Muhilekele Opatisiwa

1. Tisivi siri miphurelo mikina sa opatisiwa?

APWANNE munnamusivela Yehova Muluku, yoowo oovanheni yamahala yoothene yaphaama ophitaanyerya okumi? Apwanne munnachuna wooniherya osivela wanyu wa yoowo? Mukhalelo waphaama wa weerano yeeyo ori moorweela wa wiiveleela wa yoowo ni wooniherya vanlakani vene moorweela wa opatisiwa. Weerano yeeyo, enanweerihaani opaka makupa a emusi ya Yehova. Ntoko yookhumelela, Tiithi anyu ni Nthamwene onahaala woohoolelaani ni wookhapelelaani woona wi nyuwaano mwa awawe. (Sal. 73:24; Yes. 43:1, 2) Wiiveleela ni opatisiwa, onamoovahaani tho ewehereryo ya opuha okumi woohikota.—1 Pet. 3:21.

2. Tiheeni nnahaalaahu othokororya mmwaha yoola?

² Apwanne yookhala echu enoohiihaani opatisiwa? Waakhanle wi aai, hamuri meekhiinyu. Mamilyawu a achu yaahipaka matorokelo mmeecelo aya ni mukhalelo aya wa wuupuwela, wi ephwanelele opatisiwa. Vano awo annamurumeela Yehova moohakalala ni mwamvai. Ti heeni munahaalaanyu ohuserya ni achu yaawo yaapatisiwe mu nsana noopacerya? Naahaala woona makacamiho yaawo yaahoolenlaaya, nave tho nnahaala woona yeeyo nnahuseryaahu ni yootakiherya aya.

ASAMARIYA YAAHILAKELELA OPATISIWA

3. Sookwaculiha taani Asamariya yaaphwanelaaya ovootha wi epatisiwe?

³ Mu elukuluku ya Yesu, Asamariya naari nikhuuru na malapelo naakhala omokoni wa Yuteya, waacamela miceche sa Sikemi ni Samariya. Ehaakumve opatisiwa, awo yaanachuna okhalano masuwelelo awaakhwanela a Masu a Muluku. Asamariya yaaweemererya pahiru aliivuru athanu opacerya, Mapacereryo ophiyerya Malamulo—nave tho akhweya liivuru a Yosuwa, wi ti yaarwenle wa Muluku. Nyenya Asamariya yaanaweherya orwa wa Mesiya, mwawiiwanana ni yoororomeliha mu Malamulo 18:18, 19. (Yoh. 4:25) Wi epatisiwe, awo yaaphwanela weemererya wi Yesu aari Mesiya aalaiheryiwe. Nave “Asamariya ancipale” yaaheerano yeeyo. (Yoh. 4:39) Ohiya yeeyoru, waahikhalavo nthalu variyari va Asamariya ni Ayuta, nave ti yawooneya wi Asamariya akina yaanaphwanela ovootha nthalu nenla.—Luka 9:52-54.

4. Mwawiiwanana ni Saweeriwa ti Arummwa 8:5, 6, 14, Asamariya ancipale yaakhulenle hai muchaka Filipi aalaleenryeiye?

⁴ Tiheeni yaakhavihenrye Asamariya wi epatisiwe? Vaavaa mulaleeryi Filipi aalalenryeiye “wa yaawo sa Kristu,” Asamariya akina “yaaheemererya masu a Muluku.” (Mwaalakhanye Saweeriwa ti Arummwa 8:5, 6, 14.) Filipi aari mu Yuta, nyenya awo hiyaawoonne okhala nikacamiho wa yeeyo. Akhweya awo yaanuupuwela soorepa saaloca wi Muluku haano nthalu. (Malam. 10:17-19) Moohiphwacha mmukhalelo taani, awo ‘yaanawiriyana moopwacha yeeyo Filipi aaloceiye’ vooloca sa Yesu ni yaahiiwexexa sawooniherya sookwakwaleya wi Filipi aarummwale ti Muluku. Owo tho aahipaka sootikhiniha soohiyanahiyana, ophitaanyerya waapenuxa awiiceliwa ni wiikara masololo.—Saw. 8:7.

