Muchaka woochuneyasa onalociwa Mpiipiliyani ti Omwene wa Muluku. Yehova onahaala opharihela muteko Omwene yoola wi eerihe elapo okhala Parataiso. Mwawiihiiha, Omwene owo tiheeni? Nnasuwela hai wi Omwene owo onnalamula hiihaano? Tiheeni Omwene yoowo owenryaaya waakhwaniherya? Nave tiheeni onahaalaaya opaka omwaahiyu? Mwaha yoola ni miyaha miili sinacharela inahaala waakhula makoho yaala.

1. Omwene wa Muluku tiheeni, nave taani ori Mwene a Omwene owo?

Omwene wa Muluku olamulelo otikitheryiwe ni Yehova. Yesu Kristu tori Mwene, owo onalamulela orweela wirimu. (Mateu 4:17; Yohani 18:36) Piipiliya onaloca wi Yesu: “Anarwa alamulela . . . mahiku oothene.” (Luka 1:32, 33, NN) Ntoko Mwene a Omwene wa Muluku, Yesu onahaala waalamulelaka achu oothene a veelaponi ya vathi.

2. Taani anahaala olamulela ni Yesu?

Yesu hanii alamuleke meekheiye. Achu oorweela “mahimo oothene, a ilocelo soothene, a maloko oothene ni a ilapo soothene . . . anarwa elamulela veelaponi ya vathi.” (Wupulula 5:9, 10) Achu akavi anaya olamula ni Yesu? Vaavaa Yesu aaruuleiye veelaponi, macikhwi aachu yaakhala oomuchara awe. Pahiru achu awaakhwana 144.000 tanahaala oya wirimu wi yalamuleleke ni Yesu. (Mwaalakhanye Wupulula 14:1-4.) Nto Akristu oothene anahaala okhala veelaponi anaya okhala anamurala a Omwene owo.—Salumu 37:29.

3. Ntakhara heeni Omwene wa Muluku oryaaya woochuneya opwaha olamulelo wa achu?

Naamwi alamuleli yeereryaka opaka ichu saphaama wa achu, awo haanono owerya wa opaka ichu soothene anachunaaya. Nave alamuleli yaala tawiirumiha nave hanachuna waakhaviherya achu. Moohiyana ni olamulelo wa achu Omwene wa Muluku horwa oraceeliwa ni olamulelo okina. Muluku “onarwa otikitherya omwene mukina yoowo onii ohiwerye omwariwa.” (Daniyeli 2:44) Yesu onarwa alamulela elapo yoothene ya vathi nave onahaala waakhalihaka achu oothene mwaphaama ni moolikana. Owo tho toosivela, ooreera murima, ni awookololowa, nave onamwaahusiha achu waakhaliha akina—moosivela, mooreera murima, ni mwawookololowa.—Mwaalakhanye Isaiya 11:9.

4. Omwene wa Muluku onahaala olamulela elapo yoothene

Yesu Kristu ookhalano owerya wa olamulela waapwaha alamuleli akhanle. Mwaalakhanye Mateu 28:18, nave voocharela muthokororye nikoho nla:

• Mano owerya Yesu oreiyeno wa olamulela onahiyana hai ni olamulelo wa achu?

Olamulelo wa achu onnaraceeliwa ni olamulelo mukina, nave mmoha ti mmoha onalamulela makupa a vakhaani a elapo. Hanka vooloca sa Olamulelo wa Muluku? Mwaalakhanye Daniyeli 7:14, nave voocharela muthokororye makoho ala:

• Ntakhara heeni ti yaphaama osuwela wi Omwene wa Muluku honi ‘owerye omwaryiwa’?

• Ntakhara heeni ti yaphaama osuwela wi Omwene wa Muluku onahaala olamulelaka elapo yoothene?

5. Alamuleli a achu annaphwanela oraceeliwa

Ntakhara heeni Omwene wa Muluku onnaphwanela waaraceela alamuleli oomuchu? Moone EXILEMA, nave muthokororye nikoho nnacharela.

