Tiheeni Muluku Aakhweleiye Wa Hiyaano?

WAKHALA wi mohaalakhanya eyornali, omoona televisau, naari onwiriyana raatio, munnoona ni wiiwa saweereya sincipale vooloca sa wiiphana, ikhoco, ni anamaahita. Akhweya nyuwaano munnahooxeya ni ereca naari nthowa na okhwa wa muchu mwaamusivelaanyu.

Mwiikohe:

• Ti yeela Muluku aakhweleiye wa miyo ni amusi aka?

• Ti woowi kinahaalaaka ophwanyawo nikhaviheryo wi kivilele ni makacamiho aka?

• Apwanne onarwa okhalavo murecele?

Piipiliya onnavaha maakhulo oophwanelela wa makoho yaala.

PIIPILIYA ONAHUSIHA WI MULUKU ONAHAALA OTOROKA ICHU VEELAPONI YA VATHI.

• Achu herwa enahooxeya, wuuluvala, naari okhwa.​—Wupulula 21:4

• “Mutxhu òrakala oni atxupheke ntoko muheku.”​—Isaiya 35:6

• “Mitho a atxhu òhona anamuhuleya.”​—Isaiya 35:5

• Alipa ookhwa anamukookela okhala akumi.​—Yohani 5:28, 29

• Haavo onii iiceliweke.​—Isaiya 33:24

• Achu oothene anamukhalano yoolya yawaaca.​—Salumu 72:16

MUKUMIHE MPHURELO WA YEEYO PIIPILIYA ONAHUSIHEIYE

Ti wookhweya wuupuwela wi yeeyo mwaalakhannyaanyu woopaceryani sooloherya satheru. Nyenya Muluku talaihenrye weerano matorokelo yaawo veelaponi ya vathi moohilekela, nave Piipiliya onnathariha mukhalelo owo onahaaleiye weerano.

Piipiliya onnanleela ichu sincipale. Owo onnaloca echu nnaphwanelaahu weera wi nikhaleno okumi waphaama hiihaano. Muupuwele vooloca sa sawuukhula munakumanaanyuno. Akhweya makacamiho a ophwanya ikhorowa wi mvakulele echoko, wiiceliwa, naari okhwa wa muchu mwaamusivelaanyu. Piipiliya onanwerya wookhaviheryaani ovootha makacamiho yaawo, ni woohakararyaani moorweela wa waakhula makoho ntoko ala:

• Ntakhara heeni ninnahooxeya?

• Nnii nivilele hai ni makacamiho ahu?

• Echoko ahu enanwerya okhala yoohakalala?

• Tiheeni eneereya ni hiyaano vaavaa nnakhwaahu?

• Nnarwa niwoona wanaawiili oosiveliwa ahu akhwile?

• Ntakhara heeni nnaphwanela ororomela wi Muluku onahaala waakhwaniherya soothene ororomelinheiye?

Nthowa na omwaalakhanya wanyu liivuru ola ennooniherya wi munnachuna ohuserya yeeyo Piipiliya onahusiheiye. Liivuru ola onamookhaviheryaani. Vathi aakhalavo makoho a iparakrafo, yaawo enii wookhaviheryaani omwiiwexexa phaama Piipiliya. Ancipale annasiveliwa omuhuserya Piipiliya ni Anamoona a Yehova. Nnaweherya wi nyuwaano tho munamusiveliwa. Muluku onahaala wooreelihaani vaavaa munahuseryaanyu yeeyo Piipiliya onahusiheiye!