Nyuwaano ‘Munnasuwelasha Sorepa’?
“Áháhulela mirima’ya, wi yasuwelashe sorepa.”—LUKA 24:45.
TIHEENI MUNAHUSERYAANYU ORWEELA WA NIPHWANAPHWANIHO NA . . .
mulipa a waala onakona?
moowaya?
mwaana oorimeela?
1, 2. Yesu aalipinhe hai oohuserya awe mu nihiku na ovinya wawe mookhwani?
NAARI nihiku na ovinya mookhwani wa Yesu. Oohuserya apiili yaamweeca eyaaka ekulucu yoorakamela o Yerusalemu ikilomeeturu sawaakhwana 11. Ehisuwelaka wi Yesu ooviihiwa mookhwani, awo yaari oothanana nthowa na saweereya. Mootutuxa, Yesu aahaaphiyerya nave aapacerya weecano vamoha. Owo aahaahakararya oohuserya yaala. Mwawiihai? “Ápacherya wa Mose, ni wa alipa-miririmu othene, áthoriherya m’sorepiwa sothe sene sa Yowo mekhiye.” (Luka 24:13-15, 27) Mweelukuluku yeele, mirima saya saapacerya olucuwa ntakhara Yesu ‘alocha ni yawo’naari ‘áhathoriherya sorepiwa.’—Luka 24:32.
2 Ohiyu yoole, oohuserya ale yaakookela o Yerusalemu. Vaavaa yaaphwannyaaya arummwa yaahaaleela yaweereya. Eriki muloca, Yesu aahaaphiyerya. Nyenya, arummwa yaari awuukhuwa. Yaakhalano minikwa mmirimani mwaya. Yesu aalipinhe hai? Ninnaleeliwa: “Áháhulela mirima’ya, wi yasuwelashe sorepa.”—Luka 24:45.
3. Makacamiho taani nnakumanaahuno, nave tiheeni enahaala onikhaviherya okhalano moonelo woophimelela vooloca sa orummwa wahu?
3 Ntoko oohuserya yaale, ilukuluku ikina ninnakhala oothanana. Akhweya nri ooweiwa mmuteko wa Apwiya nyenya nri oovolola nthowa na ohoona sookhumelela saya. (1 Akor. 15:58) Akhweya nnoona wi yaale nnaahusihaahu hanaya vahoolo. Akina a yaawo nnaakhaviheryaahu ananwerya omurukunuwela Yehova. Tiheeni nnaphwanelaahu weera wi nikhaleno moonelo woophimelela vooloca sa orummwa wahu? Echu emoha ori wiiwexexa phaama yootaphulela ya maphwanaphwaniho a Yesu yaawo ari mu Soorempwa Saweela. Hankooni nthokororye maphwanaphwaniho mararu ni yeeyo nnaweryaahu ohuserya.
MULIPA A WAALA ONAKONA
4. Teevi eri yootaphulela ya niphwanaphwaniho na Yesu na mulipa a waala onakona?
4 Mwaalakhanye Marko 4:26-29. Teevi eri yootaphulela ya niphwanaphwaniho na Yesu na mulipa a waala onakona? Mulopwana a niphwanaphwaniho onaweemelela alaleeryi a Omwene. Mmiso muchaka wa Omwene yoowo onalaleeryiwa wa achu eekhaikhai. Ntoko miteko sa nihiku nnihiku, mulipa a waala “akona, avinya ohiyu ni othana.” Wunnuwa oneereya voovira wa elukuluku, ovinyerya waala ophiyerya ohepha. Variyari va elukuluku yeeyo “mmiso wámela, wunnuwa.” Wunnuwa wuuwu oneereya “mekhaya,” vakhaani vakhaani. Moolikana, wunnuwa woomunepani oneereya tho vakhaani vakhaani. Vaavaa muchu onayeiye vahoolo ophiyerya ochuna omurumeela Muluku, owo onnavaha sawiima mmukhalelo wawi onnaveleela okumi awe wa Yehova nave onnapatisiwa.
5. Ntakhara heeni Yesu aapaka niphwanaphwaniho na mulipa a waala onakona?
5 Ntakhara heeni Yesu aapaka niphwanaphwaniho nenla? Yesu onnanikhaviherya osuwela wi ti Yehova pahiru onannuwiha eparipari mmirimani wa achu eekhaikhai. (Saw. 13:48; 1 Akor. 3:7) Hiyaano ninnaala nave ninnahela maahi, nave hannawerya wunnuwiha. Hiyaano hannawerya waakuviha wunnuwa owo. Ntoko mulopwana a niphwanaphwaniho, hannasuwela ti mwawiihai wunnuwa oneereyaaya. Iwo ti woohooneya vaavaa nnakhalaahu ooweiwa ni miteko sahu sa nihiku nnihiku. Moovira wa elukuluku, mmiso wa Omwene onnavaha yawiima. Oohuserya muvyaani onnuuka ni hiyo mmuteko wa ohaca, nave ninnaphura okhaviherya wawe.—Yoh. 4:36-38.