EXILEMA: O que é o Reino de Deus?—Trecho (1:41)

• Sookhumelela taani sa olamulelo wa aachu?

Mwaalakhanye Eklesiyaste 8:9, nave voocharela muthokororye makoho ala:

• Apwanne munoona wi olamulelo wa Muluku onnaphwanela oraceela olamulelo wa achu? Ntakhara heeni?

6. Omwene wa Muluku wookhalano alamuleli ananiiwexexa

Mwene ahu Yesu, aakhala veelaponi ntoko muchu, mwawiihiiha owo onanwerya ‘omoriwa ikharari ni oceecheya wahu.’ (Ahebri 4:15) Opwaha yeeyo, Yehova ohaathanla a 144.000 alopwana ni athiyana oororomeleya wi yalamulele ni Yesu wa achu “a mahimo oothene, a ilocelo soothene, a maloko oothene ni a ilapo soothene.”—Wupulula 5:9.

• Apwanne nyuwaano munoona wi Yesu ni yaawo anahaala olamulela ni yoowo anniiwexexa makacamiho yaawo nnahoolelaahu? Ntakhara heeni?

7. Malamulo a Omwene wa Muluku toochuneya opwaha malamulo aachu

Alamuleli annapaka malamulo wi yaakhaviherye ni waakhapelela achu. Omwene wa Muluku tho wookhalano malamulo wa yaale anachariha. Mwaalakhanye 1 Korinto 6:9-11, nave muthokororye makoho anacharela:

• Waakhanle wi achu oothene anniiwelela malamulo a Muluku munoona wi elapo yaahala okhala hai?a

• Apwanne nyuwaano munoona wi Yehova ookhalano ophwanelela wi achu yiiweleleke malamulo awe? Ntakhara heeni?

• Tiheeni enooniherya wi achu ahiniiwelela malamulo yaala ananwerya opaka matorokelo?—Moone eversikulu 11.

MUKWASU

Omwene wa Muluku olamulelo okhanle wirimu nave onahaala olamulela elapo yoothene.

Makoho awuuluulela

• Taani ari alamuleli mu Omwene wa Muluku?

• Ntakhara heeni olamulelo wa Muluku ti woochuneya opwaha olamulelo woothene wa achu?

• Ichu taani Yehova onaweheryeiye wi achu yeere wi epake makupa mu Omwene awe?

OTHOLATHOLA

Muthokororye yeeyo Yesu ohusinheiye vooloca sa ti woowi Omwene wa Muluku oryaayawo.

“O Reino de Deus é algo que está em nosso coração?” (Artigo do jw.org)

Ntakhara heeni Anamoona a Yehova annathanla okhala oororomeleya mu Omwene wa Muluku ohiya ororomela mu olamulelo wa achu?

Dedicados ao Reino de Deus (1:43)

Muthokororye yeeyo Piipiliya onaloceiye sa a 144.000 yaawo Yehova aathanlileiye wi yalamulele vamoha ni Yesu.

“Quem vai para o céu?” (Artigo do jw.org)

Mukariposo, tiheeni yaamulekenche muthiyana mmoha wi pahiru Muluku tonahaala oviihavo ohookololowa veelaponi?

“Minha busca por um mundo sem injustiça” (Despertai!, novembro de 2011)

Omwene wa Muluku opacenrye olamulela wirimu mu eyaakha ya 1914. Ti elukuluku yeeyo tho yaapacenryaaya mahiku ookuchula a olamulelo wa achu. Nnasuwela hai yeeyo? Muthokororye sooloherya sa Mpiipiliyani ni mukhalelo ichu veelaponi saakhanlaaya ovinyerya mu 1914.