5. Echu taani nnaphwanelaahu ohuserya ni Asamariya?

⁵ Nthalu ni ohikhalano masuwelelo waanwerya oweeriha Asamariya yaale ohiya vahoolo. Nyenya awo hiyaahin’ye wi eyo yeereye. Vaavaa yaalekechen’yaaya wi yeeyo Filipi aahusinheiye yaari eparipari, awo hiyaalekenle opatisiwa. Piipiliya onaloca wi: “Yaamweemerenryaaya Filipi, yoowo aalaleerya michaka saphaama vooloca sa Omwene wa Muluku nave mu nsina na Yesu Kristu, oothene alopwana ni athiyana yaapatisiwa.” (Saw. 8:12) Hanka nyuwaano, apwanne muri oolekecheya wi Masu a Muluku teeparipari ni wi Anamoona a Yehova annavootha nthalu nave anniilipixerya wooniherya osivela weeparipari wa mukina ni mukhwaawe—eneneeryo yeeyo enaasuwanyeiha Akristu eparipari? (Yoh. 13:35) Mwawiihiiha, muhoovelele opatisiwa, muroromele wi Yehova onamooreelihaani.

6. Ti mwawiihai yootakiherya ya Ruben eneeryaaya yookhaviheryeeni?

⁶ Ruben o Alemanya, ophwiiwale ni Asitiithi awe ari Anamoona a Yehova. Vaavaa aaryeiye mmiravo, owo aanakhwa minikwa waakhanle wi Muluku ookhala. Tiheeni owo eereiye wi amalihe minikwa seiha? Owo aahiiwexexa wi aanaphwanela ohuserya sincipale vooloca sa mwaha yoowo nave aahilakelela weerano yeeyo. Owo ooloca: “Kaahipharihela yoohuserya aka ya muchu mukhateiye wi kimalihe minikwa saka. Kaahihuserya wiiliwiili vooloca sa othatuwa.” Owo aahimwaalakhanya liivuru Existe um Criador Que Se Importa com Você? Liivuru yoola, aahilipiha nroromelo na Ruben vooloca sa Muluku. Owo aahipacerya wuupuwela: ‘Khuu! Yehova ookhalawo chiryeene.’ Ohiya yeeyoru, Ruben aahixekurya nipuro ntokweene na Anamoona a Yehova, owo aahoona wi wiiwanana wa anna orukurerya elapo wi yaari echu yootikhiniha nave aahipacerya otikhiniheyaxa ni yeeyo. Ruben aahikookela o Alemanya nave apatisiwa arino iyaakha 17. Waakhanle wi nyuwaano mookhalano minikwa vooloca sa Muluku, Piipiliya naari mwaha mukina, mpake otholathola mu soolaleeryiwa sahu. Minikwa sanyu inanwerya omalihiwa ni “masuwelelo awaakhwanela.” (Aef. 4:13, 14) Moovira wa elukuluku nyuwaano munahaala wiiwa saweereya sincipale vooloca sa wiiwanana ni osivela wa anna orukurerya elapo ni woona sootakiherya seiyo mmuloko anyu, eyo enahaala waaceererya osivela wanyu ntakhara emusi ahu ya elapo yoothene.

SAWULU AAHILAKELELA OPATISIWA

7. Matorokelo taani Sawulu aaphwaneleiye opaka mmukhalelo awe wa wuupuwela?

⁷ Moone yootakiherya ya Sawulu o Tarsu. Owo aahaakhela mahusiheryo avasulu o Yuta nave aanaya vahoolo o Yuteya. (Aka. 1:13, 14; Afi. 3:5) Mu elukuluku yeele, Ayuta ancipale yeemererya wi Akristu yaari oomwaryeya, nthowa na yeeyo Sawulu aanawiikara ni isara itokweene. Uupuwelaka wi eerano yookhwela ya Muluku. (Saw. 8:3; 9:1, 2; 26:9-11) Waakhanle wi Sawulu aanachuna wooniherya nroromelo nawe wa Yesu ni opatisiwa ntoko Mukristu, owo aaphwanela okhala ooreheryeya ntakhara wiikariwa.

8. (1) Tiheeni yaamukhavihenrye Sawulu opatisiwa? (2) Mwawiiwanana ni Saweeriwa ti Arummwa 22:12-16, Ananiya aamukhavihenrye hai Sawulu? (Moone tho eruku.)

