Omuhuserya wanyu Piipiliya ni Anamoona a Yehova yohookhaviheryaani osuwela eparipari. Hiwaavo minikwa wi yeeyo muhusenryaanyu yohookhaviheryaani okhalano onthamwene ni Yehova nave yohookhaviheryaani okhalano onthamwene ni Muluku nave yohoovahaani ewehereryo ya okumi wa muhoolo ni mareeliho a mparataiso veelaponi yavathi moorweela wa Omwene wa Muluku. Nroromelo nanyu Mmasu a Muluku noolipihiwa, nave moorweela wa othukumana ni muloko Weekristu, nyuwo moolawiha mareeliho mancipale. Moosuwela mukhalelo Yehova onaakhaliheiye achu awe olelo.—Zak. 8:23.

Elukuluku muniirehereryaanyu ntakhara opatiso, munahaala ophura wuuluulela mathipelo ari soororomela Seekristu, aneecihiwa ni atokweene a Muloko. (Ahe. 6:1-3) Nto Yehova apwahiherye oreeliha wiilipixerya wanyu woothene wi mukhaleno nsuweliho nawe, ni woovahaani phatamari olaiheryiwe.—Yoh. 17:3.

1. Ntakhara heeni munnachuna opatisiwa?

2. Yehova taani?

• “Apwiya [Yehova] ti Muluku mmoharu wirimu ni elapo yoothene ya vathi; haavo tho mukina.”—Malam. 4:39.

• “Wi esuwele wi Nyenyuru, nsina nanyu mwa Yehova, Mwa Awirimurimu velaponi yothene ya vathi.”—Sal. 83:18, NN.

3. Ntakhara heeni ti woochuneya wa nyuwo opharihela nsina na Muluku?

• “Nyuwo muvekeleke hiiha: Atiithihu muri wirimu, nsina nanyu neelihiwe.”—Mat. 6:9.

• “Tiwi, oothene yaawo enii ewiichane Apwiya [Yehova] anamoopowa.”—Aro. 10:13.

4. Masu taani anaphariheliwa Mpiipiliyani wi atharihiwe Yehova?

• “Apwiya [Yehova] ti Muluku okhala wookhala, mwaneene opatunshe makuchuwelo eelapo ya vathi.”—Isa. 40:28.

• “Atiithihu muri wirimu.”—Mat. 6:9.

• “Muluku ti osivela.”—1 Yoh. 4:8.

5. Tiheeni munahaalaanyu omvaha Yehova Muluku?

• “Waakhweleke Apwiya Muluku aa ni murima aa woothene, ni okumi aa woothene, ni miruku aa yoothene, ni owerya waa woothene.”—Mar. 12:30.

• “Waalapeke Apwiya Muluku aa, nave yaaworu oneeraa, waakokhoreleke.”—Luka 4:8.

6. Ntakhara heeni munnachuna okhala oororomeleya wa Yehova?

• “Okhale amiruku mwanaka, ohakalalihe murima aka, wi miyo kiweryeke owaakhula anakinyemula.”—Masi. 27:11.

7. Taani munamvekelaanyu, nave munavekela mu nsina nawani?

• “Eparipari txhiryene miyo [Yesu] kinnolèlani: mwaveka etxhu Atithi mwa nsina naka, yawo anamovahani.”—Yoh. 16:23, BNM.

8. Ichu taani ikina munaphwanelaanyu oloca mu nivekelo?

• “Nyuwo muvekeleke hiiha: Atiithihu muri wirimu, nsina nanyu neelihiwe. Omwene anyu orwe. Okhwela wanyu weereye, ntoko wirimu hiihaa tho vathi va. Munivahe olelo yoolya ahu ya olelo. Munikhurumuwele soocheka sahu, ntoko hiyo tho nnaakhurumuwelaahu ananchekela. Muhinihiye neereriwaka, nto munivulushe wa oonanara owo.”—Mat. 6:9-13.

• “Ninnaloca moohoovelela wa yoowo, nsuwelaka wi navekaru echu ntoko mwa okhwela wawe, owo onnaniiwa.”—1 Yoh. 5:14.

9. Ntakhara heeni Yehova haahaala owiriyana mavekelo a muchu?

• “Muneeraanyu muwiichane Apwiya, nto herwa ewaakhulaani . . . wa nthowa soonanara seiyo muneeraanyu.”—Mik. 3:4.

• “Miitho a Apwiya annaaweha awookololowa murima, nave maru aya annawiriyana mavekelo aya, nto ethoyi ya Apwiya ennaarukunuwela yaawo aneera soonanara.”—1 Ped. 3:12.