1. Tiheeni sooloherya sa Mpiipiliyani inalocaaya?

Mpiipiliyani mu liivuru a Taniyeli onnaloca wi omwene wa Muluku waahaala opacerya olamulela omakuchuwelo wa elukuluku eniichaniwa “ilukuluku thanu napiili.” (Daniyeli 4:16, 17) Iyaakha masana masaneene ohoolo waya, Yesu aahiloca sa elukuluku yeeyo ntoko “mahiku . . . a amalapo ekhwanenle,” nave owo aahihusiha wi elukuluku ene yeeyo hiyaamanle. (Luka 21:24, NN) Ntoko nnahaalaahu woona ilukuluku thanu napiili saamanle eyaakha ya 1914.

2. Tiheeni eneereya mweelaponi ovinyerya eyaakha ya 1914?

Oohuserya a Yesu yaamukoha: “Ichu seiyo inaya weereya liini? Eneneeryo aya tiivi ya ophiya wanyu ni makuchuwelo a ilukuluku?” (Mateu 24:3) Mu naakhulo, Yesu aaloca ichu piili saahaala weereya vaavaa aahaaleiye opacerya olamula wirimu ntoko mwene a Omwene wa Muluku. Emoha sa ichu seiyo, saaphitaanyerya ikhoco, othowa wa yoolya, ni ocikinyeya wa elapo. (Mwaalakhanye Mateu 24:7.) Piipiliya tho aaloca mukhalelo achu yaahaala okhala “mmahiku ookuchula” wi wa nthowa na yeeyo okumi waahaala okhala “ilukuluku sa sookacamiha.” (2 Timóteo 3:1-5) Ovinyerya eyaakha ya 1914 ichu seiya sinnatitelela waaceereryeya vancipale.

3. Ntakhara heeni ichu seiya soonanara sinnaaceereryeya ovinyerya vaava Omwene wa Muluku waapacenryaaya olamulela?

Elukuluku vakhaani vaavaa Yesu aapacenryeiye olamulela ntoko Mwene a Omwene wa Muluku, owo aawaniha ekhoco wirimu ni Satana vamoha ni masololo. Mu ekhoco yeela Satana aavoothiwa. Piipiliya onaloca wi owo “vaiye ni ankeelo awe yaariheliwa veelaponi ya vathi.” (Wupulula 12:9,10, 12) Satana oosareya owali woona wi oosuwela wi onahaala otoloxiwa. Mwawiihiiha owo onnatannya wiicela otokweene ni ohooseya veelaponi yoothene. Eyo ennanikhaviherya wiiwexexa mathowa aneeriha elapo okhala yoonanara! Nyenya Omwene wa Muluku onahaala omaliha makacamiho oothene.

OHUSERYA MWAWIISEELA

4. Sooloherya sa Mpiipiliyani sinnooniherya eyaakha ya 1914

EXILEMA: O Reino de Deus começou a governar em 1914 (5:02)

Muluku aaheeriha wi mwene akhalai o Papulu, Napukotonosori, akhaleno yooloha, mu yooloha yeeyo Yehova aamooniha yeeyo yaahaala weereya muhoolo. Taniyeli aathariha yootaphulela aya, nave yooloha eyo yaataphulela omwene wa Napukotonosori ntoko Omwene wa Muluku.—Mwaalakhanye Daniyeli 4:17.a

Mwaalakhanye Daniyeli 4:20-26, nave voocharela mpharihele ekaaxa wi mwaakhule makoho anacharela:

• (A) Tiheeni Napukotonosori oonneiye mu yooloha awe?—Moone eversikulu 20 ni 21.

• (B) Tiheeni yaahaala weereya ni mwiri?—Moone eversikulu 23.

• (C) Tiheeni yaahaala weereya omakuchuwelo wa ilukuluku “thanu napiili”?—Moone eversikulu 26.