⁸ Tiheeni yaamukhavihenrye Sawulu opatisiwa? Vaavaa Yesu aalonceiye ni yoowo ari wirimu waarya waahimweeriha Sawulu oyeleela woona. (Saw. 9:3-9) Mmahiku mararu, Sawulu haalyile echu naari owurya, mweeparipari, owo aanuupuwelela sa yeeyo yeeren’ye. Owo aahilekecheya wi Yesu aari Mesiya nave tho wi Akristu yaari mmalapelo eeparipari. Mwaanyiherye mukhalelo Sawulu iiphwanyenryeiye mathowa, nthowa na opaka makupa mu wiiphiwa wa Estefanu! (Saw. 22:20) Evinrevo mahiku mararu, oohuserya mmoha awiichaniwa Ananiya aahiloca ni Sawulu mooreera murima ampenuxa nave amuceenyerya opatisiwa mwawaakuveya. (Mwaalakhanye Saweeriwa ti Arummwa 22:12-16.) Sawulu aari awiiyeviha eemererya nikhaviheryo na Ananiya nave apacerya okumi muvyaani ntoko Mukristu oopatisiwa.—Saw. 9:17, 18.

9. Tiheeni nnahuseryaahu ni yootakiherya ya Sawulu?

⁹ Tiheeni nnahaalaahu ohuserya ni yootakiherya ya Sawulu? Wiirumiha ni owoova achu waanwerya omuhiiha Sawulu opatisiwa. Nyenya owo heemerenrye wi eyo yeereye. Sawulu aari awiiyeviha nave aahipaka matorokelo oochuneya mu okumi awe wi akhale oomuchara a Yesu. (Saw. 26:14, 19) Owo aanasuwela wi aahaala wiikariwaka, naamwiihiiha, aari oorehereya okhala Mukristu. (Saw. 9:15, 16; 20:22, 23) Amanle opatisiwa, Sawulu aahititelela ororomela nikhaviheryo na Yehova vaavaa aahooleleiye saweeha soohiyanahiyana. (2 Ako. 4:7-10) Akhweya nyuwaano tho moohoolela saweeha sa nroromelo vaavaa mwaakhanlaanyu Namoona a Yehova. Nyenya munanwerya ororomela wi Yehova ni Yesu anahaala woovahaani nikhaviheryo noothene munachunaanyu wi mutitelele okhala oororomeleya.—Afi. 4:13.

10. Ti mwawiihai yootakiherya ya Anna eneeraaya yookhaviheryeeni?

¹⁰ Anna ophwiiwe mu emusi ya muyareryiwo wa Kurti makupa Onakhumawo nsuwa a Europa. Amama awe emanle opatisiwa, Anna aahipacerya omuhuserya Piipiliya moorweela wa weemereryiwa ni apapa awe mu elukuluku yeeyo aarino iyaakha 9. Amusi akina, yaakhala vaate vamoha ni yoowo. Amusi yaala hiyaasiveliwe vaavaa yaasuwenlaaya wi Anna aanamuhuserya Piipiliya. Awo yoona wi ohiya malapelo yaawo yaaphwiiwalaayamo yaari echu yawuuliha muru mu emusi aya. Vaava aareiyeno iyaakha 12, Anna aahiveka weemereryiwa ni apapa awe wi apatisiwe. Awo yaanachuna osuwela waakhanle wi eyo yaari yoolakelela awe naari waakhanle wi aamukhinyeereryiwa. Owo aahi wa yaawo: “Miyaano kinnamusivela Yehova.” Mwawiihiiha awo yaahimweemererya opatisiwa. Voocharela, Aahititelela ohoolela wiiciwa ni okhalihiwa moonanara. Mmusi awe mmoha aahi: “Yaamukhala phaama waari capaheya, omulyaaka soona, ohiya okhala Namoona a Yehova.” Anna aavoonthe hai yeeyo? Owo ooloca: “Yehova aahikikhaviherya okhala oolipa, nave amama aka ni apapa aka yaahikikhaviherya vancipale.” Anna tho ookhalano elista ya saweereya sooluluwanya seiyo oonneiye ntata na Yehova mu okumi awe. Mu ilukuluku sincipale owo annavarerya elista wi ahicuwale mukhalelo Yehova amukhavihenryeiye. Wakhala wi munnoova wiikariwa muupuwele wi Yehova onahaala wookhaviheryaani tho nyuwaano.—Ahe. 13:6.

KORNELIYU AAHILAKELELA OPATISIWA

11. Tiheeni yaahaala omulekeliha Korneliyu opatisiwa?

¹¹ Piipiliya tho onnaloca sa yootakiherya ya Korneliyu. Owo aari “mutokweene a anakhoco,” naari wi muhooleli yoowo aahoolela anakhoco awaakhwana 100 o Roma. (Saw. 10:1, enoota.) Mwawiihiiha, akhweya owo aari muchu aavolowelen’ye vancipale ni achu nave tho ni ekhoco. Owo “aanaakhaviherya vancipale achu oohaawa.” (Saw. 10:2) Yehova aahimurumiha murummwa Petru wi alaleerye michaka saphaama wa Korneliyu. Apwanne owo aahilekela opatisiwa nthowa na murici awe wa vasulu?

