“Vano Kinnasiveliwa ni Muteko Woolaleerya!”

KAAYELEELA OHAKALALA WAKA

Moothananiha, vaavaa kaaryaakano iyaakha 13, osivela waka ntakhara Yehova waavukuwa. Yaakhala ntoko wi asinthamwene aka osikola yaakhalano otaphuwa wawaaca, nave wi miyaano kaanayeleela echu ekina. Koona ntoko wi malamulo a asitiithi aka ni meecelo Eekristu yaanaakeeriha okhala oomakeya, nave wi miteko soomunepani saari soovila. Nkaantonko okhwa minikwa wi Yehova ookhala, naamwi hiiha nkiisoona okhala awaacameleya wa yoowo.

Naamwi hiiha, kaatitelela olaleerya. Nyenya nkiilipexerya vancipale, pahiru wi kihikhale ooceecheya. Vaavaa kaayaaka mmuteko woolaleerya, nkiirehererya, nave waakhala woovila opaceryiha ni otitelela ochekula phaama ni akaneene a vaate. Mwawiihiiha, nkaakhalano sookhumelela saphaama, nave yaanakeeriha okhalano nchuno navakhaani mmuteko woolaleerya. Kaaniikoha, ‘Ti mwawiihai muchu onaweryeiye weerano yeela, esumana ti esumana, mweeri ti mweeri?’

Kirino iyaakha 17, kaanachuna vancipale okhala ootaphuwa. Mwawiihiiha, kaamakanya ichu saka, kipwahavo vaate nave kithaamela o Australiya. Asitiithi aka hiyaasiveliwe ni yoolakelela aka. Awo yaari awuukhuwa, nyenya yuupuwela wi kaahaala otitelela omurumeela Yehova.

O Australiya, kaaceecheya vancipale omunepani. Ikwaha sincipale nkaayawo o mithukumano. Kaasiveliwa weeca ni amiravo yaawo yaari ntoko miyaano, yaawo yaaya mmithukumano vanihikuni, nave voocharela yaanawurya ni oya mmapuro yaawo wiiniwamo. Kaawuupuwelaka sa muculi, kinoona wi kaari mmakupa oomeeli, mweeparipari ni mweelaponi, nyenya nkaari oohakalala mmakupa oomeeli.

NIHUSIHERYO NOOHIWEHERERYEYA NYENYA NASISAPO

Iyaakha piili ohoolo waya, kaamusuwela murokora mmoha yoowo moohiwehererya, aakeerinhe wuupuwelela sa okumi aka. Miyaano kaakhala vamoha ni arokora athanu yaawo yaari aciye, nave naahinwopa ooweherya a ekulucu ni mwaariye, Tamara, wi ekhale vamoha ni hiyaano mu esumana emoha. Vaavaa ooweherya a ekulucu aarehereryeiye miyaha sa muloko, Tamara aanakhala ni hiyaano nchekulaka. Eyo yaari yoohakalalihaxa. Tamara aari muchu aphaama, nave waanakhala wookhweya ochekula ni yoowo. Yaari yoohakalaliha omusuwela muchu yoowo ari awiichwelavo omunepani nave tho mu elukuluku emohamoha okhala oochekuleyano.

Olucuwa wa Tamara waanaavolowela akina. Osivela wawe ntakhara eparipari ni muteko woolaleerya waanaaceenyerya akina. Owo aari oohakalala amvahaka Yehova owetha wawe, nyenya miyaano nkaahakalala, vaavaa kaapakaaka ichu savakhaani wa yoowo. Mukhalelo awe woolipiha ni ohakalala wawe, waakeeriha opaka matorokelo mu okumi aka. Yootakiherya awe yaakeeriha wuupuwela eparipari emoha yoochuneya: Yehova onachuna wi nimulapeleke ‘moohakalala’ ni “wèliwa murima.”—Sal. 100:2, BNM.

OKOOKELA OSIVELA WAKA NTAKHARA MUTEKO WOOLALEERYA

Kaanachuna okhalano ohakalala yoowo Tamara aareiyeno, nyenya wi keereno yeela kaanaphwanela opaka matorokelo matokweene mu okumi aka. Yaaviravo elukuluku, nyenya voocharela kaapacerya opaka matorokelo vakhaani-vakhaani. Kaapacerya wiirehererya phaama ntakhara muteko woolaleerya, nave ikwaha ikina, kaanarumeela ntoko piyoneera ookhaviherya. Eyo yaakikhaviherya ovukulela onyeenyeya nave kaakhalano moonelo woophwanelela. Nthowa na ompharihela Piipiliya mmuteko woolaleerya, kaanahakalala. Voocharela, kaanarumeela ntoko piyoneera ookhaviherya mweeri ti mweeri.

Kaapacerya opaka onthamwene ni achu a iyaakha soothene, yaawo yaapaka owetha waya ntakhara Yehova nave yaasiveliwa omurumeela yoowo. Yootakiherya aya yaphaama, yaakikhaviherya waalikhela soochuna saka, ni okhalano yookhovelela ya omuhuserya Piipiliya nihiku ti nihiku. Kaapacerya osiveliwano muteko woolaleerya, nave voocharela kaakhala piyoneera ookilaatheya. Mu ekwaha yoopacerya evinrevo elukuluku yincipale, kaahiisoona okhala oohakalala ni ootaphuwa mmulokoni.

KAAMPHWANYA NTHAMWENE A ELUKULUKU YOOTHENE

Eyaakha emoha ohoolo waya, kaamusuwela Alex, mulopwana aphaama yoowo chiryene aamusivela Yehova ni muteko woolaleerya. Owo aari murummwa oorumeela nave aari piyoneero mu iyaakha 6. Owo tho aarumeela mu elukuluku vakhaani, mu ekulucu yeeyo waachuneyawo alaleeryi ancipale, o Malawi. Weiwo, owo aahaasuwela mamisiyonaario makina yaawo yaari yootakiherya yaphaama wa yene, nave yaamuceenyenrye otitelela okuha mu nipuro noopacerya soochuna sa Omwene.

