Mwaana Yoowo Aalaiheryiwe

Yosefe ni Mariya annatitelela okhala o Petelehemu ohiya okookela o Nasareti. Vaavaa Yesu onakhwaniheiye mahiku mathanu namararu, awo annamuthikila, hiiha ntoko Nlamulo na Muluku wa Aisarayeli nnalamulelaaya. (Onamukutxho 12:2, 3) Ntoko eromoliwaaya yaaritho yookhovelela omuchuwa mwaana mu nihiku nenlo. Awo annamuchuwa mwanaya ni nsina Yesu, hiiha ntoko munkeelo Kapriyele aalonceiye.

Waahivira mweeri mmoha, nave Yesu orino mahiku 40. Ti woowi asitiithi awe vano anamukerihaayawo? Mu empa ya Muluku o Yerusalemu. Nlamulo nnaloca wi evinre mahiku 40 muthiyana amanle omuyara mwaana, waanachuneya oveleela yoovaha ya ovasiwa mu empa ya Muluku.—Onamukutxho 12:4-8.

Mariya onneerano yeeyo. Ntoko yoovaha awe, owo onnaruuha ipalame piili. Yoovaha awe ennanleela echu vooloca sa mukhalelo woomwiilini wa Yosefe ni Mariya. Mwawiiwanana ni Nlamulo, mwaasana a epucepuche ni ipalame saanaphwanela ovahiwa. Nyenya wakhala wi mayi hanawerya omvaha mwaasana a epucepuche, masiya meeli naari ikakaiya piili saanaakhwanela. Owo ori mukhalelo wa Mariya nave ti yeeyo ovanheiye.

Mu empa ya Muluku, mulopwana awuuluvala onnamwaacamela Mariya ni Yosefe. Owo oniichaniwa Simiyone. Muluku aahiloca wa yoowo wi ahaakumve okhwa, aahaala omoona Kristu naari Mesiya, aalaiheryiwe ti Yehova. Mu nihiku nenle Simiyone onnahooleliwa ni munepa waweela oya mu empa ya Muluku, mwemmo onnamphwanya Yosefe ni Mariya ni mwanaya. Simiyone onnamukusa mwaana ampharela mmatani mwawe.

Ampharenle Yesu, Simiyone onnamuthamala Muluku, ariki: “Pwiya, vano omuhiye mulapeli-à arowe ni muretxele ntoko walontxawe, ntakhara mitho aka àhona nivuluso nà oreherenryawe vamithoni wa maloko othene, ekamama wi emwalele ilapo, [ni] ovuwa wa nloko nà, Isarayele.”—Luka 2:29-32.

Yosefe ni Mariya annatikhiniheya owiriyana masu yaala. Simiyone onnaareeliha nave onnamuleela Mariya wi omuyanre mwanawe “wi akhale wuwa ni ovinya wa atxhu antxipale a Isarayele” nave wi othanana onalikana ni nsipaaca noonoliwa, onahaala ovira variyari vawe.—Luka 2:34.

Ookhalamo muchu mukina mpa mwemmo. Owo ti Ana mulipa a miririmu awuuluvala a iyaakha 84 sa oyariwa. Owo hanacompela okhala mu empa ya Muluku. Mu elukuluku yeeyo, owo onnarwa wa Yosefe, Mariya ni Yesu. Ana onnapacerya omuthamala Muluku nave onnaloca sa Yesu wa oothene yaawo ananwiriyana.

Munnawerya waanyiherya mukhalelo Yosefe ni Mariya anahakalalaaya variyari va saweereya seiya mu empa ya Muluku! Mweeparipari, soothene seiya sinnooniherya wi mwanaya ti Mmoha Aalaiheryiwe ni Muluku.