Ti Mwawiihai Omwene wa Muluku Oniiwananaaya ni Yooloha ya Mwiri

YOOLOHERYA (Daniyeli 4:20-36)

Olamulelo

(A) Mwiri woorekamaxa

Waahaala omaala olamulela

(B) “Mwiri wuuhiwe,” ophiyerya “ilukuluku thanu napiili”

Waahaala okookela olamulela

(C) ‘Aakookela olamulela’ naari aakookiheryiwa

Waakhwanela wanaawiili wa yooloherya yeela . . .

• (D) Mwiri onamweemelela taani?—Moone eversikulu 22.

• (E) Ti liini aahin’yeiye olamulela?—Mwaalakhanye Daniyeli 4:29-33.

• (F) Tiheeni yeeren’ye ni Napukotonosori vookuchulani wa “ilukuluku thanu napiili”?—Mwaalakhanye Daniyeli 4:34-36.

WAAKHWANELA WOOPACERYA

Olamulelo

(D) Napukotonosori, Mwene o Papulu

Waahaala omaala olamulela

(E) Evinre eyaakha ya 606 E.E.K., Napukotonosori aapacerya opaka ichu ntoko naanepa nave ahinawerya olamulela ophiyerya mu iyaakha thanu napiili

Waahaala okookela olamulela

(F) Napukotonosori onnakhala phaama nave onnakookela olamulela wanaawiili

Waakhwanela wanaawiili wa yooloherya yeela . . .

• (G) Mwiri onamweemelela taani?—Mwaalakhanye 1 Matharihelo 29:23.

• (H) Ti liini awo yaahin’yaaya olamulela? Nnasuwela hai wi awo hiyaalamulela vaavaa Yesu aaruuleiye veelaponi?—Mwaalakhanye Luka 21:24.

• (I) Ti liini nave ti woowi omwene owo waapacenryaaya alamulela?

WAAKHWANELA WANAAWIILI

Olamulelo

(G) Mamwene o Isarayeli yeemelela olamulelo wa Muluku

Waahaala omaala olamulela

(H) Yerusalemu onnatoloxiwa, mamwene o Isarayeli annamaala olamulela ophiyerya iyaakha 2.520

Waahaala okookela olamulela

(I) Yesu aapacerya olamulela ntoko Mwene a Omwene wa Muluku

5. Elapo yootepa otorokeya ovinyerya eyaakha ya 1914

Moone EXILEMA.

EXILEMA: O mundo mudou desde 1914 (1:10)

Yesu aaloherya mukhalelo elapo yaahaalaaya okhala vaavaa aahaaleiye okhala Mwene. Mwaalakhanye Luka 21:9-11, nave voocharela muthokororye nikoho nla:

• Ichu taani ikina sa seiya munoonaanyu olelo?

Murummwa Paulo aaloca mukhalelo achu yaahaalaaya okhala mmahiku ookuchula mu olamulelo wa achu. Mwaalakhanye 2 Timóteo 3:1-5, voocharela muthokororye nikoho nla:

• Wa mikhalelo seiya apwanne ti sawooneya wa achu olelo?

6. Ninnachuna okhaviherya Omwene wa Muluku

Mwaalakhanye Mateu 24:3, 14, nave voocharela muthokororye makoho ala:

• Muteko taani wookhweleyasa yoowo onooniherya wi Omwene wa Muluku onnalamulela?

• Ti mwawiihai nyuwaano munahaalaanyu opaka makupa mmuteko yoola?

Omwene wa Muluku onnalamulela, nave ninnaacamela nihiku onahaalaaya olamulela elapo yoothene. Mwaalakhanye Ahebri 10:24, 25, nave voocharela muthokororye nikoho nla:

• Tiheeni mmoha ti mmoha onaphwaneleiye opaka vaavaa nnoonaahu wi “ninnaacamela nihiku”?

MUKWASU

Sooloherya sa Mpiipiliyani ni mukhalelo wa elapo, sinnooniherya wi Omwene wa Muluku onnalamulela. Vaavaa nnalaleeryaahu ni ophwanyeya mmithukumanoni, ninnooniherya wi ninnaroromela Omwene yoowo.

