Omwaahiyu Anyu, Yoothanla Anyu!

APWANNE MOOKHALANO YOOTHANLA YEEPARIPARI VOOLOCA SA OMWAAHIYU ANYU? Achu akina anaroromela wi othuperyiwa, tahi echu muchu onaamuthanleiye, onavareryela ekumi aya. Vaavaa awo ahinaweryaaya waakhwaniherya soolakelela saya, awo anoona okhuna meco. Annaloca wi: “Kaathuperiwe wi kihiwerye ophwanya yoolakelelaaka!”

Akina annakhala ookacamiheya vaavaa ahinaweryaaya woona mukhalelo wa ovinyamo mu elapo yeela yoohookololowa ni yoonanara nnakhalaahumo. Akhweya aheererya orehererya ikumi saya nyenya annoona ichu ntoko ekhoco, wiiphana, maphacuwelo a elapo ni ireca wiiliwiili saakanyeryaka soolakelela saya. Awo anniikoha: Ntakhara heeni inanaakanyeryaaya?

Eparipari wi mikhalelo sa okumi sinnawerya ovolowela soolakelela sanyu. (Eklesiyaste 9:11) Mwawiihiiha, wakhala wi eyo ennavolowela omwaahiyu anyu woothene, nyuwaano mookhalano yoothanla yeeparipari. Chiryene, Piipiliya onnooniherya wi okhalano omwaahiyu anyu weeparipari eri yoothanla anyu. Muthokororye yeeyo onaloceiye.

Mose, muhooleli akhalai a nloko na Aisarayeli, aahaaleela achu woona wi yaaya ovolowa mu Elapo ya Nlakano ariki: “Kinnovekani wi muthanle ekumi nari okhwa, nrèliho nari nulumelo: vanonto muthanle ekumi, hiha munamukhala nyuwano ni aninyu. Ela enaya wereya mwanàkhwela Apwiya, Muluku anyu, mwanawìwelela ni mwakhala òroromeleya.”—Malamulo 30:15, 19, 20.

“Kinnovekani wi muthanle ekumi nari okhwa, nrèliho nari nulumelo: vanonto muthanle ekumi.”—Malamulo 30:19

Chiryene! Muluku aahaavuluxa Aisarayeli wookapuroni o Yikuputu ni opaka nroromeliho vamiithoni vaya na waataphula ni waavaha okumi woohakalaliha mu Elapo ya Nlakano. Nyenya soothene hisi seereye mukhataaya wa yaawo. Wi ekhaleno mareeliho yaawo, awo yaaphwanela ‘othanla ekumi.’ Mwawiihai? Moorweela wa ‘wàkhwela Apwiya, owìwelela ni okhala òroromeleya.’

Mmahiku ahu, yoothanla yoolikana eri vamiithoni vanyu, nave mukhalelo muneeraanyu muthanle enahaala wooniherya yeeyo omwaahiyu anyu onahaalaaya okhala. Moorweela wa othanla omusivela Muluku, ochariha phaama echu onanleeleiye, ni okhala oororomeleya wa yoowo, nyuwo munahaala othanla okumi chiryene—okumi woohimala mu parataiso veelaponi yavathi. Nyenya tiheeni enavolowelavo mmikhalelo seiha?

MUTHANLE OMUKHWELA MULUKU

Okhwela mukhalelo woopacerya wa Muluku. Murummwa Yohani oorepa mu oveereliwa wi “Muluku ti okhwela.” (1 Yohani 4:8) Wanthowa nenla, vaavaa Yesu aakohiweiye tinivi naari nlamulo ntokweene wa malamulo oothene owo aaloca: “Onarwa-osivelana ni Apwiya Mulukuá ni murimá wothene, nave ni okumiá wothene, nave ni mirikuá yothene.” (Mateu 22:37, Nlakano Nahihano) Onthamwene weeparipari ni Yehova Muluku honaphwanela okhala wa woova wiiwelela, nyenya mu osivela. Ntakhara heeni nnaphwanelaahu othanla omusivela yoowo?

Osivela wa Yehova ntakhara achu ori ntoko osivela wa mulipa ooyara wa anaawe. Naamwi eri oohiphaameya, alipa ooyara oosivela annaahusiha anaaya, waahakararya, waakhaviherya, ni waalaka nthowa nawi anachuna wi ekhale oohakalala nave wi ekhumelele phaama. Tiheeni alipa ooyara anachunaaya wi anaaya yeereke? Anachuna wi anaaya yaasiveleke ni ekhapeleleke mmurima yeeyo makholo aya anaahusihaaya. Apwanne tahi woophwanelela wuupuwela wi Tiithiihu awirimu oophaameya onnaweherya wi nooniheryeke othamalela woosivela wa ichu soothene opankeiye ntakhara hiyo?