6. Tiheeni nnaphwanelaahu osuwela vooloca sa wunnuwa woomunepani?
6 Tiheeni nnaweryaahu ohuserya orweela wa niphwanaphwaniho nenla? Yoopacerya, nnaphwanela weemererya wi hannawerya weeciha wunnuwa woomunepani wa oomuhuserya a Piipiliya. Ophimelela onahaala onikhaviherya osepa yaweeha ya omukhinyererya oomuhuserya a Piipiliya opatisiwa. Ninneera yeeyo nnaweryaahu wi nimukhaviherye muchu, nyenya mwawiiyeviha ninnasuwela wi muchu owo tarino murici wa opaka yoolakelela. Yoolakelela enaphwanela orweela mmurimani onahooleliwa ni omusivela Muluku. Echu ekina yoohiyana ni yeeyo hiyaahaala weemereryiwa ni Yehova.—Sal. 51:12; 54:6; 110:3.
7, 8. (a) Echu taani ekina nnaweryaahu ohuserya orweela wa niphwanaphwaniho na Yesu na mulipa a waala onakona? Mvahe yootakiherya. (b) Ela enanihusiha eheeni vooloca sa Yehova ni Yesu?
7 Yanaawiili, wiiwexexa nihusiheryo na niphwanaphwaniho nenla enahaala onikhaviherya ohikhala oovolola wakhala wi woopaceryani hannoona sookhumelela sa muteko ahu. Nnaphwanela okhala oopisa murima. (Yak. 5:7, 8) Wakhala wi mmiso honavaha yawiima, naamwi niilipixenrye omukhaviherya oomuhuserya Piipiliya, ninnasuwela wi eyo henooniherya othoiwa wahu nroromelo. Yehova onneemererya wi mmiso wa eparipari wunnuwe pahiru mmurimani wawiiyeviha yoowo onachuna opaka matorokelo. (Mat. 13:23) Mwawiihiiha hannaphwanela waalakhanyerya orummwa wahu pahiru moorweela wa sookhumelela. Yehova hanaalakhanyerya oya vahoolo wa orummwa wahu moorweela wa waakhulela wa yaale nnaahusihaahu. Opwaha yeeyo, Yehova onnavaha esisapo owetha wahu woororomeleya moohipwacha sookhumelela.—Mwaalakhanye Luka 10:17-20; 1 Akorinto 3:8.
8 Yaneeraru, hannawerya osuwela matorokelo yaawo aneereya mpuwa mwa muchu. Ntoko yootakiherya, mutheli yoowo aahuserya ni misiyonaariyo mmoha yaamwaacamela, evekaka wi ekhale alaleeryi oohipatisiwa. Misiyonaariyo aawuupuxerya wi, wi ephwanelele opatisiwa yaachuneya ocharuwa omulya soona. Mootikhiniha, awo yaamuleela wi soovira miyeeri sawaaca ovinyerya vaavaa echarunwaaya. Ntakhara heeni yaacharuwa? Awo yaaphiyerya osuwela wi Yehova anwerya owoona emulyaaka soona nave owo onniica owoka. Mwawiihiiha mirima saya saaweeriha opaka yoothanla—ohimulya soona vakhiviru va misiyonaario ole naari ocharuwa moomalela. Osivela waya ovyaani wa Yehova waahaakhaviherya opaka yoolakelela yawookololowa. Awo yaanannuwa omunepani, ophiyerya misiyonaariyo ole haawerya wiiwexexa ti mwawiihai matorokelo yeereyaaya.
MOOWAYA
9. Teevi eri yootaphulela ya niphwanaphwaniho na Yesu na moowaya?
9 Mwaalakhanye Mateyu 13:47-50. Teevi eri yootaphulela ya niphwanaphwaniho na Yesu na moowaya? Yesu aalikanyiha olaleeryiwa muchaka wa Omwene wa achu oothene ni moowaya mutokweene mu eniya. Ntoko moowaya onapharaaya ihopa sincipale “sa miloko yothene,” muteko ahu wa olaleerya onnaakhupa macikhwi aachu a mukhalelo woothene. (Yes. 60:5) Waaca wa achu yaawo anarwa va muthukumano wa muceche ni Mukonelo iyaakha soothene ennooniherya yeeyo. Akina ari ntoko ihopa “saphama” nave annathukumanyiwa mmuloko Weekiristu. Akina, anooniwa okhala ihopa “sonanara”; tahi wi oothene yaale athukumanyiwe ari aweemereryeya wa Yehova.
10. Ntakhara heeni Yesu aapaka niphwanaphwaniho na moowaya?
10 Ntakhara heeni Yesu aapaka niphwanaphwaniho nenla? Othanleliwa wa ihopa honathoonya othoriha wookuchula variyari va yoohooxa etokotoko. Ohiya yeeyo, enavuwiha yeeyo enahaala weereya variyari va mahiku ookuchula a mukhalelo ola woonanara. Yesu aahooniherya wi tahi wi oothene yaale eemerenrye eparipari anahaala okhala mmakupa a Yehova. Ancipale annathukumana ni hiyo. Akina anniivaha omuhuserya Piipiliya ni hiyo nyenya hanapaka yoolakelela. (1 Mam. 18:21) Akina aahiya othukumana ni muloko Weekiristu. Amiravo akina anaphuiwa ni asitiithi Eekiristu nave nlelo hannuwinhe osivela malamulo a Yehova. Moohipwacha mukhalelo ene, Yesu aaceenyerya wi muchu ti muchu onaphwanela opaka yoolakelela awe. Yaale aneerano yeeyo vamiithoni vawe ari ntoko “muhakhu,” naari ichu soochuneyaxa wa maloko oothene.—Ageu 2:7, BNM.
11, 12. (a) Tiheeni nnaphuraahu orweela wa niphwanaphwaniho na moowaya? (b) Ela enanihusiha eheeni vooloca sa Yehova ni Yesu?
11 Tiheeni nnaphuraahu orweela wa niphwanaphwaniho na moowaya? Wiiwexexa nihusiheryo na niphwanaphwaniho nenla enahaala onikhaviherya osepa okhala ooceecheya naari ookhulumuwa wakhala wi oohuserya ahu a Piipiliya naari mwanihu hanapaka eparipari okumi awe. Eyo enahaala weereya moohipwacha owetha wahu. Weemererya omuhuserya Piipiliya naari ophuiwa mu eparipari henataphulela wi muchu onahaala wunnuwiha onthamwene woolipa ni Yehova. Yaale ahinachuna wiivoliiherya mu olamulelo wa Yehova moohilekela anahaala oviihiwavo variyari va achu a Muluku.
12 Apwanne ela enataphulela wi yaale ahin’ye eparipari herwa yeemereryiwa okookela mmulokoni? Naari wi wakhala wi muchu haperenkhe okumi awe wa Yehova, onahaala wooniwaka ntoko muchu “onanara”? Hooye. Nlelo yookhalavo ekari wa achu yaawo ehaakumve opacerya yoohooxa etokotoko. Eri ntoko Yehova onanwiichana: “Mukòkele wa miyano nave miyano kinamukòkela wa nyuwano.” (Mal. 3:7, BNM) Ela ennavuwihiwa mu niphwanaphwaniho nikina na Yesu, niphwanaphwaniho na mwaana oorimeela.—Mwaalakhanye Luka 15:11-32.
MWAANA OORIMEELA
13. Teevi eri yootaphulela ya niphwanaphwaniho na mwaana oorimeela?
13 Teevi eri yootaphulela ya niphwanaphwaniho na Yesu na mwaana oorimeela? Tiithi a ikharari a niphwanaphwaniho nenla onamweemelela Tiithi ahu oosivela a wirimu, Yehova. Mwaana yoowo onaveka muhakhu nave ayeeha onaweemelela yaale apherunwe mmulokoni. Opheruwa waya ori ntoko awo aapaka mukwaha “wilapo yochiwene,” elapo ya Satana, yeeyo eri ocai wa Yehova. (Aef. 4:18; Akol. 1:21) Moovira wa elukuluku, akina annacharuwa, nave annapaka mukwaha woovila wa okookela mmarehereryo a Yehova. Achu yaala awiiyeviha ni oocharuwa annaakheliwa phaama ni Tiithi ahu ookhurumuwela.—Yes. 44:22; 1 Pet. 2:25.
14. Ntakhara heeni Yesu aapaka niphwanaphwaniho na mwaana oorimeela?
14 Ntakhara heeni Yesu aapaka niphwanaphwaniho nenla? Mmukhalelo woolipiha, Yesu ahooniherya wi Yehova onnachuna wi yaale apherunwe ekookele wa Yoowo. Tiithi a niphwanaphwaniho haayelenle ewehereryo wi mwanawe aahaala okooka. Vaavaa aamonneiye mwanawe akookaka, “árwiye worekama,” tiithi aaheeravo echu mwawaakuveya wi amwaakhele. Ela yooceenyerya etokweene wa yaale ahin’ye eparipari wi ekookele wa Yehova moohilekela! Awo akhweya ari oovelavela omunepani, nave mphiro wa okooka onamukhala ntoko woovila ni wookacamiha. Nyenya wiilipixerya ti wasisapo—ophiyerya irimu inahaala ohakalala vaavaa awo anakookaaya.—Luka 15:7.
15, 16. (a) Tiheeni nnahuseryaahu orweela wa niphwanaphwaniho na Yesu na mwaana oorimeela? Mvahe sootakiherya. (b) Ela enanihusiha eheeni vooloca sa Yehova ni Yesu?
15 Tiheeni nnaphuraahu orweela wa niphwanaphwaniho na mwaana oorimeela? Nnaphwanela ochara yootakiherya ya Yehova. Hinnachuna wiisoona okhala “òrèrasa murima” ophiyerya okhooca owaakhela anamacheka oocharuwa. Eyo pahiru yaahaala okumiherya ‘onanara’ woomunepani. (Ekl. 7:16, BNM) Ninnawerya ohuserya echu ekina. Yoowo onahiya muloko onaphwanela wooniwaka ntoko “epucheputche yoriméla,” ohiya ntoko muchu ohirino ewehereryo. (Sal. 119:176) Wakhala wi noomusuwela muchu opherunwe mmulokoni, nnahaala wooniherya osivela ni ovaha nikhaviheryo wi akooke? Nnahaala waaleela asitokweene a mmulokoni wi ewerye ovaha nikhaviheryo noophwanelela? Nnahaala weerano wakhala wi noopharihela phaama yeeyo nnahuseryaahu orweela wa niphwanaphwaniho na Yesu na mwaana oorimeela.
16 Moone ti mwawiihai anamwane oorimeela a mutano anooniheryaaya othamalela waya okhurumuwela wa Yehova nnikhaviheryo ni osivela wa muloko. Munna mmoha yoowo aamalinhe iyaakha 25 iikariwe mmulokoni aaloca: “Ohakalala waka opacerya vaavaa kichinkaaka onnaacereryeya ntoko kaakhenle ‘mahiku óhihimula’ orweela wa Yehova. (Saw. 3:19) Achu oothene tookhaviherya ni oosivela! Vano kookhalano emusi yoomunepani yootikhiniha.” Murokora mmoha namwali yoowo aapherunwe iyaakha thanu onnaloca sa okooka wawe: “Nkinawerya othariha ohakalala wa woona osivela yoowo Yesu aalonceiye wooniheryiwaka wa miyaano. Opaka makupa a marehereryo a Yehova ti wa esisapo etokweene!”
17, 18. (a) Mahusiheryo taani oophara muteko nihusenryaahu orweela wa maphwanaphwaniho mararu nthokoronryaahu? (b) Teevi enaphwanela okhala yoolakelela ahu?
17 Ichu taani soophara muteko nihusenryaahu mmaphwanaphwaniho yaala mararu? Yoopacerya, nnaphwanela osuwela wi hannawerya weeciha wunnuwa woomunepani. Pahiru Yehova tanawerya. Yanaawiili, hannaphwanela oweherya wi oothene yaale anathukumana ni hiyo ni anamuhuserya Piipiliya ni hiyo anahaala opaka eparipari okumi aya. Yookuchula, naamwi akina ehiyaka eparipari ni omurukunuwela Yehova, nihirwe niyeleele ewehereryo wi anahaala okooka. Nave wakhala wi aakooka, niwaakhele phaama mmukhalelo onooniherya moonelo wa Yehova.
18 Hankooni muchu ti muchu a hiyo ntitelele waavya masuwelelo, wiiwexexa, ni miruku. Vaavaa nnaalakhanyaahu maphwanaphwaniho a Yesu, niikohe teevi eri yootaphulela aya, ntakhara heeni yoorempwa Mpiipiliyani, nnii nipharihele hai mahusiheryo aya, nave tiheeni nnaweryaahu ohuserya vooloca sa Yehova ni Yesu. Weerano yeeyo enahaala wooniherya wi ninniiwexexa nave ninnasuwelaxa yootaphulela ya masu a Yesu.
[Eruku va epaaxina 16]
Mmanle waalakhanya Mateyu 13:47-50 . . .
[Eruku va epaaxina 17]
. . .muthokororye ophariheleya wamutano
[Eruku va epaaxina 17]
Akina a yaale yeemerenrye eparipari anahaala wiikhalelaru mmakupa a Yehova (Moone iparakrafo 9-12)