Wunnuwiha Mavyakelo Ahu mu Orummwa​—Ovaha Onamoona Omusika

Ntakhara Heeni ti Yoochuneya: Woona wi achu ancipale annalapa iwora sawaaca, mukhalelo waphaama wa waaphwanyiha michaka saphaama ori ovaha onamoona mmapuro aya a muteko. Ovaha onamoona omusika onanwerya okhala woohakalaliha ni wa mphurelo, nthowa nawi hari owaani nave anamatumiha annaathokororya yaale anawoonaaya okhala ntoko anamathuma. Wi okhale wa mphurelo, alaleeryi anaphwanela opharihela phaama miruku nave ekhale a ntakiheryo naphaama mmawarelo. (2 Kor. 6:3) Mwawiihiiha, ooweherya a muteko onaphwanela ovareryela phaama mukhalelo wa olaleerya omusika ni taani onalaleeryawo.

Mukhalelo wa Weerano Yeela:

• Mureherye mapaceryiho awaakuveya. Wakhala wi noomaliha elukuluku yincipale ni anamathuma, akhweya henii enivahe ekari ya olocano wanaawiili.

• Muthanle elukuluku ya waaxekurya vaavaa alipa ootumiha ahinaaceeliwaaya, ntoko elukuluku awo anapaceryaaya otumiha.

• Mwiilipixerye oloca ni mwaneene a elooxa naari epanka. Muloce moohakalala ni monthamwene. Nyuwaano akhweya muloce, “Nnaaxekurya achu mmapuro aya a muteko nthowa nawi ti woovila waaphwanya owannyaya.” Mpake mapaceryiho awaakuveya, nave mumvahe etrataato, erevista, naari yoolaleeryiwa ekina. Wi nihooniwe ntoko wi na alipa ootumiha, ti yaphaama ohiloca marehereryo a sooveleela, waahikhala wi nookohiwa mukhalelo muteko ahu onaliveliwaaya.

• Wakhala wi mwaneene a elooxa naari epanka tawaacameleya, mumveke wi muloce mwawaakuveya ni anamalapa awe. Mmapuro makina a otumiha, ti yaphaama oveka wakhala wi munnaphwanela ohiya yoolaleeryiwa va nipuro na wiichuuwa.

• Mpharihele phaama miruku, nave mukhale oovareryela. Ntoko yootakiherya, wakhala wi namatumiha onaloca ni namathuma naari wi ohaaceliwa, munweherye.

Mweererye Ela Variyari va Mweeri:

• Variyari va malapelo anyu a echoko anacharela, murehererye mapaceryiho awaakuveya, akhweya munahaalaanyu opharihela wakhala wi munalapa omusika.