NWIRIYANE NSU NAWE

Mu elocelo yoopacerya Piipiliya aarempweiye, masu awi “owiriyana” anaphitaanyerya “wiiwelela.” Apwanne tahi yeeyo nnakhwelaahu vaavaa nnamuleelaahu mwaana nriki: “Waawiriyaneke asitiithi aa”? Mweeparipari, owiriyana nsu na Muluku onnaphitaanyerya ohuserya, wiiwelela echu onaloceiye. Naamwi nihiweryaka onwiriyana Muluku mwawooneya, ninnanwiriyana moorweela wa waalakhanya ni opharihela yeeyo enaphwanyeya Mmasu awe, Piipiliya.—1 Yohani 5:3.

Wi ooniherye ochuneya waya onwiriyana Muluku, ekwaha emoha Yesu aaloca: “Tahi yolyaru enamukhaliha mutxhu, nto masu othene anakhuma mwano mwa Muluku.” (Mateu 4:4) Ntoko yoolya ya wooneya eryaaya yoochuneya wa hiyo, okhalano masuwelelo a Muluku, chiryene ti woochuneyaxa. Ntakhara heeni? Mwene a miruku Solomoni oothariha: “Osuwela ni muhakhu sinnamukhapelela mutxhu ntoko murusi. Nto miruku ti saphamasa opwaha ntakhara sinnahusiha mukhalelo w’ekumi.” (Eklesiyaste 7:12) Masuwelelo ni miruku soorweela wa Muluku inanwerya onikhapelela olelo ni onikhaviherya opaka yoothanla ya miruku eni enihoolele wookumini woohimala omwaahiyu.

MUKHALE OOROROMELEYA

Muupuwele niphwanaphwaniho na Yesu nthokoronryaahu mmwaha ovinre, olonceiye ariki: “Mulako ni mphiro inamukeriha mutxhu w’ekumi, oyeva. Nave ari vakhani yale anakusa mphiro yowo.” (Mateu 7:13, 14) Neecaka mu ephiro ntoko yeeyo, chiryene nnahaala okhaviheryeya moorweela wa otitelela okhala vakhiviru wa yoohoolela yaphaama wakhala wi nnachuna ophwanya yoolakelela—ekumi yoohimala. Aakhalavo mathowa aphaama wa hiyo okhala vakhiviru va Muluku. (Salumu 16:8) Nni neereno hai yeeyo?

Mahiku oothene, sookhalavo ichu sawaaca nnaphwanelaahu opaka ni sincipale naachunaahu nipanke. Ichu ntoko seiha inanwerya oniweiha ophiyerya ohikhalano elukuluku ya wuupuwela echu Muluku onachuneiye wi nipake. Ti nthowa nene Piipiliya onanuupuxeryeiye ariki: “Mwivareryeke phama mmereloni mwanyu. Muhikhaleke ntoko atxhu òhisuwela, nto mukhale awisuwela, mphuraka phama elukuluku ya hihano, ntakhara mahiku ala t’ònanara.” (Éfeso 5:15, 16) Ninnamwaacamela Muluku moorweela wa opaka onthamwene ahu ni yoowo okhala echu yoochuneya mu ekumi ahu.—Mateu 6:33.

YOOTHANLA TI YAWINYU

Sookhalavo ichu munaphwanelaanyu opaka wi nyuwo vamoha ni oosiveliwaanyu mukhaleno omwaahiyu waphaama. Piipiliya onnaloca wi Tiithi ahu a wirimu, Yehova Muluku, onnanisivela vancipale ni oneemererya osuwela echu aahaleiye osiveliwa onoona neeraka. Moone masu a mulipa miririmu Mikeya:

“Mutxhu we, Apwiya ahòsuweliha yeyo eri yaphama, anakhwelaya wa weyano: wokololowa, wakhwela akhwà ni wiyeviha vamithoni va Muluku.”—Mikeya 6:8.

Apwanne nyuwaano munahaala weemererya nwopelo wa Yehova wa weeca ni yoowo ni okhaleno mareeliho oohimala owo aavithenleiye oothene yaale aneeca ni yoowo? Yoothanla ti yawinyu!