10. Yesu Kristu taani?

• “Siimoni Peeturu aamwaakhula ariki: ‘Nyuwo mwa Kristu, mwaana a Muluku ookumi?’”—Mat. 16:16.

11. Ntakhara heeni Yesu aarwa veelaponi yavathi?

• “Tiwi mwaana a muchu haarweele olampwa, nto waalapela achu ni ovaha okumi awe wi awoopole ancipale.”—Mat. 20:28.

• “Onnaphwanela wi miyo [Yesu] kilaleerye michaka ya omwene wa Muluku mu ipooma sikina tho, ntakhara ti yeeyo kirummwaaka.”—Luka 4:43.

12. Muni mooniherye hai othamalela wanyu mukucho wa Yesu?

• “Owo aakhwenle achu oothene, wi yaale ari akumi, okumi aya ohikhale wawaya, nto okhale wa yoole aakhwenle nave avinya wookhwani.”—2 Kor. 5:15.

13. Olamulelo taani Yesu oreiyeno?

• “Koovahiwa owerya woothene woolamula, wirimu ni veelaponi ya vathi.”—Mat. 28:18.

• “Mwawihiihaa, Muluku tho aamwinnuwihasha amvaha nsina noopwahasha masina oothene.”—Fil. 2:9.

14. Apwanne munnaroromela wi Nikhuuru Noolamulela na Anamoona a Yehova “namuteko oororomeleya ni a miruku” othanliwe ni Yesu?

• “Taani ori namuteko oororomeleya ni a miruku? Ti yoowo pwiyawe omuthanlileiye wa akhweiye, amweera mutokweene aya wi aavaheke yoolya mu elukuluku yoophwanelela.”—Mat. 24:45.

15. Apwanne munepa waweela muchu?

• “Nto munkeelo aamwaakhula, ii: ‘Munepa Waweela onarwa wookhuruwela nave owerya wa Awirimurimu onamookhuneela, hiihaa aweela owo oneeraa omuyare, onarwa iichaniwa mwaana a Muluku.’”—Luka 1:35.

• “Nnaamwi nyuwo muri oonanara murima, moosuwela waavaha aniinyu ichu saphaama! Vano atiithi ari wirimu, hotempevo waavaha Munepa Waweela wa yaale anaaveka?”—Luka 11:13.

16. Yehova aapharihenle hai munepa awe waweela?

• “Nsu n’Apwiya nopatusa erimu, ni n’wiya wa mwano mwaya sothene sa wirimu.”—Sal. 33:6, BNM.

• “Nto munarwa mwaakhela ikuru, oneeraaya wookhuruweleeni Munepa Waweela, nave munamukeerela onamoona . . . ophiyerya weiwo elapo ekontaayawo.”—Saw. 1:8.

• “Masu a miririmo mu soorempwa hiyaarweenle mwa waanyiherya wa alipa a miririmo aneene. Masu yaawo hiyaatonko orwa mwa okhwela wa muchu, nto achu ehooleliwaka ti Munepa waweela ti yaaloca masu ookhuma wa Muluku.”—2 Ped. 1:20, 21.

17. Omwene wa Muluku tiheeni?

• “Mmahiku a mamwene yaala, Muluku a wirimu onarwa otikitherya omwene mukina yoowo onii ohiwerye omwariwa nari okushiwa ti maloko makina. Onamunyaanya ni omaliha omwene woothene waarivo, nave omwene owo otikitheriwe ti wa mahiku oothene.”—Dan. 2:44.

18. Ti mwawiihai Omwene wa Muluku oneeraaya wookhaviheryeeni?

• “Yoowo onamvuta miithori oothene wiithoni waya. Horwa tho okhalawo okhwa, nari wunla, nari ikucho, nari wiicela, ntakhara ichu sakhalayi soovira.”—Rev. 21:4.

19. Munasuwela hai wi mareeliho a Omwene moohilekela anahaala okhalavo veelaponi?

• “Oohuserya awe yaamwaacamela va meekhaaya, elocano eriki: ‘Munleele: Ichu seiye inaya weereya liini? Eneneeryo aya tiivi ya ophiya wanyu ni makuchuwelo a ilukuluku?’ Yeesu awaakhula: ‘. . . Nloko nnamuroshana ni nloko nikhwaaya, nave omwene onamuroshana ni omwene mukhwaaya. Makupa mancipale onamukhalamo etala ni ocikinyeya wa elapo. Michaka yeela ya omwene enamulaleiwa mweelapo yoothene yookhalamo achu wi iweerele onamoona maloko oothene. Vaavaa teneeraaya ephiye makuchuwelo.’”—Mat. 24:3, 4, 7, 14.

