Judas
1 Nejua niJudas, niitlakeual Jesucristo niman Santiago yejua nokniuj. Nimechtlajkuilouilia nemejuamej akin toTajtsin niman toTaj yomechnots niman mechtlasojtla niman yomechtlajpix para uelis nemouikaskej iuan Jesucristo.
2 Niktlajtlani ika más mamechiknelikan, mamechyolseuikan niman mamechtlasojtlakan.
3 Noknitsitsinuan, ninokojtilijtoya nimechtlajkuilouilis itech kenijki techmakixtiskej. Pero onikitak ika más noneki nimechtlajkuilouilis para miyekpa nimechtlajtlanilis xmokojtilikan nochipa nenkipiyaskej nemotlaneltok. Yejon tlaneltokijli tlen san sejpa niman para nochipa okinmakakej akin tlapejpeniltin. 4 Nimechijlia yejuin pampa nemotsajlan* san ichtaka yokalakkej sekimej tlakamej. Tlajkuiloltin yokijtojkaj ika kintlajtlakolmakaskej yejuin tlakamej. Yejuamej xtetlakaitaj niman kinemiliaj ika uelis kichiuaskej tlen tepinajti* san pampa toTajtsin techiknelia maski xtechnamiki. Niman xmelajkanemij itech toTeko Jesucristo, akin san yejua tiiyaxkauan.*
5 Maski nemejuamej yekuajli nenkimatstokej, nikneki nimechilnamiktis ika ne Egipto, Jehová okimakixti se pueblo, pero satepan okinpopolo akin xotlaneltokakej. 6 Niman ángeles akin okikajkej intekiyo tlen kipiayaj ne ipan cielo, okinsasalo* ika cadenas tlen xueli kotonij. ToTajtsin okinkauj kampa kentla melak tlayouatok para kinyolkuitis ijkuak ajsis tonajli. 7 Noijki, Sodoma niman Gomorra niman on ciudades tlen xuejka onkatkaj melak oauilnenkej* niman okichijkej tlen xkuajli kileuiaya intlalnakayo. Yejuamej okintlajyouiltijkej ipan tlitl tlen xkeman seui, niman yejon techpaleuiya matikmatikan tlenon uelis topan nochiuas.
8 Maski ijkon, yejon tlakamej nochipa kinemilijtokej tlen xkuajli ipan intlamachilis, kijtlakojtokej intlalnakayo, xkintlakaitaj akin tlanauatiaj niman kijtouaj tlen xkuajli intech akin toTajtsin yokichiuj maueyixtokan. 9 Ijkuak arcángel Miguel onokualani iuan Diablo ipampa itlalnakayo Moisés, yejua xokinemili tla kinamikiya kitlajtlakolmakas. Arcángel Miguel onoyolyemanili niman xokitlajtlakolmakak. Yejua ijkin okijli Diablo: “Jehová mamitsajua”. 10 Pero yejon tlakamej xkuajli tlajtouaj itech tlen nion xkasikamatij. Yejuamej kentla yolkamej uan xtlanemiliaj, niman nochi tlen kichiuaj kimijtlakoua.
11 ¡Melak xkuajli tlen inpan nochiuas! Pampa yejuamej yokichijkej ijkon ken Caín. Kinekij makintlaxtlauilikan, yejua ika, yokichijkej ijkon ken Balaam, niman yokinpopolojkej pampa teixnamikij ika tlen kijtouaj ijkon ken Coré. 12 Yejuin tlakamej nemouan nemij ijkuak nenkichiuaj se iluitl imiuan tokniuan para nenkimititiskej ika nenkintlasojtlaj. Yejuamej yeskiaj kentla temej tlen iyantokej ijtik atl, kentla tlajpixkej akin xnomojtiaj san no yejuamej notlakualtiskej, kentla moxtin tlen ajakatl nochiuiyan kinuika pampa xkipiyaj atl, kentla on kojtin tlen xtlatlakiltiaj tlen okpa yomikkej niman yokinuiuitlakej* desde inneluayo. 13 Yejuamej kentla iakoxonajlo mar ijkuak melak noolinia. