MWAHA WA EKAAPA | MULUKU ONNAWUUPUWELAANI NYUWO?

Muluku Onnawerya Woohakararyaani

“Yowo anahakararya awiroha, ti Muluku, ánikhaviherya hiyo.”​—2 AKORINTO 7:6.

NTAKHARA HEENI AKINA ANNAKHWA MINIKWA: Naamwi echunaka nihakararyo, achu akina anoona wi oceenya omveka Muluku wi aakhaviherye ovootha makacamiho aya. Muthiyana oniichaniwa Rakele onnaloca, “Vaavaa kinawoonaaka achu ancipale mulaponi ni makacamiho matokotoko yaawo anakumanaayano sawuukhula saka tahi echu ophiyerya woovelela omveka Muluku nikhaviheryo.”

MASU A MULUKU ANAHUSIHA EHEENI: Muluku oheeravo echu wi aakhaviherye ni waahakararya achu. Olelo, muchu ti muchu veelaponi yavathi oorava yoocheka​—oviliwa wiiwelela moophaameya malamulo a Muluku. Nyenya, Muluku “tánsivenle hiyo, nave támurummiye Mwanawe, akhale yawopola ntakhara a sotcheka sahu.” (1 Yohane 4:10) Moorweela wa okhwa wa Yesu, Muluku onneeriha okhala wooweryeya okhurumuweliwa soocheka sahu, okhalano yawuupuxerya-ya-murima yaweela, ni ewehereryo ya okumi woohimala mu elapo yahiihaano ya murecele.a Mano mukucho owo ti wa nloko noothene naachu, naari wi enooniherya wi Muluku onnoopwachaani?

Mmuthokororye murummwa Paulo. Owo aatepa olekecheya ni mukucho wa Yesu ophiyerya orepa: “Okumi yowo kiriakano hihano m’mwílini kirino mu nroromelo na Mwana a Muluku, yowo ákisivenle, íleva mekhiye ntakhara a miyo.” (Akalatiya 2:20) Chiryene, Yesu aakhwile Paulo ahaakumve okhala Mukiristu. Naamwi hiiha, Paulo oona mukucho yoowo ntoko yamahala ya Muluku wa yene mukhateiye.

Mukucho wa okhwa wa Yesu ti yamahala ya Muluku wa nyuwo tho. Yamahala yeela ennooniherya wi mwa muchu ookhweleyaxa wa Muluku. Mukucho owo onnoovahaani “otheya wohimala ni oweheryerya worera mwa ikharari,” ni “wokilathihani nyuwo m’muteko wothene ni masu othene aphama.”​—2 Atesalonika 2:16, 17.

Nyenya, Yesu aavanhe okumi awe ntoko mukucho iyaakha 2.000 ivinre. Tiheeni enooniherya wi Muluku onnawaavyaani olelo?

[Nsu na vathi]