Apwanne Munnacicimiha Masu a Muluku?
“Mwakhelaka wa hiyo nsu na Muluku, himwakhenle ntoko nsu na atxhu, nto ntoko nsu na eparipari na Muluku.”—1 TESALÓNIKA 2:13.
MACIPO: 114, 113
MWAAHAALA WAAKHULA HAI?
Piipiliya onanihusiha hai ovareryela omuchu ahu?
Nnasuwela hai wi maseko [ekaaro] ya Yehova annaakuva mmahiku yaala ookuchula?
Muni mucharihe hai ohoolela wa marehereryo a Yehova?
1-3. Tiheeni akhweya yeeren’ye ni Evodya ni Sintiki? Makacamiho ntoko yaala eni enamalihiwa hai? (Moone eruku yoopacerya.)
NINNAMVAHA Piipiliya esisapo etokweene nthowa nawi noosuwela wi Liivuru a Muluku. Piipiliya ookhalano ikano sinahaala onikhaviherya ovootha makacamiho, nave onanwerya onicharusa wakhala wi noohesa. Vanonto, nnoona hai ikano sawe? Nkawuupuweleni athiyana eeli awoocihiwa a nsana noopacerya, Evodya ni Sintiki. Piipiliya onaloca wi awo yaahaakhulana, nyenya hananleela mathowa ene. Hankooni naanyiherye yeeyo yeeren’ye.
2 Akhweya Evodya aawompe anna ni arokora wi yalye owannyawe. Nyenya hanwompe Sintiki. Ohoolo waya, vaavaa Sintiki aawiiwaleiye akina elocaka wi yaatepa opuha, owo aatepa onyeenyeya. Owo akhweya aahuupuwela: ‘Nkineemererya wi Evodya hakiwompe! Kuupuwela wi naasinthamwene aphaama.’ Sintiki onne wi Evodya haamuchuna, ti nthowa nene ahinwompeiye. Voocharela Sintiki ahaawopa achu amohamoha wi yalye owannyawe nyenya hanwompe Evodya! Mukhalelo yoola, wawuukhula akina mmulokoni. Piipiliya onnooniherya wi Paulo aahaavaha ekano arokora ala nave aahaaceenyerya opaka murecele. Awo yanwiriyana nave yaatitelela omurumeela Yehova moohakalala.—Filipi 4:2, 3.
3 Mmilokoni sahu olelo, ikwaha ikina akhweya nnamukhalano nikacamiho ni munna naari murokora. Nyenya wakhala wi noochara ekano ya Mpiipiliyani, nnanwerya omaliha makacamiho ntoko yaala. Nave wakhala wi ninniiwelela yeeyo Piipiliya onaloceiye, ninnooniherya wi ninnavaha esisapo Masu a Muluku.—Salumu 27:11.
PIIPILIYA ONNANIHUSIHA OVARERYELA OMUCHU AHU
4, 5. Ekano taani Masu a Muluku ananivahaaya vooloca sa ovareryela omuchu ahu?
4 Tahi wookhweya ovareryela omuchu ahu mahiku oothene. Akhweya nnamukhala oohica naari oonyeenyeya wakhala wi muchu onruwana naari onikhalinhe moonanara, akhweya nthowa na sookhovelela sahu, elapo ahu naari ophwaneliwa wahu. Nave enamutepa wiicela wakhala wi muchu onruwanne naari onikhalinhe moonanara munna naari murokora ahu. Ekano taani nnaphwanyaahu mu Masu a Muluku eni enikhaviherye?
