NIKOHO 5

Tiheeni Kinaphwanelaaka Weera Karoxiwa Oxikola?

ELA TI YOOCHUNEYA

Mukhalelo onaakhulelaawe oroxiwaka, onahaala oreherya naari otepiha ichu.

WAAHAALA WEERA EHEENI?

Wuupuwele yaweereya ela: Leyonarto hanakhwela oya oxikola mahiku yaala nthowa na oroxiwa. Epaceryaka asinthamwene awe yaarimmootherya. Elukuluku vakhaani emmora omuroha ni masina oohiyanahiyana navetho veelukuluku vaya onnakhala onamukapasa alivuru awe oothe ariki tahi wi orimulakela. Naari anaamiravo akina annavira oculi wawe emukakha nave vaavaa onarukunuweiye hanamoona muchu ene omukankhe. Vano echu etempexa ti ya wi ookhala omoopopinhe mu interneti . . .

Waari Leyonarto wahaala weera hai?

WUUPUWELE ELA!

Wuupuwele wi wookhalano owerya, wi osephe oroxa woothene onakumanaaweno ohiwanne! Nyenya wi weereno onaphwanela ochariha ela:

OHAAKHULE. Piipiliya oni: “Mulolo onnoneiha esara awe yoothene; awisumala, onnavòtha esara awe, amàla.” (Masiposipo 29:11) Weererye okhala oomaleleya naari ewiicelaaka mmurima, yakhala wi woheerano hiihaa onamukhala oocicimiheya.
OHIKOOKIHE YOONANARA. Piipiliya oni: “Muhilive yonanara ni yonanara.” (Aroma 12:17) Winla ikuhu onamutepiha ichu.
OSEPE YAWOOPIHA. Piipiliya oni: “Mutxhu amiruku, onnona yawopiha, ipitha.” (Masiposipo 22:3) Wiilipixerya wi okhale ocai wa yaale anahaala oweerela yoonanara, navetho osepe echu yahaala ovolowela oroxa.
OREHERYE NAAKHULO. Piipiliya oni: “Wakhula wopisa murima, ovukula onanariwa.” (Masiposipo 15:1) Onaphwanela omwaakhula moocicimiheya. Ntoko yootakiherya, yakhala wi muchu oowichana ariki: “Muneneva we,” omwaakhule moohakalala oriki: “Chiryene, kinaphwanela okukuca mwiili aka vakhaani!”
OPWAHEVO. “Natiya a iyaakha 19 sa oyariwa ooloca: Omaala onooniherya wi wa awiichwelavo ni oolipa murima ompwaha mulipa ooroxa, nave ennooniherya wi woosuwela oneeraawe ompwaha owo.”—2 Timóteo 2:24.
WIISOONE OKHALA OOPHWANELA. Alipa ooroxa annasuwela wakhala wi honiiroromela naari honiisoona okhala oophwanelela. Nyenya awo anamaala yakhala wi hawenrye oweerela yeeyo yaakhwelaaya.
OLOKOHE. Mulipa oohusiha mmoha aaloca ariki: “Mi kinnalipixerya oloca wi ani anaroxiwa alokohe, ntakhara wi eyo echu yoophwanela weera nave enneeriha wi akina enoova”.

Mmiravo onnamvootha mulipa ooroxa nthowa na wiiroromela — Wiiroromela onamoovaha ikuru, seiyo mulipa ooroxa ohireiyeno

**WUUPUWELELE**
EPARIPARI NAARI ETHERU	MAAKHULO
1 Oroxa opacenrye khalai.	1 Eparipari. Ntoko yootakiherya, Piipiliya onnaaloca achu yaari oopwaalu yaasuweliwe ntoko Anefilimu yaawo yaahooxa akhwaaya.—Maphatxuwelo 6:4.
2 Oroxa mukhalelo wa othata. Tahi owana.	2 Etheru. Amiravo ancipale anniisiipha nthowa na oroxiwa.
3 Mukhalelo waphaama wa wiisaakiha ori owana.	3 Etheru. Alipa ooroxa ancipale takuru opwahana ni ole onaroxiwa. Mwawiihiiha, weererya owanano honakhaviherya.
4 Wamoona muchu aroxiwaka ti yaphaama omaala.	4 Etheru. Tahi woophwanelela okhuwa echu yeeren’ye. Yakhala wi woomoona muchu aroxiwaka nave ohilokoha, onahaala waacererya makacamiho ohiyana omaliha.
5 Muchu ooroxa naamwi ari awiirumiha, onnoova.	5 Eparipari. Alipa ooroxa ancipale aniisoona okhala akuru. Nyenya haniiroromela, aneerano yeeyo wi yiisaakihe.
6 Achu oopwaalu annapaka matorokelo.	6 Eparipari. Alipa ooroxa annatoroka mukhalelo aya wa wuupuwela yakhala wi akhaviheryiwa.