• “Nto osuwele ela: mmahiku ookuchula, inamphiya ilukuluku sa sookacamiha. Achu anarwa ekhala awiichuna mukhataaya, oochunasha ikhorowa, awiithamalela, awiikhoma, oomunyemula Muluku, oohiwiiwelela awaayara, oohithamala, oohicicimiha saweela, oohikhoveleleya, oohaataaniheya, oowaapa akhwaaya, oohiwerya wiihiiha, oowali, amwiicani a saphaama, amakhuce, aweeteteya, awiisoona ni ookhwela opuha ohiya omukhwela Muluku. Mukhalo aya ari ntoko achu anavekela nto haanono ikuru sene sa Muluku.”—2 Tim. 3:1-5.

20. Muni mooniherye hai wi Omwene wa Muluku ti woochuneya wa nyuwo?

• “Hiihaa mpacerye waavya omwene wa Muluku ni wookololowa wawe.”—Mat. 6:33.

• “Yeesu ahaaleela tho oohuserya awe, ariki: ‘Yoowo onakhwela okichara miyo, iikhoockeke mukhateiye, ateeshe [mwiri awe wa ohooxiwavo], akichareke.’”—Mat. 16:24.

21. Taani ori Satana ni masololo?

• “Nyuwo muri a Saataana, yoowo turi tiithiinyu . . . Vawi owo ori nawoothe.”—Yoh. 8:44.

• “Enowa yakhalayi yawiichaniwa musaserya nari Saataana, anaawoka achu eelapo yoothene. Vaiye ni ankeelo awe yaariheliwa veelaponi ya vathi.”—Wup. 12:9.

22. Tiheeni Satana aamoothenryeiye Yehova vamoha ni yaale anamurumeela Yoowo?

• “Muthiyana aahaakhula: ‘Ninneemereriwa olya sawiima sa miri sa mmacani. Nto Muluku ooloca wi nihilyeeke sawiima sa mwiri ori veeri wa emaca. Naphararu yawiima aya, nnamookhwa.’ Enowa yaamwaakhula: ‘Nari! Nyuwo hamukhwaru. Tiwi Muluku oosuwela wi, mwalyaru yawiima yeele, miitho anyu enarwa ehuleya, nave mukanasuwela yoonanara ni yaphaama, ntoko Muluku.’”—Map. 3:2-5.

• “Saataana aawaakhula Apwiya: ‘Nrapala ni nrapala! Muchu onnavaha soothene oreiyeno wi oopole okumi awe.’”—Yobi 2:4.

23. Muni mooniherye hai wi sooloca sa Satana ti satheru?

• “Omulapeke [Muluku] ni murima aa . . . woothene.”—1 Math. 28:9.

• ‘Ophiyerya okhwa waka nkirwa kihiya okhala oororomeleya.’—Yobi 27:5.

24. Ntakhara heeni achu annakhwa?

• “Tiwi ocheka woovolowa mweelapo ya vathi mwa muchu mmoha, nave okhwa woovolowa mwa ocheka wu. Hiihaa okhwa, ohaapwanya achu oothene vawi oothene aacheka.”—Aro. 5:12.

25. Tuuvi ori mukhalelo wa achu ookhwa?

• “Akumi annasuwela wi anamukhwa, nto akhwile hanasuwelaru.”—Ekle. 9:5.

26. Ewehereryo taani erivovo wa yaale akhwile?

• “Ntoko achu yaala tho, kinnawehererya wi Muluku onarwa aaviiha wookhwani awookololowa murima vamoha ni oonanara murima.”—Saw. 24:15.

27. Achu akavi anaya wirimu wi yalamulele ni Yesu?

• “Kaaweha, koona Epucepuche yeele, yeemenle vasulu wa mwaako Siiyoni, eri vamoha ni achu aya amiile nsana ni makhumi masheshe ni achu amiile asheshe, yaawo yaarempwe vayuuci nsina naya ni nsina na Atiithi aya.”—Wup. 14:1.

Moorweela wa omuhuserya wanyu Piipiliya, mookhalano nsuweliho vooloca sa ichu seiyo Yehova onaweheryeiye wa nyuwaano ni mukhalelo muneeraanyu mwiiweleleke malamulo awe eekhaikhai. Mu waakhulela yeeyo muhusenryaanyu, moopaka matorokelo mancipale vooloca sa meecelo ni moonelo anyu vooloca sa okumi. Vano muthanlilaanyu okhala mwawiiwanana ni malamulo eekhaikhai a Yehova, nyuwo muri ooreheryeya opaka muteko waweemereryeya ntoko murummwa a michaka saphaama.