5 Yehova oosuwela tiheeni eneereya wakhala wi achu hanavareryela omuchu aya. Wakhala wi nri awuukhuwa naari oonyeenyeya, nnamuloca naari weera echu, yeeyo ohoolo waya nneeraahu nikhaleno ekeerelani. Mpiipiliyani, Yehova onnanihusiha ovarererya esara ahu nave onnanleela: “Ohakuveleke onyènyeya mmurimani mwà.” Nkuupuwelani makacamiho mancipale nnasepaahu vaavaa nniiwelelaahu ekano yeela ni ohaakuvela onyeenyeya! (Mwaalakhanye Eklesiyaste 7:9; Masiposipo 16:32.) Piipiliya tho onnanleela waakhurumuwela akina. Yesu ooloca wi wakhala wi hinnaakhurumuwela akina, Yehova hani anikhurumuwele. (Mateu 6:14, 15) Apwanne munnachuna okhala oopisa murima ni waakhurumuwela akina?
6. Tiheeni enahaala weereya wakhala wi hinnavareryela omuchu ahu?
6 Wakhala wi hinnavareryela omuchu ahu, nnamutitelela onyeenyeya ophiyerya opacerya omwiica muchu. Vakina vaya, nnahaala oweeriha akina mmulokoni woona mmukhalelo yoowo. Nave wakhala wi noheererya ovitha esara ni wiica wahu, voovira wa elukuluku akina anahaala osuwela meerelo ahu. Voocharela anna ni arokora ahu anahaala onrapelaka. (Masiposipo 26:24-26) Atokweene anahaala ompharihela Piipiliya wi yeererye onikhaviherya osepa esara ni wiica wi naakhurumuwele akina. (Onamukutxho 19:17, 18; Aroma 3:11-18) Wakhala wi awo aaheerano, apwanne nnahaala ochariha ohoolela wa Masu a Muluku?
YEHOVA ONNANIHOOLELA
7, 8. (a) Yehova onaahoolela hai achu awe? (b) Ohoolela taani okina nnaphwanyaahu Mpiipiliyani, nave ntakhara heeni nnaphwanelaahu wiiwelela?
7 Yehova onnaahoolela yaale ari mmarehereryo a makupa a veelaponi yavathi olelo, nave onnaahusiha. Mwawiihai? Owo oomuthanla Kristu wi akhale “muru wa ekresya [muloko],” nave Kristu oomuthanla “mulapeli oororomeleya ni awisuwela” wi aahusihe ni waahoolela achu a Muluku. (Éfeso 5:23; Mateu 24:45-47) Moolikana ni nikhuuru noolamulela na nsana noopacerya, mulapeli ola chiryene onnamvaha esisapo Piipiliya woona wi oosuwela wi Masu a Muluku. (Mwaalakhanye 1 Tesalónika 2:13.) Ohoolela taani okina nnaphwanyaahu Mpiipiliyani?
8 Piipiliya onnanceenyerya othukumana moohihiyererya. (Ahebri 10:24, 25) Owo onnanceenyerya oothene ahu ororomela mahusiheryo mamohamoha a Piipiliya. (1 Korinto 1:10) Piipiliya tho onnanleela otitelela ‘opacerya wasya omwene.’ (Mateu 6:33) Piipiliya onnanihusiha olaleerya empa ni empa, mmapuro awaaciwamo, ni voothevene nnaaphwanyaahuvo achu. (Mateu 28:19, 20; Saweriwa T’arummwa 5:42; 17:17; 20:20) Onnaakhaviherya atokweene okhapelela muloko okhala waweela. (1 Korinto 5:1-5, 13; 1 Timóteo 5:19-21) Nave onnanleela wi nnaphwanela weeliha mwiili ahu ni osepa muupuwelo ni saweera seiyo Yehova oniiceiye.—2 Korinto 7:1.
9. Taani Yesu omuthanlileiye wi aakhaviherye achu wiiwexexa Masu a Muluku?
9 Akina ananwerya wuupuwela wi haavo muchu onaphwanela waatharihela Piipiliya. Nyenya ovinyerya 1919, Yesu aapacerya ompharihela “mulapeli ororomeleya ni awisuwela” wi aakhaviherye achu a Muluku wiiwexexa yeeyo Piipiliya onahusiheiye ni ochariha yeeyo onaloceiye. Moorweela wa omwiiwelela Piipiliya, ninneeriha muloko okhala waweela, wa murecele ni wawiiwanana. Mwiikohe: ‘Apwanne kiri oororomeleya wa Yesu ni ochara ohoolela wa mulapeli oororomeleya?’
