munwiriyane raatio. Sookhalavo miyaha sincipale vooloca sa wiiphana, ikhoco, ni onamaahita! Upuwelani makacamiho anyu. Akhweya wiiceliwa naari okhwa wa muchu mwaamusivelaanyu onnoothananihaani vancipale. Nyuwo munanwerya wuupuwela ntoko mulopwana aphaama Yupu, yoowo ahoolenle “epahu” etokweene.—Yobi 10:15.
Mwiikohe:
▪ Apwanne ti yeela Muluku onakhweleiye ntakhara miyo ni achu oothene?
▪ Kinii kiphwanye woowi nikhaviheryo wi kiwerye ovilela makacamiho aka?
▪ Mano yookhalavo ewehereryo yawi nihiku nikina nnahaala okhalano murecele veelaponi yavathi?
Piipiliya onnavaha maakhulo ooha kalaliha a makoho yaala.
PIIPILIYA ONAHUSIHA WI MOOHILEKELA MULUKU ONAHAALA ORUUHA VEELAPONI YA VATHI MAREELIHO ALA.
“Muluku onanvuta mithori aya, nave horwa okhavotho okhwa nari winla, nari ikutxho, nari witxela.”—Wupulula 21:4
“Mutxhu òrakala oni atxupheke ntoko muheku.”—Isaiya 35:6
“Mitho atxhu òhona anamuhuleya.”—Isaiya 35:5
“Atxhu othene ari mmahiyeni aneraya yiwe nsu nawe, . . . nave anakhumamo.”—Yohani 5:28, 29
“Havo oni ikhupanyeryeke wa nthowa na witxeliwa.”—Isaiya 33:24
“Mmatxani onamukhalamo solya sincipale mmiyakoni onamwatxamo.”—Salumu 72:16
MUKHAVIHERYEYE NI YEEYO PIIPILIYA ONAHUSIHEIYE
Muhaakuve okhooca ichu seiho ilociwe wuupaceryani ntoko satheru. Muluku oolaiherya okhwaaniherya ichu seiho, nave Piipiliya onnaloca ti mwawiihai owo onahaaleiye weerano hiiha.
Nyenya Piipiliya onnakhaviherya mmakhalelo mancipale. Owo onnavaha ikano wi mpuhe okumi anyu weeparipari woohakalaliha hiihaano. Upuwelani vakhaani sawiipiha murima ni makacamiho anyu. Awo tho annavolowela othowa wa ikhorowa, makacamiho a echoko, wiiceliwa, naari okhwa wa muchu mwaamusivelaanyu.Piipiliya onahaala wookhaviheryaani ohoolela makacamiho olelo, nave owo onanwerya oruuha ohakararya moorweela wa waakhula makoho ntoko ala:
▪ Ntakhara heeni ninnahooxeya?
▪ Nnii niwerye hai ohoolela sawiipiha murima sa okumi?
▪ Nnii niwerye hai opaka okumi wa echoko woohakalaliha?
▪ Tiheeni eneereya nakhwa?
▪ Apwanne nnahaala owoona tho oosiveliwa ahu akhwile?
▪ Nnii nroromele hai wi Muluku onahaala okhwaaniherya soolaiherya sawe sa muhoolo?
Nthowa na omwaalakhanya wanyu liivuru ola enooniherya wi munnachuna osuwela yeeyo Piipiliya onahusiheiye. Liivuru ola onahaala wookhaviheryaani. Suwelani wi Iparakrafo sookhalano makoho vathi va epaaxina. Macikhwi aachu annasiveliwa opharihela muteko makoho ni maakhulo yaamuhuseryaka Piipiliya ni Anamoona a Yehova. Ninnaweherya wi nyuwo tho munahaala osiveliwa. Mwaakhele mareeliho a Muluku hiihaano, mpuhe okumi woohakalala moorweela wa ohuserya yeeyo Piipiliya onahusiheiye chiryene!
[Ekaaxa va epaaxina 7]
MMUKHOVELELE PIIPILIYA ANYU
PIIPLIYA orino aliivuru ni ikaarata 66. Okhalano icima ni iciciri wi okhweye ophwanya. Saromoliwa soorempwa mu liivuru ola, nunturu noopacerya ohoolo wa nsina, nnathoonyerya ecima ya liivuru a Piipiliya naari ekaarata, nave nunturu nnacharela nnathoonyerya eciciri. Ntoko yawooniherya yoorepa ya “2 Timóteo 3:16” enataphulela ekaarata yanaawiili wa Timóteo ecima 3, eciciri 16.
Mwawaakuveya nyuwo munahaala omukhovelela Piipiliya moorweela wa waavya soorepa sinaromoliwa mu liivuru ola. Ninnoovekaani wi mpacerye omwaalakhanya Piipiliya nihiku nnihiku! Mwaalakhanya icima raru naari thanu nihiku nnihiku, munanwerya omwaalakhanya Piipiliya oothene mu eyaakha emoha.