Wuuluulela makoho anacharela enahaala wookhaviheryaani okhapelela phaama soovekeya seekhaikhai sa Yehova ni owuupuxeryaani ichu munaphwanelaanyu weera wi mukhale mmoha a alapeli awe aweemereryiwa. Sooleeliherya seiya inahaala wooceenyeryaani woona ochuneya waya weerano ichu soothesene ni yawuupuxerya-ya-murima yaphaama nave wa ncicimiho na Yehova.—2 Kor. 1:12; 1 Tim. 1:19; 1 Ped. 3:16, 21.

Mu ophiya nikupa nenla mu yoohuserya anyu, moohikhwa minikwa nyuwo munnachuna wiiwelelaka olamulelo wa Yehova ni opaka makupa a marehereryo awe. Makoho ni Soorempwa iromoliwe inahaala wookhaviheryaani waalikhela wiiwexexa wanyu wiiwelela marehereryo a Yehova, moohipwacha mmulokoni, veechokoni, naari makhalelo a epoliitika a elapo yeela yoonanara. Nyuwo munahaala ocicimiherya vancipale marehereryo Yehova opankeiye wi aahusihe achu awe ni olipiha nroromelo naya. Eyo enaphitaanyerya mithukumano sa muloko munahaalaanyu ochuna oyaakawo ni opaka makupa mikhalelo sanyu seemererya.

Mwawaaceererya, nikupa nenla nnahaala othokororya ochuneya waya ophwanyeya moohihiyererya mmuteko wa olaleerya Omwene, waakhaviherya akina omusuwela Yehova ni echu onapakeiye ntakhara achu. (Mat. 24:14; 28:19, 20) Vookuchula, eyo enahaala oceenyerya mmuupuwelo mwanyu wi wiiveleela wanyu wa Yehova Muluku ni opatiso anyu mwaha mutokweene. Munaphwanela ororomela wi Yehova onnathamalela waakhulela wanyu mahala awe matokweene oonihenryeiye wa nyuwo.

1. Tinivi nri nlamulo Neekristu na othela? Tinivi nri nthowa na Soorempwa nneemererya omwalana?

• “Hamwaalakhannye? Tiwi Mpatusha, woopaceryani, aahaapatusha alopwana ni athiyana, aloca tho: ‘Mwa nthowa nenla, mulopwana aahiyeke atiithinya ni amannya, aphitaane ni mwaariye, nave ala enii ekhalake mwiili mmoha.’ Vano hari eeli, nto mwiili mmoharu. Hiihaa, yeeyo Muluku ophitaannyeiye, muchu ahimwalanye . . . Yoole onamwalana ni mwaariye, voohikhala nthowa na mararuwo, amuthela mukina, yoowo onamuraruwa.”—Mat. 19:4-6, 9.

2. Ntakhara heeni yaale anakhala vamoha ntoko mulopwana ni muthiyana anaphwanela orepiha othela? Waakhanle wi moothela, apwanne munnaroromela wi othela wanyu ti waweemereryeya nave woosuweliwa ni alamuleli?

• “Owuupusherye anna oothene wi yacicimiheke ni owiiwelela alipa oolamula ni mamwene.”—Tito 3:1.

• “Othela ocicimihiweke ti achu oothene. Okumanela wa atheli okhaleke woohichekeliwa; tiwi Muluku onamwaathoriha aweeca pure ni anamararuwe.”—Ahe. 13:4.

3. Tuuvi ori murici anyu veechokoni?

• “Mwanaka wiiweke ohusiha wa apaapaa, nave ohihiye ikano sa amayaa.”—Masi. 1:8.

• “Ntakhara muru wa muthiyana ti iyawe, mu nsina na Apwiyaahu Yeesu Kristu . . . Nyuwo alopwana, mwaakhweleke asaarinyu tho, ntoko Kristu okhwenleiye muloko awe.”—Éfe. 5:23, 25.

• “Asitiithi, muhaarosheke anamwane anyu, mwaaphuweke, mwaaleelihaka ni waalopola mwa Apwiya.”—Éfe. 6:4.

• “Anamwane nyu, muwiiweleleke yaawo ooyanreeni mu soothene ntakhara yeeyo tenaahakalaliha Apwiya.”—Kol. 3:20.

• “Athiyana nyu, mwaacicimiheryeke asiiyanyu a nyuwo aneene.”—1 Ped. 3:1.

4. Ntakhara heeni nnaphwanela ocicimiha okumi?

• “[Muluku] tonavaha wa oothene okumi, m’wiya ni soothesene. Mwa yoowo nnakhalaahu akumi, nniitannya nave nraahumo.”—Saw. 17:25, 28.

