MWAHA 58
Mutitelele Okhala Oororomeleya wa Yehova
Akristu eeparipari ari oolakelela wi hiyaavo echu naari muchu ani aarakamelihe ni Yehova. Mweeparipari, nyuwaano munoona hiiha. Yehova onnatepa ovaha esisapo ororomeleya wanyu. (Mwaalakhanye 1 Matharihelo 28:9.) Mikhalelo taani saahaala weeha ororomeleya wanyu, nave muni mvoothe hai seiho?
1. Ti mwawiihai akina yaahaalaaya weeha ororomeleya wahu wa Yehova?
Achu akina anamweererya onihiiha omurumeela Yehova. Nyenya taani yaahaala weerano yeela? Akina yaawo ahin’ye eparipari annaloca sawootha ntakhara marehereryo a Muluku wi emwarye nroromelo nahu. Awo aniichaniwa alipa oomwaryeya. Ohiya yeeyoru tho, ahooleli akina a malapelo annamwaryamwaxa sawootha ntakhara hiyo wi yeererye waahuweliha akina mu eparipari. Ti yawoopiha weererya ovaanela ni yaawo ananiica, owaalakhanya aliivuru aya, oxekurya isaiti saya naari woona ixilema saya. Alocaka sa yaale aneererya waamaaliha akina omurumeela Yehova, Yesu aahi: “Mwaahiyeeni! Ari ahooleli oohoona. Muchu oohoona aanamuhoola oohoona mukhweiye, ooweeli ala anammorela mulicini.”—Mateu 15:14.
2. Ti mwawiihai soolakelela sahu sinooniheryaaya wi nri oororomeleya wa Yehova?
Omusivela Yehova onahaala onceenyerya osepa opaka echu vyakala yeeyo eniiwanana ni malapelo atheru. Ela enaphitaanyerya ohipaka makupa mu marehereryo naari mmuteko yoowo oniiwanana ni malapelo atheru. Yehova onnanlopola: “Khuma’mmoni [mu Papulu Mutokotoko], atchu aka.”—Wupulula 18:2, 4, NN.
OHUSERYA MWAWIISEELA
Muhuserye mukhalelo muneeraanyu nwerye omusepa muchu yoowo aahaala onanariha onthamwene anyu ni Yehova. Nave tho moone mukhalelo muneeraanyu nwerye wooniherya ororomeleya moorweela wa okhumamo mu Papulu Mutokotoko.
3. Mukhaleno ephoole ni mahusiheryo atheru
Tiheeni nnahaalaahu weera wakhala wi nohiiwa ichu soohiphwanelela vooloca sa marehereryo a Yehova? Mwaalakhanye Masiposipo 14:15, nave voocharela muthokororye nikoho nla:
Ntakhara heeni ninnaphwanela okhalano ephoole wi niheemererye ichu soothene nniiwaahu?
Mwaalakhanye 2 Yohani 9-11, nave voocharela muthokororye makoho ala:
Nnaphwanela waakhalihaka hai alipa oomwaryeya?
Hiyaano noosuwela wi tahi ya miruku oloca ni achu oomwaryeya. Nyenya ti mwawiihai naahaalaahu ovoloweliwa ni miruku saya?
Nyuwaano munuupuwela wi Yehova aahaala wiisoona hai waakhanle wi ninnawiriyana ichu soohiphwanelela vooloca sa yoowo ni marehereryo awe?
4. Mutitelele okhala oororomeleya wa Muluku naamwi munna apanke yoocheka
Wakhala wi noosuwela wi muchu mmoha mmulokoni oopaka yoocheka etokotoko, tiheeni nnaphwanelaahu weera? Moone yeeyo Muluku aalonceiye wa nloko na Isarayeli khalai. Mwaalakhanye Onamukutxho 5:1.
Hiiha ntoko eversikulu ela eloncaaya, wakhala wi noosuwela wi ookhala muchu opanke yoocheka etokweene mmulokoni, hiyaano nnaphwanela waaleela asitokweene a muloko. Nto nihaakumve weerano yeela, yaahaala okhala yaphaama omuceenyerya muchu owo mooreera murima wi aloce ni asitokweene a muloko nave alokohe yoocheka awe. Wakhala wi owo heenreno yeeyo, ororomeleya wahu wa Yehova onaphwanela onceenyerya oya waaleela asitokweene a muloko wa yeeyo nsuwenlaahu. Ti mwawiihai weerano yeela enooniheryaaya osivela woororomeleya wahu wa . . .
Yehova Muluku?
muchu yoowo opanke yoocheka?
akina mmulokoni?
Wakhala wi mukhwiinyu a munroromeloni ookhalano nikacamiho, mmukhaviherye!
5. Mukhale ocai wa Papulu Mutokotoko
Mwaalakhanye Luka 4:8 ni Wupulula 18:4, 5, nave voocharela mwaakhule makoho ala:
Apwanne nsina naka nlelo ninnaphwanyeya mmalapelo atheru?
Apwanne kinnapaka makupa a marehereryo yaawo aniiwanana ni malapelo makina atheru?
Apwanne muteko aka onnakhaviherya malapelo atheru mmukhalelo vyakala?
Apwanne aakhalavo makhalelo makina mu okumi aka kinaphwanelaaka wiivalaanya ni malapelo atheru?
Waakhanle wi naakhulo wa makoho yaala ti nawi aai, matorokelo taani kinaphwanelaaka opaka?
Mmikhalelo soothene, munaphwanela opaka yoolakelela yeeyo enahaala weeriha okhalano yawuupuxerya-ya-murima yaphaama ni yeeyo enahaala wooniherya ororomeleya wanyu wa Yehova.
Tiheeni munahaalaanyu weera wakhala wi moovekiwa wi mukhaviherye miteko sa malapelo atheru?
ACHU AKINA ANI: “Kinaphwanela osuwela yeeyo alipa oomwaryeya analocaaya vooloca sa Anamoona a Yehova wi kaakihe eparipari.”
Apwanne ela ti ya miruku? Waakhanle wi aai ntakhara heeni, naari waakhanle wi hooye ntakhara heeni?
MUKWASU
Wi ntitelele okhala oororomeleya wa Yehova, nnaphwanela osepa onthamwene ni yaawo aneererya onihuweliha.
Makoho awuuluulela
Ntakhara heeni nihinaphwanelaahu owiriyana miruku sa alipa oomwaryeya?
Wakhala wi noosuwela wi munna naari murokora oopaka yoocheka etokweene, tiheeni nnaphwanelaahu weera?
Nni niwerya hai wiiwelela olopola wa ochawa mmalapelo atheru?
OTHOLATHOLA
Muhuserye yeeyo munaphwanelaanyu weera vaavaa akina analocaaya sawootha vooloca sa Anamoona a Yehova.
“Apwanne Moosuwela Sinavolowela Mwaha?” (Mulipeleli a Akostu a 2018)
Muni nwerye hai osuwela marehereryo naari miteko seiho sinamukhaviherya Papulu Mutokotoko?
Tiheeni achu akina awaakaaha yeenraaya wi yeererye oceecheiha nroromelo nahu?
Mu yaweereya “Eu havia procurado por Deus desde a infância,” mwaalakhanye vooloca sa mulipa a mukucho a ekerexa Xintoista yoowo aahin’ye malapelo atheru.
“A Bíblia muda a vida das pessoas” (A Sentinela, 1.º de julho de 2011)