12. Tiheeni yaamukhavihenrye Korneliyu opatisiwa?

¹² Tiheeni yaamukhavihenrye Korneliyu opatisiwa? Piipiliya onaloca wi owo “aanamoova Muluku vamoha ni oothene a veechokoni vawe.” Owo tho aahikhalano yookhovelela ya opaka mavekelo a vathi va murima. (Saw. 10:2) Vaava Petru aalonceiye ni yaawo vooloca sa michaka saphaama, Korneliyu ni emusi awe yaakhalano nroromelo mwa Yesu nave moohilekela epatisiwa. (Saw. 10:47, 48) Moohikhwa minikwa, Korneliyu aari oorehereya opaka matorokelo vyakala oochuneya wi amulapeleke Yehova vamoha ni emusi awe.—Yos. 24:15; Saw. 10:24, 33.

13. Tiheeni nnahuserya ni yootakiherya ya Korneliyu?

¹³ Hiiha ntoko Sawulu, murici wa vasulu waanwerya omuhiiha Korneliyu okhala Mukristu. Nyenya owo haawemerenrye wi eyo yeereye. Apwanne nyuwaano munnachuna opaka matorokelo matokweene mookumini wi nwerye opatisiwa? Waakhanle wi tihiihaa, Yehova onahaala okhala mukhaviheryi anyu. Wakhala wi nyuwaano moolakelela opharihela malakiheryo a Mpiipiliyani wi mmuhakalalihe Yehova owo onahaala wooreelihaani.

14. Ti mwawiihai yootakiherya ya Tsuyoshi eneeraaya yookhaviheryeeni?

¹⁴ Wi apatisiwe Tsuyoshi o Xapau, aaphwanela opaka matorokelo oomutekoni wawe. Owo aalapa ntoko mukhaviheryi a meestere a exikola yoovuwa ya Ikenobo, exikola yeeyo enaahusiha achu orehererya ifolooryi sa mmakhwelo. Vaavaa mestere aahiweryeiye oya mmakhwelo mwemmo waapakiwamo mihapo sa Aputista, Tsuyoshi taayamo mu nipuro nawe. Nyenya vaavaa aahusenryeiye eparipari vooloca sa okhwa, meerelo yaala yaahikhala yaweeha ntakhara opatisiwa wawe. Mwa yeeyo, owo aahilakelela wi haahaala opakaka mihapo sa Aputista. (2 Ako. 6:15, 16) Owo aahivaanela ni mestere vooloca sa mwaha yoowo. Teevi yaari yookhumelela? Tsuyoshi aahiwerya okookela muteko awe ahivolowelaka meerelo yaale a mihapo. Owo aapatisiwe evinre eyaakha emoha vaavaa aapacenryeiye omuhuserya Piipiliya.a Waakhanle wi nyuwaano munachuna opaka matorokelo oomutekoni wanyu wi mmuhakalalihe Muluku, muroromele wi owo heemererya wi yoothoweeni yeeyo nyuwaano ni emusi anyu munaachunaanyu.—Sal. 127:2; Mat. 6:33.

AKORINTU YAAHILAKELELA OPATISIWA

15. Makacamiho taani achu akina o Korintu yaaphwanelaaya ovootha wi epatisiwe?

¹⁵ Achu ancipale yaakhala o Korintu, awo yaari awiithukumanyerya ni acapaheya. Yaarino meecelo yaawo Muluku ahineemereryeiye. Mu nipuro ntoko nenlo, yoowo aachuna omurumeela Yehova aaphwanela ovootha saweeha sincipale. Naamwiihiiha, vaavaa murummwa Paulo aakeleiye o Korintu ni olaleerya vooloca sa Kristu, “Akorintu ancipale yaawo yiiwale masu yaaroromela nave epatisiwa.” (Saw. 18:7-11) Voocharela, Apwiya Yesu yaahooneya wa Paulo orweela mu yawoona nave eloca: “Kookhalano achu ancipale mu epooma yeela.” Mwa yeeyo, Paulo aahititelela olaleerya mu epooma yeele eyaakha emoha ni emeya.