5. Ntakhara heeni hannaphwanela omwiipha muchu, ophitaanyerya mwaana ohiyariwe?

• “Yoomwi alopwana ewanaka, emphoreiha tho muthiyana orupanle . . . ophacuwavo echu ekina, hiihaa onarwa wooneyavo okumi ni okumi.”—Muk. 21:22, 23.

• “Kihaakuvele wuupiwa miyo miitho anyu yaakoona. Mahiku oothene a okumi aka aarempwa mu liivuru anyu nari nihiku nimoha nihakuvale okhala.”—Sal. 139:16.

• “Inaananara Apwiya . . . matata anayeeha nikhami.”—Masi. 6:16, 17.

6. Tinivi nri nlamulo na Muluku vooloca sa nikhami?

• “Othanya nikhami . . . [ni] soonyokocholiwa.”—Saw. 15:29.

7. Ntakhara heeni nnaphwanela waasivela anna ni arokora ahu Eekristu?

• “Kinnoovahaani nlamulo nahiihaano nla: mukhwelaneke mukina ni mukhwaawe; ntoko miyo kookhwenlaakaani, hiihaa tho nyuwo mukhwelaneke mukina ni mukhwaawe. Mwakhalano osivela mukina ni mukhwaawe, achu oothene anarwa esuwela wi muri oohuserya aka chiri!”—Yoh. 13:34, 35.

8. Wi muchu asepe waaraviha akina ereca eniipha: (1) Ntakhara heeni muchu orino ereca hanaphwanela opacerya wooniherya osivela, hiiha ntoko omukhupaarela muchu naari omunuula? (2) Ntakhara heeni hanaphwanela onanariwa wakhala wi akina hanwompe wi aye owannyaya? (3) Ntakhara heeni muchu onaanyiherya wi ookhalano ereca yoorava onaphwanela waalikhela nikhami ahaakumve opacerya wuurya? (4) Ntakhara heeni muchu orino ereca enaramvwa onaphwanela omuleela muhooleli a nikhuuru na atokweene ahaakumve opatisiwa?

• “Mankaawu muneeranyu mukhaleno okhwelana mukina ni mukhwaawe . . . Omukhweleke mukhwaa ntoko oniikhwelelaa weyo mwaneene. Osivela honamwerela yoonanara mukhwaawe.”—Aro. 13:8-10.

“Mmoha ni mmoha ahithokororyeke sawaweru, nto saakhweiye tho.”—Fil. 2:4.

9. Ntakhara heeni Yehova onnaweherya wa hiyo wi naakhurumuweleke akina?

• “Muvilelane mukina ni mukhwaawe nave mukhurumuwelaneke, mukina akhalano mwaha ni mukhwaawe. Mukhurumuwelaneke ntoko Apwiya ookhurumuwenlaayaani.”—Kol. 3:13.

10. Tiheeni munaphwanelaanyu weera wakhala wi munna oowootheryaani naari oowiyeryaani?

• “Munnaa oochekela, hawe, waloceno omuleelihaka muriwo eeliru. Iiwelela, woomukookihawo. Aahiwiiwelela, omuwope muchu mukina, nari eeli, wi mwaha owo walociwe ni vamiithoni wa anamoona eeli nari araru. Nto aahiwiiwelela anamoona yaawo, hawe waleele muloko; nave aahiiwelela ni muloko ene, omweere ntoko mmalapo nari mulipa a mushokho.”—Mat. 18:15-17.

11. Yehova onoona hai soocheka inacharela?

▪ Oraruwa

▪ Olapela soophwaniherya

▪ Okonihana wa achu oolikana mwiikho

▪ Wiiya

▪ Apasakhwe anrima

▪ Ohapaliwa

• “Muhiwokiwe: ooraruwa, awaalapa amuluku atheru, aweeca pure, oorarushana alopwanaru, anawiiye, anrima, oohapaliwa, ooloca moonanara nari ampava, yaala oothene hewerya waakhela omwene wa Muluku.”—1 Kor. 6:9, 10.

12. Tiheeni mulakelenlaanyu weera, vooloca sa ocapaheya, yoowo onaphitaanyerya meerelo oohiyanahiyana a okonihana ni muchu ohiri oothelana anyu?

• “Chawani mararuwo!”—1 Kor. 6:18.

13. Ntakhara heeni ninnaphwanela othanya olya mirece ihineemereryiwa naari sinnanariha muupuwelo?

• “Mveleele miili anyu okhala mukucho mukumi, waweela woomuhakalaliha Muluku, ti omulapa wanyu Muluku weeparipari moophwanelela. Muhiphwanaphwanihiweno makhalelo yaala a mutano, nto mutatushiwe mmuupuwelo ahihano, wi mweererye moone okhwela wa Muluku, ti waphaama woohakalaliha ni wa waakhwanela.”—Aro. 12:1, 2.