WAAKUVA WA MASEKO A YEHOVA
10. Liivuru a Ezekiyeli onathariha hai makupa a marehereryo a Yehova wirimu?
10 Moorweela wa Piipiliya, ninnahuserya wi akapuro a Yehova wirimu ari ooreheryeya tho. Ntoko yootakiherya, Ezekiyeli aamoona moolohani mwawe Yehova eecihaka maseko [ekaaro] yaawo yeeca mwawaakuva eyaaka mmakupa vyakala Yehova aachuneiye wi eyewo. (Ezekiyeli 1:4-28) Maseko aneemelela makupa a marehereryo a Muluku wirimu, yaawo anaakuvela ochariha ohoolela wawe. Eyo ennavolowela makupa a marehereryo awe veelaponi yavathi. Nkuupuwelani matorokelo mancipale apakiwe mmarehereryo a Muluku voovira wa iyaakha khumi muculi. Muupuwele wi Yehova taahoolela matorokelo yaala. Moohilekela Kristu ni ankeelo awe anahaala otolosa elapo yeela yoonanara. Haavo muchu onahaala omunyemula Yehova ni nsina nawe naari mano waakaaha mukhalelo awe wa olamulela!
11, 12. Tiheeni marehereryo a Yehova awenryaaya opaka mahiku yaala ookuchula?
11 Muthokororye yeeyo marehereryo a Yehova awenryaaya opaka mmahiku yaala ookuchula. Oteka. Masana a anna ni arokora annalapa moowetha wi erehererye nipuro nivyaani na elapo yoothene na Anamoona a Yehova o Warwick, Nova York, E.U.A. Awiivelela ancipale orukurerya elapo annateka Ipa sa Omwene ni ifiliyale. Awiiveleela yaala anahooleliwa ni Nikhuuru na Muteko wa Oteka wa Elapo Yoothene. Chiryene ninnaathamalela ancipale yaawo analapa moowetha wi epake muteko ntoko yoola! Nave akapuro a Yehova voothevene aryaayavo annavaha yeeyo aryaayano wi ekhaviherye olivela mapuro yaala. Yehova onnaareeliha achu awe ntakhara wiiyeviha ni ororomeleya anooniheryaaya.—Luka 21:1-4.
12 Mahusiheryo. Yehova onnasiveliwa waahusiha achu awe. (Isaiya 2:2, 3) Muupuwele ixikola soohiyanahiyana nryaahuno. Sookhalavo ixikola sincipale, Exikola ya Muteko Woopiyoneero, Exikola ya Alaleeryi a Omwene, Exikola ya Kiliyati, Exikola ya Mapetelita Avyaani, Exikola ya Ooweherya Ekulucu ni Asaaraya, Exikola ya Atokweene a Muloko, Exikola ya Orummwa wa Omwene, ni Exikola ya Nikhuuru na Efiliyale ni Asaaraya. Nave mu site ahu jw.org, nnanwerya omphwanya Piipiliya ni soolaleeryiwa ikina mu ilocelo sincipale. Esaiti yookhalano tho makupa avameekhaaya a amiravo ni imusi hiiha ntoko nikupa na ichu ivyaani. Mano, nyuwaano munnampharihela jw.org mmuteko woolaleerya ni mmalapelo eechoko anyu?
