MASU AWAACEERERYA

Seol ni Hades Tiheeni?

MU ILOCELO soopacerya, nsu nawi sheʹóhl mu Eheepri nenlo nnataphulela ha·ídes mu Ekriki, ninnaphwanyeya Mpiipiliyani ikwaha soopwaha 70. Masu oomeeli aniiwanana ni okhwa. Apiipiliya akina anataphulela masu awo ntoko “nihiye,” “mooro,” naari “nlici.” Nyenyanto, ilocelo sincipale hisaano masu anataphulela phaameene masu ala a Eheepri ni Ekriki. Mwawiihiiha, Tradução do Novo Mundo onapharihela masu “Seol” ni “Hades.” Mano masu ala anataphulela eheeni chiryene? Hankooni noone mukhalelo masu awo anaphariheliwaaya mmakupa oohiyana hiyana a Piipiliya.

Eklesiyaste 9:10 onii: “Ntakhara mmahiyeni [Seol] honeriwamo etxhu nave mwemmo hiyamo wupuwela osuwela ni miruku. Nave ti mwemmo onayàwemo.” Mano ela enataphulela wi Seol ti nihiye chiryene, naari nlici nri vanipuroni noothoonyeya, akhweya mwemmo hiyaano nimvinthaahuwo oosiveliwaahu? Hooye. Vaavaa Piipiliya onaloceiye sa nipuro nnavithiwa achu ookhwa, naari nihiye, owo onapharihela masu makina a Eheepri ni Ekriki, tahi sheʹóhl ni ha·ídes. (Maphatxuwelo 23:7-9; Mateu 28:1) Piipiliya tho hanapharihela nsu “Seol” aalocaka sa nihiye onavithiwawo achu ancipale vamoha, hiihaa ntoko nihiye na emusi, naari nihiye naachu ancipale.—Maphatxuwelo 49:30, 31.

Mano “Seol” nipuro na mukhalelo taani? Masu a Muluku anathoonyerya wi “Seol,” naari “Hades,” enalociwa echu ekina opwaha nihiye nawunnuwa onavithiwawo achu ancipale. Ntoko yawooniherya, Isaiya 5:14 onaloca wi mahiye naari Seol ‘onamwathama wi aamire.’ Naamwi Seol amanle waamirya achu ookhwa oohaalakhanyeya, ilukuluku soothene owo onachuna waamirya achu akina. (Masiposipo 30:15, 16) Moohiyana ni nihiye chiryene, onavithiwawo achu ookhwa awaalakhanyeya, ‘mahiye [Seol] henasareya.’ (Masiposipo 27:20) Ela ti wi, Seol hanasareya. Haanono mphimo. Seol naari Hades, tahi nipuro chiryene nawooneya. Ohiya eyo, ti mahiye a nloko naachu ookhwa, nipuro noosiphela weiwo achu ancipale anarupaayawo muukhwani.

Yoohusiha ya Piipiliya vooloca sa ovinya muukhwani ennanikhaviherya wiiwexexa phaama yootaphulela ya “Seol” ni “Hades.” Masu a Muluku aniiwananiha Seol ni Hades ni mukhalelo wa okhwa yoowo onahaala okhalano ovinya muukhwani.a (Yobi 14:13; Saweriwa T’arummwa 2:31; Yawupulula 20:13, NN) Masu a Muluku annooniherya tho wi achu yaale ari mu Seol, naari Hade, anaphitaanyerya ohiya pahiru achu yaamurumeela Yehova nyenya tho achu ancipale yaawo yahaamurumeela yoowo. (Maphatxuwelo 37:35; Salumu 55:15) Mwawiihiiha, Piipiliya onahusiha “wi atxhu othene, aphama ni ònanara murima, ananvinya mokhwani.”—Saweriwa T’arummwa 24:15.

[Nsu na vathi]