14. Saweera taani sa onamulosiwe Muluku onawatiiheiye?

• “Ahikhale mwa nyuwo onii . . . iisaciherye nari weeherya ihako, okhalano masica nari omwaaciha, wiina okhwiri nari ophepa mirece. Ahikhale anii akoheke minepa nari witokoserya nari mano waakoha alipa ookhwa.”—Malam. 18:10, 11.

15. Wakhala wi muchu oopaka yoocheka etokweene nave anachuna okookela weemereryiwa ni Muluku, tiheeni onaphwaneleiye weera mwawaakuveya?

• “Kaalokoha mwa nyuwo soocheka saka, nkaavithale soonanara saka, kiriki: Miyo kinneemererya soopahula saka, Apwiya, Muluku aka.”—Sal. 32:5.

• “Ookhala mukina a nyuwo oniiceliwa? Awiichane asitokweene a mmulokoni, emvekelele yoowo, emmiinele makhurwa mu nsina na Apwiya. Nivekelo na nroromelo, nnamuvulusha awiiceliwa owo, nave Apwiya anarwa emuviiha; akhala orimuchekela, onarwa akhurumuweliwa.”—Tiy. 5:14, 15.

16. Wakhala wi moosuwela wi Mukristu oopaka yoocheka etokweene, tiheeni munaphwanelaanyu weera?

• “Oomwi muchu iichaneliwa weerela onamoona sa yeeyo oonneiye nari iiwaleiye, ahilokoha, ookhalano yoocheka.”—Onam. 5:1.

17. Wakhala wi yoolokohiwa wi muchu a mmulokoni tahi Namoona a Yehova, nnaphwanela omukhalihaka hai?

• “Muhipwesheheryaneno muchu aweeriwa munna mmulokoni, ooraruwa, anrima, awaalapa amuku atheru, ooloca moonanara, oohapaliwa, nari awiiya. Awiihiiha muhilyeekeno.”—1 Kor. 5:11.

• “Oomwi muchu mukina arwa wa nyuwo ahikhanleno mahusiheryo ala, muhimwaakhele vaate vanyu, nari mano omusheliha.”—2 Yoh. 10.

18. Ntakhara heeni munaphwanela opaka onthamwene ni yaale anamusivela Yehova?

• “Oneeca ni achu amiruku, owo tho tamiruku, nto nthamwene a alolo, yoonanara ennamphacuwela.”—Masi. 13:20.

• “Muhihuwelihiwe tho: Onthamwene woonanara onnapahula meecelo aphaama.”—1 Kor. 15:33.

19. Ntakhara heeni Anamoona a Yehova hanapaka makupa a epoliitika?

• “Awo hari a elapo ya vathi, ntoko miyo tho [Yesu] kihikhanlaaka a elapo ya vathi.”—Yoh. 17:16.

20. Ntakhara heeni munnaphwanela owiiwelela alamuleli?

• “Achu oothene yaacicimiheryeke asitokweene anlamula; vawi hiwaavo owerya woolamula ohinarweela wa Muluku, nave yaawo arivovo athoonyiwe ti Muluku.”—Aro. 13:1.

21. Wakhala wi malamulo aachu annawanawana ni malamulo a Muluku, tiheeni munaphwanelaanyu weera?

• “Onnakhweleya omwiiwelela Muluku, opwaha achu.”—Saw. 5:29.

22. Soorepa taani inahaala wookhaviheryaani okhala oovalaanyeya ni elapo vaavaa munathanlaanyu muteko?

• “Maloko hekawana yawo-yawo, nave herwa enahuserya mawanelo a ekhotxo.”—Mik. 4:3, BNM.

• “Mvinyevo wa yoowo [Papulu Mutokotoko] nyuwo muloko aka, wi nyuwo muhuuke soocheka sawe, wi ipahu inahaala ommorela yoowo ihoophwanyeeni!”—Wup. 18:4.

23. Makhalelo taani a mathatelo ni ochekula munahaalaanyu othanla nave taavi munahaalaanyu osepa?

• “Apwiya . . . Annawiica aweera soonanara.”—Sal. 11:5.

• “Wiicaneno yoonanara nave waakeelele yaphaama.”—Aro. 12:9.

• “Yoothene eri yeeparipari, yoothene eri yoophwanelela, yoothene eri yawookololowa, yoothene eri yooreera, yoothene eri yookhweleya, yoothene evunwe mooreera, yaakhalavo ekina yaphaamasha ni yoocicimiheya.”—Fil. 4:8.