16. Tiheeni yaakhavihenrye achu o Korintu opatisiwa? (2 Akorintu 10:4, 5)

¹⁶ Tiheeni yaawaakhavihenrye Akorintu opatisiwa? (Mwaalakhanye 2 Akorintu 10:4, 5.) Owerya wa munepa waweela ni Masu a Muluku, yaahaakhaviherya opaka matorokelo matokweene mookumini. (Ahe. 4:12) Achu yaawo o Korintu yaakhanle Akristu, yaahiwerya ovootha sookhovelela ni meerelo yaawo yaapaka makupa mu okumi aya, ntoko ohapaliwa, wiiya ni orarusana alopwanaru naari athiyanaru.—1 Ako. 6:9-11.b

17. Tiheeni nnaphwanelaahu ohuserya ni yootakiherya ya achu o Korintu?

¹⁷ Ntoko noonnaahu, Akorintu akina yaaphwanela ohiya sookhovelela seiho saathipelen’ye mmurimani mwaya. Naamwiihiiha, awo hiiyaawoonne wi okhala Mukristu yaari echu yeeyo yaahihaalaaya owerya. Awo yaahiilipixerya vancipale wi evolowe mu ephiro yawuuraana yeeyo enakeriha wookumini woohimala. (Mat. 7:13, 14) Apwanne nyuwaano munnachuna opatisiwa, nyenya munawaniha wi mvoothe yookhovelela yoonanara naari meerelo ooheseya? Mwa yeeyo, muhirwe muhiye owaniha! Mumveke Yehova munepa waweela wi wookhaviheryeeni ovootha yaweeha. Nave owo onamookhaviheryaani ovilela ni saweeha sa opaka yeeyo eri yoonanara.

18. Ti mwawiihai yootakiherya ya Monika eneeraaya yookhaviheryeeni?

¹⁸ Monika o Xeyorxiya, wi apatisiwe, aahiilipixerya vancipale wi avoothe yookhovelela ya oloca masu oohiphwanelela, owiriyana ni woona ichu seiyo sihinamuhakalaliha Yehova. Owo ooloca: “Vaavaa kaaryaaka mwali, naari nivekelo naakikhavihenrye okhalano ikuru wi kitoroke mukhalelo aka. Yehova aanasuwela wi miyaano kaachuna opaka echu yeeyo yaari yaphaama, nave aahikikhaviherya ni okihoolela.” Monika aahipatisiwa arino iyaakha 16. Hanka nyuwaano, apwanne munnachuna ovootha meerelo oonanara wi mmurumeeleke Yehova mmukhalelo yoowo oneemereryeiye? Mutitelele omveka Yehova ikuru seiyo munachunaanyu wi mpake matorokelo. Yehova onnavaha munepa awe waweela ahikhalenle nrima.—Yoh. 3:34.

NROROMELO NANYU NNANWERYA OTHAAMIHA MIYAAKO

19. Tiheeni enahaala wookhaviheryaani othaamiha miyaako? (Moone tho eruku).

¹⁹ Muroromele ela: Moohipwacha sookwaculiha seiho munachunaanyu ovootha wi mpatisiwe, Yehova onnoosivelaani nave onnachuna wi nyuwaano mpake makupa mu emusi awe. Yesu aahiloca wa oohuserya awe akina: “Wakhala wi mookhalano nroromelo ntoko mwaammiso wa mustarta, muni munaamulocela mwaako ola: ‘Othaame oye vale,’ nave owo onamuthaama.” (Mat. 17:20) Yesu aalonce masu yaala wa achu yaawo yaamuchara mu iyaakha savakhaani, mwa yeeyo, waanachuneya wi awo yaaceererye nroromelo naya. Nyenya owo aahaaroromeliha wi waakhanle wi aakhalano nroromelo nawaakhwanela, Yehova aahaala waakhaviherya ovootha sookwaculiha itokweene opwaha mwaako. Nave Yehova anamookhaviheryaani nyuwaano weerano emohamoha!

20. Ti mwawiihai sootakiherya sakhalai ni samutano itharihiwe mu yoohuserya yeela sookhavihenryayaani?

²⁰ Wakhala wi moosuwela wi yookhala echu enawaakanyeryaani opatisiwa, muhilekele opaka yeeyo eri yoochuneya wi nvoothe yookwaculiha yeeyo. Sootakiherya sa Akristu akhalai ni a mmahiku ahu, sinanwerya woohakararyaani ni woolipihaani. Nnaweherya wi awo anamooceenyeryaani wiiveleela wa Yehova ni opatisiwa. Ela enahaala okhala yoolakelela anyu yaphaamaxa ya okumi anyu!