Makoho awuuluulela

• Tiheeni yeeren’ye wookuchulani wa ilukuluku thanu napiili inalociwa mu liivuru a Taniyeli?

• Tiheeni enoolekechaani wi Omwene wa Muluku opacenrye olamulela eyaakha ya 1914?

• Ti mwawiihai munahaalaanyu wooniherya wi Omwene wa Muluku onnalamulela?

OTHOLATHOLA

Moone yeeyo alipa ooloca miyaha ni akina aloncaaya sa yeeyo yeeren’ye ni elapo ovinyerya mu 1914.

“O tempo em que a moral foi corrompida drasticamente” (Despertai!, abril de 2007)

Moone ti mwawiihai yooloherya ya Mateu 24:14 yaatoronkaaya okumi wa mulopwana mmoha.

“Eu amava o beisebol mais do que tudo!” (A Sentinela, n.^o 3 de 2017)

Nnasuwela hai wi yooloherya ya Taniyeli ekapitulu 4 ennaphariheleya mu Omwene wa Muluku?

“Quando o Reino de Deus começou a governar? (Parte 1)” (A Sentinela, 1.^o de outubro de 2014)

Nnasuwela hai wi “ilukuluku thanu napiili” inalociwa mu Daniyeli 4 imanle mu eyaakha ya 1914?

“Quando o Reino de Deus começou a governar? (Parte 2)” (A Sentinela, 1.^o de novembro de 2014)

Omwene wa Muluku onnalamulela wirimu. Moohilekela owo onahaala opaka matorokelo veelaponi. Mmwaha yoola nnahaala othokororya ichu ikina saphaama Omwene wa Muluku onahaalaya opaka.

1. Ti mwawiihai Omwene wa Muluku onahaalaya oruuha murecele ni wookololowa veelaponi?

Yesu Mwene a Omwene wa Muluku, onahaala waatoloxa achu oothene oonanara murima ni alamuleli a elapo mu ekhoco ya Armaketo. (Wupulula 16:14, 16) Yeela yeereya, enahaala waakhwanela yoororomeliha ya Mpiipiliyani eni: “Vahilekenle aweera soonanara hamuwoona tho.” (Salumu 37:10) Moorweela wa Omwene wa Muluku, Yesu onahaala oruuha murecele ni wookololowa mu elapo yoothene.—Mwaalakhanye Isaiya 11:4.

2. Okumi onahaala okhala hai vaavaa yookhwela ya Muluku enahaalaaya weereya veelaponi?

Mwaanyiherye okhala mu elapo yeeyo achu ari awookololowa, ooreera murima, anamusivela Yehova, ni anasivelana mukina ni mukhwaawe! “Onarwa aavaha awookololowa murima elapo ya vathi, yiikhalelaru mwemmo okhala wookhala.” (Salumu 37:29) Haavo muchu onahaala wiiceliwaka nave oothene anahaala okhala mweelaponi okhala wookhala.

3. Tiheeni Omwene wa Muluku onahaalaaya weera achu oonanara murima emanle otoloxiwa?

Emanle otoloxiwa achu oonanara Yesu onahaala olamulela mu iyaakha 1.000. Variyari va elukuluku yeeyo, Yesu ni a 144.000 anahaala waakhaviheryaka achu veelaponi okhala oophaameya. Omakuchuwelo wa iyaakha 1.000 elapo enahaala okhala Parataiso ooreera, nave achu oothene anahaala okhala oohakalala woona wi anahaala wiiwelelaka malamulo a Muluku. Voocharela Yesu onahaala waakookiherya olamulelo Atiithi awe Yehova. Opwahana khalai, nsina na Yehova nnahaala ‘weelihiwa.’ (Mateu 6:9, 10) Vaavaa nsina na Yehova nnahaalaaya weelihiwa enahaala okhala yookwakwaleya wi Yehova mulamuleli onaapwacha achu. Voocharela Yehova onahaala omutoloxa Satana, masololo, ni muchu vyakala onathanla omwaryeela olamulelo awe. (Wupulula 20:7-10) Wa nthowa na Omwene wa Muluku, okumi onahaala okhala woophaameya mmikhalelo soothene nave eyo enahaala okhala, okhala wookhala.