MUKHALE OOROROMELEYA WA YEHOVA NAVE MUKHAVIHERYE MAREHERERYO AWE
13. Murici taani achu a Yehova aryaayano?
13 Ekari etokweene opaka makupa a marehereryo a Yehova ni osuwela yeeyo owo onachuneiye wa hiyo! Woona wi noosuwela yeeyo enamuhakalaliha Muluku, nookhalano murici wa omwiiwelela ni opaka yeeyo eri yoophwanelela. Nave naamwi achu esiveliwaka opaka ichu soonanara, hiyaano nnaphwanela ‘othanya sonanara,’ hiiha ntoko Yehova. (Salumu 97:10) Nihirwe nikhale ntoko yaale anuupuwela wi “yonarara [ti] yaphama nave yaphaama [ti] yonanara.” (Isaiya 5:20) Nnachuna omvuwiha Yehova, mwawiihiiha nri oolakelela okhala aweela mmikhalelo soothene. (1 Korinto 6:9-11) Yeeyo Yehova onanleeleiye Mpiipiliyani ti yamphurelo ahu. Ninnamusivela nave nnachuna okhala oororomeleya wa yoowo. Ti nthowa nene nnacharaahu ohoolela wawe owaani, mmulokoni, omutekoni, oxikola naari mpuro vyakala nnakhalaahuwo. (Masiposipo 15:3) Muupuwele mikhalelo mikina nnaphwanelaahu okhala oororomeleya wa Muluku.
14. Asitiithi eni ekhale hai oororomeleya wa Yehova?
14 Mukhalelo wa waavyakiha anamwanaahu. Mpiipiliyani, Yehova onnaavaha asitiithi ohoolela mmukhalelo wa waavyakiha anamwane aya. Akristu anaphwanela okhalano ephoole wi ehivoloweliwe ni muupuwela ori wawunlaana mu elapo yeela. (Éfeso 2:2) Ntoko yootakiherya, mmapuro makina tiithi akhweya onnuupuwela: ‘Wenno muthiyana tonaahusiha anamwane.’ Nyenya Piipiliya mookwakwaleya onnaalamulela asitiithi waahusiha anamwane aya vooloca sa Yehova. (Éfeso 6:4) Asitiithi ni asimai yaawo anamusivela Yehova annachuna wi anamwane aya ekhaleno onthamwene ni Yehova, hiiha ntoko Samuwele aareiyeno vaavaa aareiye ponkwe.—1 Samuwele 3:19.
15. Nni nikhale hai oororomeleya wa Yehova vaavaa nnapakaahu soolakelela itokotoko?
15 Mukhalelo wa opaka soolakelela. Nihaakumve opaka soolakelela itokweene muukumini, nnachuna osuwela yeeyo Yehova onuupuweleiye, wi nikhale oororomeleya wa yoowo. Piipiliya vamoha ni marehereryo Yehova ananwerya onikhaviherya. Ntoko yootakiherya, asitiithi akina olelo yaawo ahin’ye elapo aya annalakelela omurumiha mwanaya okookela mu elapo aya wi akhaleke ni ahima aya. Mmukhalelo yoola, tiithi ni mai ananwerya otitelela olapa ni okhalano ikhorowa. Mweeparipari, ela yoolakelela ya muchu mukhateiye, nyenya mutheli onaphwanela wiikoha: ‘Tiheeni Yehova onahaaleiye wuupuwela ni yoolakelelaahu?’ (Mwaalakhanye Aroma 14:12.) Ti yaphaama opacerya wuupuwela yeeyo Piipiliya onaloceiye nihaakumve opaka yoolakelela yookhweleya vooloca sa emusi naari muteko ahu. Ninnachuna nikhaviheryo na Tiithi ahu nthowa nawi haavo onathanla ephiro yaphaama.—Yeremiya 10:23.