24. Ntakhara heeni Anamoona a Yehova hanalapela vamoha ni makhuuru makina a ikerexa?

• “Hamunawerya owurya ekahi ya Apwiya nave muwurerye ya minepa soonanara.”—1 Kor. 10:21.

• “Hiihaa, mukhumevo veeri vaya nave mmwalane ni yaawo, Apwiya tanaloca. Muhiphareru echu yoothanyeya; kinamuwaakhelaani.”—2 Kor. 6:17.

25. Malakiheryo taani anahaala wookhaviheryaani olakelela vooloca sa opaka makupa mmahiku a ochapela?

• “Tiwi yaahaakanyeryana ni maloko makina, ehuserya ikano saya. Yaanaalapa amuluku aya atheru. Ekhala ntoko muraakho wa yaawo.”—Sal. 106:35, 36.

• “Akhwile hanasuwelaru.”—Ekle. 9:5.

• “Awo hari a elapo ya vathi, ntoko miyo tho kihikhanlaaka a elapo ya vathi.”—Yoh. 17:16.

• “Elukuluku yeele evinre ehaakhwana, vaavale mweeraanyuno seiyo amalapo anchunaaya, onamalya, owuryasha ni waalapela amuluku atheru, yaawo ahineemereriwa.”—1 Ped. 4:3.

26. Sootakiherya sa Mpiipiliya sini sookhaviheryeeni hai olakelela ochapela mahiku a oyariwa?

• “Chiri emanle mahiku mararu, Farawo aapaka efesta y;a waakhwaniha miyaakha sawe, aavaha yoolya anamuteko awe oothene. Veeri va achu oothene yaale, aahaaviihamo mukaripooso muhooleli a soowurya ni muhooleli oopaka iphaawu. Aamukookiherya muteko awe muhooleli a soowurya . . . Muhooleli oopaka iphwaawu, aarumiha ohitiwa athomeiwa va mwirini.”—Map. 40:20-22.

• “Nihiku na efesta yawuupusherya oyariwa wawe Heeroti, mwaana a mwaamuthiyana a Herotiya aahiina vaavale, amusiveliha Heeroti. Hiihaa Heeroti aalipela omvaha yeeyo eereiye amveke. Aaleeliweiye ti amannya, mwaana yoole aahi: ‘Mukivahe mparathoni muru wa Yoohani mPatisi.’ Aarumiha ohitiwa Yoohani mukaripooso.”—Mat. 14:6-8, 10.

27. Ntakhara heeni munachunaanyu ocharihaka ohoolela wa atokweene a mmulokoni?

• “Muwiiweleleke ahooleli anyu nave muweemereryeke yaawo. Ti yaawo anaweherya okumi anyu ewaakhulelakaani. Muwiiweleleke wi muteko aya okhale woohakalaliha ohiya wawiikhupanyerya. Yiikhupanyeryaka, nyuwo hamunaphuravo echu.”—Ahe. 13:17.

28. Ntakhara heeni ti yoochuneya wa nyuwo vamoha ni emusi anyu otikitherya elukuluku ya omwaalakhanya ni omuhuserya Piipiliya?

• “Nto yoowo onahakalala mmalamulo a Apwiya, onnuupuwelela othana ni ohiyu. Onarwa akhala ntoko mwiri wawaaliwa mukhice wa maahi, oniima sawiima mu elukuluku aya, makukhu aya hanamora. Soothene oneeraiye eere ikanamuhakalaliha.”—Sal. 1:2, 3.

29. Ntakhara heeni munnasiveliwa oya ni opaka makupa mmithukumanoni?

• “Kinarwa kivuwiha nsina naa wa asinnaka, kinoothamalaani veeri va muloko.”—Sal. 22:22.

• “Nuupuwelelaneke mukina ni mukhwaawe, nlipisheryanaka mu osivela ni mwa miteko yaphaama. Nihicompeke mmithukumanoni mwahu, ntoko akina akhovelenlaaya. Nto, niceenyeryaneke mukina ni mukhwaawe, voopwahasha munoonaanyu wi ninnaacamela nihiku nookuchula.”—Ahe. 10:24, 25.

30. Muteko taani ori wookhweleyaxa Yesu onivanheiye wi nipake?

• “Haweni wa achu a maloko oothene, mwaapakeke oohuserya aka, munaapatisa . . . munaahusiha ochariha soothene koorummaakaani.”—Mat. 28:19, 20.

31. Vaavaa nnapakaahu sooveleela ntakhara muteko wa Omwene naari waakhaviherya anna ni arokora ahu, moonelo taani onamuhakalaliha Yehova?