Mu 2003, miyaano ni Alex naapaka othela, nave naatitelela orumeela mmuteko wa elukuluku yoothene. Noohuserya mahusiheryo oochuneya, nave Yehova oonireeliha mmikhalelo sincipale.

YEHOVA OONIREELIHA VANCIPALE

Mu 2009, naawompwa wi narumeele ntoko mamisiyonaariyo o Timor-Leste, elapo ekhaani waacamela o Intonesiya. Naari ootikhina, oohakalala ni awuukhuwa, soothene mu elukuluku emohamoha. Miyeeri mithanu ohoolo waya, naaphiya o Dili, epooma etokweene yo Timor-Leste.

Wi nrumeele mu elapo yeele waanachuneya opaka matorokelo matokweene. Soothene mu elapo yeele saari soohiyana: sookhovelela, elocelo, yoolya ni mikhalelo sa okumi. Mwawiihiiha naanaphwanela wiikhoveleliha. Mmuteko woolaleerya naaphwanela ochekulela ni achu yaawo yaari oohaawaxa, yaarino mahusiheryo vakhaani nave yaahooxiwa. Akina a yaawo yaakhalano maharipa vamwiilini ni mmuupuweloni nthowa na ekhoco ni nlala.a

Muteko woolaleerya waari woohakalaliha! Ntoko yootakiherya, kaamusuwela mwali mmoha aarino iyaakha 13, awiichaniwa Maria.b Yaweereya awe yaari yoothananiha vancipale. Amama awe yaakhwa mu iyaakha savakhaani muculi, nave owo hantonko owoona atiithi awe. Moolikana ni asimwali akina a iyaakha sawe, Maria haarino yoolakelela mookumini. Kinnuupuwela nihiku nimoha, vaavaa owo inleiye alocaka mukhalelo owo ooneiye, nyenya nkaawerya wiiwexexa masu mamoha yaawo aaloceiye woona wi kiiso kihaakumve okhovelela elocelo yeeyo. Kaavekela wa Yehova, kimvekaka wi akikhaviherye omuhakararya mwali owo, nave kaapacerya waalakhanya soorepa soohakararya wa yoowo. Iyaakha soocharela ohoolo waya, kaapacerya woona mukhalelo eparipari yaatoronkaaya okumi wa Maria. Owo aahipatisiwa nave vano onneeciha soohuserya sa Piipiliya mukhateiye. Olelo, Maria ookhalano emusi etokweene yoomunepani nave onnoona wi oophwanya nipuro nawe.

Yehova onnareeliha muteko o Timor-Leste. Alaleeryi ancipale a mu elapo yeela aahusenrye eparipari iyaakha khumi ivinre. Naamwi hiiha ancipale mapiyoneero, arummwa oorumeela naari atokweene. Akina anarumeela mu ekupweete ya muteko wootaphulela, ekhaviheryaka orehererya yoolya yoomunepani mu ilocelo sa vanipuroni. Kaatepa ohakalala vancipale owiiwa yiipaka mmithukumano, owoona ehakalalaka ni yunnuwaka omunepani.

HIWAAVO MUKHALELO MUKINA WA OKUMI WOOHAKALALIHA

Orummwa ahu o Timor-Leste waari woohiyana ni mukhalelo wa okumi yoowo naaryaahuno o Australiya, nyenya hiwaavo mukhalelo mukina wa okumi woohakalaliha. Ikwaha ikina naanaphitana mu ekaaro ekhaani osaren’yemo achu, orimo ihopa sawuuma ni maphuta a makukhu analyiwa ekhumaka omusika wa vanipuroni. Mahiku makina naaneeciha yoohuserya mu empa ekhaani yooviha ni osaren’yemo maahi, vakina vaya orimo nchupi, nave anakhu echimakelaka wu ni wu. Naamwi yaarivo makacamiho yaala, ilukuluku soothene kaanuupuwela: ‘Ela ti yoohakalaliha!’

Kaawuupuwelaka sa muculi, kinnamuthamalela Muluku nthowa nawi asitiithi aka yaapaka owetha waya wi ekihusihe ni okikhaviherya, oophiyerya tho mu elukuluku yoovila ya omiravo aka. Kinneemererya yeeyo Masiposipo 22:6 onaloceiye. Amama ni apapa, anniirumiha ni miyaano vamoha ni Alex. Awo annahakalala onoona niphariheliwaka ni Yehova. Ovinyerya mu 2016 nnarumeela ntoko oweherya aweeceeca a ekulucu ya efiliyale yo Australiya.

Apwanne ti wooweryeya weemererya wi miyaano nkaasiveliwa ni muteko woolaleerya? Vano kinnasiveliwano olaleerya! Kohiiwexexa wi, moohipwacha ichu okhala phaama naari hooye mookumini, pahiru nnanwerya okhalano ohakalala weeparipari wakhala wi ninnamurumeela Muluku ni murima ahu woothene. Moohikhwa minikwa, mu iyaakha seiha 18, kimurumeelaka Yehova vamoha ni Alex, ti soohakalalihaxa mu okumi aka. Vano kinniiwexexa yeeyo mulipa oomurepa salmu Tavite aalonceiye wi: “Ehakalale oothene yaawo anoororomelaani nyuwo. Ekhuwele moohakalala ni moohihiyererya. Yoochapeleeni yaawo anasivela nsina nanyu.”—Sal. 5:11.