16. Yoothanla taani mai aapankeiye vaavaa amuyanreiye mwaana? Tiheeni yaamukhavihenrye opaka yoolakelela yoophwanelela?
16 Mutheli mmoha amanle othaamela elapo ekina, yaamuyara mwaana, nave yaalakelela omurumiha wi akhaleke ni asitiithaaya. Nyenya ehaakumve omurumiha, mwaariye aapacerya omuhuserya Piipiliya ni Anamoona Yehova. Owo aahuserya wi waari murici awe omuhusiha mwanawe vooloca sa Yehova. (Salumu 127:3; Masiposipo 22:6) Mai owo aavekela wa Yehova, hiiha ntoko Piipiliya onanleeleiye, nave amveka wi amukhaviherye opaka echu yoophwanelela. (Salumu 62:8, 9) Owo tho aamuleela nikacamiho nawe murokora aamuhusiha ni akina a mmulokoni. Naamwi ahima ni asinthamwene awe yaatitelela omuleela wi aaphwanela omurumiha mwaana wa asitiithaawe, owo aalakelela wi eyo hiyaari echu yoophwanelela opaka. Iyawe aahoona mukhalelo anna ni arokora yaamukhavihenryaaya mwaariye ni mwanaya. Owo aatikhiniheya ophiyerya opacerya omuhuserya Piipiliya ni ophiya mmithukumano ni emusi awe. Nkaanyiheryani ohakalala mai ola aareiyeno voosuwela wi Yehova aahaakhula mavekelo awe!
17. Vaavaa nnamuhusihaahu muchu Piipiliya, ohoolela taani nnaphwanelaahu ochariha?
17 Mukhalelo wa ochariha ohoolela. Wakhala wi nri oororomeleya wa Muluku, nnahaala ochariha ohoolela nnaakhelaahu orweela wa marehereryo awe. Ntoko yootakiherya, muthokororye yeeyo nnaphwanelaahu weera nimanle omuhusiha muchu liivuru Piipiliya Onahusiha Eheeni Chiryene? Nnaphwanela omaliha elukuluku vakhaani omakuchuwelo wa yoohuserya eri yoothene wi nimukhaviherye oohuserya osuwela phaama marehereryo a Yehova. Nipharihele exilema O que acontece em um Salão do Reino? ni eproxura Taani aneera Yookhwela ya Yehova Olelo? Nammaliha liivuru Piipiliya Onahusiha, nnaphwanela omukhaviherya oohuserya okhala “òlipa munroromeloni” moorweela wa omuhusiha liivuru ‘Mwikhapelele Mu Osivela Wa Muluku’ naamwi owo apatisiwe. (Kolosi 2:7) Apwanne, munnachariha ohoolela yoola onarweela wa marehereryo a Yehova?
18, 19. Mathowa taani nryaahuno a omuthamalela Yehova?
18 Nookhalano mathowa mancipale a omuthamalela Yehova! Echu emoha ti yawi, “mwa yowo nnakhalahuno ekumi ni ti mwa yowo nnetxahu ni nnakhalahu.” (Saweriwa T’arummwa 17:27, 28) Owo tho oonivaha Masu awe, Piipiliya. Moolikana ni Akristu o Tesalonika, ninnacicimiha yamahala yeela nthowa nawi muchaka ola onarweela wa yoowo.—1 Tesalónika 2:13.
19 Piipiliya onnanikhaviherya omwaacamela Yehova, nave owo tho onnanaacamela. (Tiyako 4:8) Nave ninnatepa ohakalala woona wi Tiithi ahu oniwopa opaka makupa a mmarehereryo awe! Ninnoona ntoko mulipa oomurepa Salumu yoowo olonce: “Mwàtxitximihe Apwiya ntakhara ikharari saya ti sohimala.” (Salumu 136:1) Mu iciciri soothene sa salumu ola, owo aahuuluulela masu awi “ikharari saya ti sohimala.” Chiryene, wakhala wi nri oororomeleya wa Yehova ni ochariha ohoolela onanivaheiye orweela wa marehereryo awe, onahaala onivaha ekumi yoohimala nave onamukhala oororomeleya wa hiyo okhala wookhala!
[Yooleeliherya va epaaxina 17]
‘Apwanne kiri oororomeleya wa Yesu ni ochara ohoolela wa mulapeli oororomeleya?’
[Yooleeliherya va epaaxina 19]
Asitiithi ni asimai yaawo anamusivela Yehova anachuna wi anamwane aya ekhaleno onthamwene ni Yehova