• “Mucicimiheeni Yehova ni ichu sanyu sa esisapo yoowalamela.”—Masi. 3:9, TNM.

• “Muchu ti muchu avahe ntoko onuupuweleleiye mmurimani mwawe, ahithananaka nari olamuleliwa, vawi Muluku onnamusivela yoole onavaha moohakalala.”—2 Kor. 9:7.

32. Makacamiho taani Akristu anawehereryaaya okumanano?

• “Oohakalala taale anahoosiwa wa nthowa na ekhaikhai, woona wi ti wawaya Omwene wa wirimu. Oohakalala ti nyuwo mwaruwaniwa, mwiikariwa ni mootheriwa soonanara soothene wa nthowa naka. Hakalalani ni chapani, woona wi nchuwelo nanyu nnamukhala ntokotoko wirimu, ntakhara yaapacenrye owiikara alipa a miririmo muhaakumve.”—Mat. 5:10-12, TNM.

33. Ntakhara heeni eryaaya ekari ya vameekhaaya opatisiwa ntoko mmoha a Anamoona a Yehova?

• “Masu anyu . . . yaakihakalaliha, kichapa, ntakhara kinniichaneliwa nsina nanyu, Apwiya Muluku.”—Yer. 15:16.

Opatiso oneeriwa elukuluku ya mithukumano sa ekulucu ni sa muceche sa Anamoona a Yehova. Omakuchuwelo wa mwaha wa opatiso, namaloca onahaala waaveka alipa awiiveleela ntakhara opatiso wi yeemele nave yaakhule ni masu oovuwa makoho ala meeli anacharela:

1. Apwanne moocharuwa soocheka sanyu, mwiiveleela mukhatiinyu wa Yehova, nave mweemererya ephiro awe yawoopola moorweela wa Yesu Kristu?

2. Nyuwaano munniiwexexa wi opatisiwa wanyu onnawooneihaani wi mwa mmoha a Anamoona a Yehova mwawiiwanana ni marehereryo a Yehova?

Waakhula waweemererya makoho ala onaphitaanyerya ‘oloca vanlakani’ wa nroromelo na alipa awiiveleela ntakhara opatiso ni wi mweeparipari awo ahiiveleela mukhataaya wa Yehova. (Aro. 10:9, 10, TNM) Alipa awiiveleela ntakhara opatiso anaphwanela wuupuwelela ni ovekela vooloca sa makoho ala elukuluku ehaakumve wi ewerye waakhula mwawiiwanana ni olekecheya waya.

Apwanne mohiiveleela mukhatiinyu mu nivekelo wa Yehova, muroromelihaka wi munahaala omulapelaka yoowo pahiru ni weerano yookhwela awe okhala echu yoochuneya mookumini mwanyu?

Apwanne munoona wi mookhwaanela chiryene wi mpatisiwa va ekari enahaala okhumelela?

Yoowara taani eri yoophwanelela ntakhara opatiso? (1 Tim. 2:9, 10; Yoh. 15:19; Fil. 1:10)

Nnaphwanela owara “moophwanelela” wi nooniherye “omulapa wahu Muluku.” Mwawiihiiha, yaale onaya opatisiwa hanaphwanela owara soowara sa weekhano naari soowara soorempwa. Awo anaphwanela owara mmukhalelo waphaama, woocicimiheya, ni woophwanelela ntakhara yaweereya.

Muchu aapatisiwaka onaphwanela wiikhaliha hai? (Luka 3:21, 22)

Opatiso wa Yesu woovaha yootakiherya ntakhara opatiso Weekristu olelo. Owo aahiiwexexa wi opatiso echu etokotoko, nave eyo yaahooneya mmukhalelo awe ni saweera sawe. Mwawiihiiha nipuro na opatiso tahi nipuro na wooniherya ohakalala woohiphwanelela, othata, weekha, naari mukhalelo mukina waahaala waakanyerya ochuneya wa elukuluku eyo; naari Mukristu muvyaani hanaphwanela onyakula woohiphwanelela ntoko ovootha otokotoko. Naamwi opatiso ekhanle elukuluku ya ohakalala, ohakalala iwo onaphwanela wooniheryiwa mmukhalelo wa ncicimiho.

Oyaaka mmithukumano moohihiyererya ni okhala vamoha ni muloko enahaala wookhaviheryaani hai okhala mwawiiwanana ni wiiveleela wanyu wa Yehova?

Mmanle opatisiwa, ntakhara heeni ti woochuneya opwahiherya okhalano marehereryo aphaama a yoohuserya ya muchu mukhateiye ni olaleerya moohihiyererya?