NIKOHO 9

Ti Woophwanelela Weemererya wi Ichu Irimoona Ophacuwa?

ELA TI YOOCHUNEYA

Yaakhanle wi nrimoona ophacuwa, ekumi hiyaano yootaphulela. Vano narimpatuxiwa, nnahaala owerya ophwanya maakhulo a makoho vooloca sa okumi ni omwaahiyu.

WAAHAALA WEERA EHEENI?

Waanyiherye yaweereya ela: Aleksi aanamuroromela Muluku ni soopatuxiwa, vano ori oohaleeliheya. Muhusiha awe ooxikola aaloca wi mukhalelo wa ophacuwa ti waweemereryiwa ni Siyensiya. Aleksi hanachuna wuuliheya muru variyari va asinthamwene awe, ahisuwelaka yaweera owo onniikoha: ‘Yaakhanle wi siyensiya onneemererya wi ophacuwa echu yeeparipari, vano miyaano kaani wi kikhweeke minikwa?’

Yaakhanle wi wa Aleksi, waahaala weemererya ophacuwa nthowa na wi aliivuru ancipale anneemererya wi eparipari?

WUUPUWELE ELA!

Achu ancipale anamoona ororomela yeeyo asuwenlaaya, nyenya hanasuwela ntakhara heeni anaroromelaaya.

Ancipale annaroromela wa soopatuxiwa nthowa na wi ahusenrye okerexa.
Akina anaroromela sa ophacuwa nthowa na wi ahusenrye oxikola.

MAKOHO MATHANU NAMOHA

Piipiliya oni: “Empa yòkhalano otenkè, nave namateka a sothene ti Muluku.” (Ahebri 3:4) Apwanne yeela eparipari?

Mmiravo awehaka empa — Oloca wi ekumi erimoona ophacuwa ori ntoko oloca wi empa yeela haavo otenke

YOOLOCA: Ichu soothene sa veelaponi irweenle ni ophuwa otokotoko.

1. Taani otannyile ophuwa otokotoko?

2. Teevi eri yoophwanelela weemererya ti yawi ichu irimoona ophacuwa, naari wi ookhala opatunxe?

YOOLOCA: Achu arweenle wa asinama.

3. Yaakhanle wi achu arweenle wa asinama—ntoko akhole, vano ntakhara heeni masuwelelo aachu ni asinama toohiyana?

4. Ntakhara heeni soopatuxiwa ikina eryaaya yawooniherya?

YOOLOCA: Othatuwa wa ichu ti weeparipari.

5. Achu analoca sa yeela apwanne aatholathola phaama?

6. Apwanne onaphwanela weemererya yeela nthowa na oleeliwa wi achu oohuserya anneemererya tho?

“Yaakhanle wi munamweeca mutakhwani mphwanya empa yaphaama ya miri, apwanne mwahaala wuupuwela wi makukhu tamonre yuukelana vava epakeya empa eyo? Mweeparipari hooye! Vano ntakhara heeni weemererya wi ichu irimoona ophacuwa mwiilaponi?”—Xuliya.

“Wuupuwele wi ookhala ooleenle ariki etinta yoophuwa weiwo onapakiwawo aliivuru nave ephateeleya muxirini, erepeyamo masu a tisiyonariyu mutokweene. Mpwanne wahaala wemererya?”—Kweni.

ONNAROROMELA SA MPATUXA?

Piipiliya onnaniceenyerya wi nipharihele muupuwelo. (Aroma 12:1) Eyo enataphulela wi hannaphwanela weemererya sa mpatuxa nthowa na:

OTIKHINIHEYA (Kinuupuwela wi ookhalavo mutokweene)
WAACHARIHA AKINA (Kinakhala mmarehereryo a ekerexa)
OKINYEERERYIWA (Asitiithi aka yakihusiha ororomele wi Muluku ookhala, nave mi kaahaleela yaweera.)

Ohiya wiimukhinyeereryiwa, we onaphwanela okhalano mathowa oolipa wi weemererye ichu ikina.

“Vaavaa kinakhalaaka oxikola, muhusiha aka analoca mukhalelo wa malapelo a mwiili ahu, kinnoona wi chiryene Muluku ookhala. Makupa ari oothene a mwiili ahu naari eyemve yookhala analapaaya, nave enakhala ntoko hanasuwanyeya olapa waya. Mwiili ahu ti wootikhiniha!”—Teresa.

“Vaavaa kinoonaka empa ya muconco etempe orakama, Pophoro, naari Ekaaro kinniikoha wi: Taani upuwelihe seiya ? Ti woochuneya okhalano miruku wi muchu uupuwele mukhalelo wa ekaaro, Mithipo taani inahaala ovolowavo wi elapeke phaama. Vano waari mwi ori woochuneya okhalavo mulipa awuupuweliha mukhalelo wa opaka ekaaro, hanka vooloca sa mukhalelo wa muchu?”—Rikarto.

“Elukuluku kaamuhuseryaaka liivuru onaloca sa ophacuwa, waakhala woowalamela weemererya ophacuwa wa ichu. . . . Wa miyo weemererya wi ichu irimoona ophacuwa onakhweleya nroromelo nincipale opwaha weemererya opatuxiwa wa ichu.”—Antoniyo.

ONOONA HAI

Alipa oohuserya apacenrye otholathola khalai sa ophacuwa wa ichu nyenya nivano hasuwenle yeeparipari sa mwaha yoola. Vano eri alipa oohuserya yaawo anooniwa okhala oosuwelaxa ehisuwela yeeparipari, apwanne ti yoonanara ovaanya wi ichu irimoona ophacuwa?