OHUSERYA MWAWIISEELA

4. Omwene wa Muluku onahaala omaliha olamulelo wa achu

Piipiliya onaloca wi “muchu mukina onnamulamulela mukhweiye amweerelaka yoonanara.” (Eklesiyaste 8:9) Yehova onahaala opharihela Omwene awe wi amalihe ohookololowa yoola.

Mwaalakhanye Daniyeli 2:44 ni 2 Tesalónika 1:6-8, nave voocharela muthokororye makoho ala:

• Tiheeni Yehova ni Yesu anahaalaaya weera ni alamuleli a elapo vamoha ni yaale anaakhaviherya yaawo?

• Ntakhara heeni munaphwanelaanyu olekecheya wi othoriha waya ti wawookololowa?

5. Yesu Mwene oophaameya

Ntoko Mwene a Omwene wa Muluku, Yesu onahaala opaka ichu saphaama wi aakhaviherye achu oothene a veelaponi. Moone EXILEMA enahaala wooniherya wi Yesu onnachuna waakhaviherya achu nave wi Muluku omvaha owerya wi eereno yeeyo.

EXILEMA: Jesus mostrou o que o Reino vai fazer (1:13)

Ichu seiyo Yesu aapankeiye ari veelaponi, sootakiherya sa ichu onahaaleiye opaka ntoko Mwene a Omwene wa Muluku. Mareeliho taani alociwe yaawo munachunaanyu woona yaakhwanelaka? Mwaalakhanye soorepa sa Mpiipiliyani iniiwanana ni mareeliho yaala.

6. Omwene wa Muluku onahaala oruuha omwaahiyu woohakalalihaxa

EXILEMA: Uma pequena amostra de um futuro maravilhoso (4:38)

Mwaalakhanye Salumu 145:16, voocharela muthokororye nikoho nla:

• Munoona hai vaavaa munasuwelaanyu wi Yehova ‘onnahakalaliha soopatushiwa soothene?’

MUKWASU

Omwene wa Muluku onahaala opaka soothene Muluku onachuneiye wi seereye. Eyo enahaala weeriha wi elapo ekhale Parataiso esaren’ye achu aphaama yaawo anahaala omulapelaka Yehova okhala wookhala.

Makoho awuuluulela

• Ti mwawiihai Omwene wa Muluku onahaalaya weeliha nsina na Yehova?

• Ntakhara heeni nnaroromelaahu wi omwene wa Muluku onahaala waakhwaniherya soororomeliha soothene sa Mpiipiliyani?

• Wa ichu soothene saphaama Omwene onahaalaya waakhwaniherya tiivi nyuwaano mwaachunaanyu woona yaakhwanelaka?

OTHOLATHOLA

Musuwele Armaketo tiheeni.

“O que é a batalha do Armagedom?” (Artigo do jw.org)

Mwaalakhanye yeeyo enahaala weereya ni Yesu mu olamulelo wa iyaakha miili, mwaalakhanye tho yeeyo enahaala weereya evinre elukuluku yeeyo.

“O que acontecerá no Dia do Julgamento?” (A Sentinela, 1.^o de setembro de 2012)

Moone ti mwawiihai echoko eneeraaya yiisaanyiherye eri mu Parataiso.

Imagine-se no Paraíso (1:50)

Mu mwaha “Muitas perguntas me perturbavam,” moone ti mwawiihai mulopwana okhumme mu epoliitika ophwannyeiye maakhulo a makoho aavyeiye.

“A Bíblia Muda a Vida das Pessoas” (A Sentinela, 1.^o de janeiro de 2012)