Munii Mmalihe hai Ohiiwanana Mmiyaha sa Maroca

Mu 1 Akorinto 6:1-8, murummwa Paulo ooloca sa marehereryo a othoriha variyari va Akiristu. Owo ohooniherya othanana nthowa nawi Akiristu akina Okorinto yaahaala “othorihiwa wa mutchu óhikhala ékhaikhai.” (Eciciri 1) Paulo oovaha mathowa aphaama wa Akiristu orehererya mulacu mpuwa mwa muloko ohiya okuxeryana wa athoriha a elapo. Vano hankooni nthokororye mathowa makina yaamweerinhe ovaha miruku seiya sooveereliwa, voocharela nthokororye makhalelo makina ahinavolowela malakiheryo yaala.

Wakhala wi nookhalano ohiiwanana mu maroca ni munna, voopacerya nnaphwanela waavyaavya omaliha mwaha mwawiiwanana ni moonelo wa Yehova, ohiya waahu. (Masiposipo 14:12) Ntoko Yesu oonihenryeiye, ti waphaama omaliha mulacu mwawaakuveya ohaakumve waacereryeya. (Mateyu 5:23-26) Moothananiha Akiristu akina annakhalano munepa wa wiisaakiha, ophiyerya okeriha mwaha wa athoriha a mulaponi. Paulo ooloca: “Vavo ari oyeleka tchiri mwa nyuwo, wi munnalochihana mulachu mukina ni mukhwawe.” Ntakhara heeni? Nthowa nimoha noochuneya ti nawi omukeriha munna wa athoriha onnananariha meecelo aphaama a muloko ni malapelo a Muluku. Mwawiihiiha nnaphwanela okuha va murimani nikoho na Paulo: “Ntakhara sheni muhinathanlanyu wemererya ophuchiwa?”​—Eciciri 7.

Paulo tho ooloca wi Muluku oovaha muloko marehereryo aphaama wi imalihiwe miyaha sincipale sa ohiiwanana. Atokweene Eekiristu akhalano miruku ni masuwelelo eeparipari a mu Soorempwa, nave Paulo ooloca wi awo akhalano owerya wa “wathoriha anna” vooloca sa “ichu sokumi yola.” (Iciciri 3-5) Yesu ohooniherya makhalelo mararu a omaliha mwaha inavolowela soohesa itokotoko, ntoko wootha ni wiiya: Yoopacerya, oopiili avoloweliwe emalihe mwaha aya vameekhaaya; yanaawiili, wakhala wi mukhalelo woopacerya hophanre muteko, akhalevo namoona mmoha naari apiili; ni yaneeraru, wakhala wi mukhalelo wanaawiili hophanre muteko mukuxerye mwaha owo mmulokoni yoowo onahooleliwa ni atokweene.​—Mateyu 18:15-17.

Chiri, atokweene Eekiristu tahi wi alipa oothoriha naari alopwana a maroca nave henaphwanela okhala ntoko yaala. Awo haanatikitherya malamulo a omaliha miyaha sa maroca ni ohiiwanana variyari va anna. Naamwi hiiha, annaavyaavya waakhaviherya oothene wi epharihele malakiheryo a Piipiliya ni omaliha makacamiho aya mwaphaama. Mu miyaha sincipale, awo akhweya anaphwanela omuleela ooweherya a ekulucu naari efiliyale ya Anamoona a Yehova. Mwawiihiiha, sookhalavo mikhalelo mikina sihinavolowela miruku sa Paulo. Taavi makhalelo makina a yaawo?

Mmikhalelo mikina, akhweya onakhala woochuneya ochariha malakiheryo aweemereryeya a othoriha wi imalihiwe miyaha mikina sihinavolowela waakhulana ni nrima. Ntoko yootakiherya akhweya onakhala mukhalelo mmoharu waweemereryeya wa omwalana, waaphuwa anamwane, ovakulela, waavya okhapeleliwa mmakacamiho, okhala aweemereryiwa osiyaara ikhorowa elukuluku ya othoiwa ni waakhwaniherya nlakano. Nave tho makhalelo makina ananwerya omweeriha munna weeravo echu wi iikhapelele mmarehereryo a othoriha.a

Wakhala wi muchu onnaavya okhapeleliwa mu malamulo mmukhalelo wa murecele, meerelo ala a othoriha akhweya henachekela miruku sooveereliwa sa Paulo.b Naamwi hiiha, echu yoopacerya wa Mukiristu enaphwanela okhala weeliha nsina na Yehova, otikitherya murecele ni waataana wa muloko. Opwaha soothene oomuchara a Kiristu annooniherya osivela nave “osivela . . . honatchara sa mwanene mekhaya.”​—1 Akorinto 13:4, 5; Yohane 13:34, 35.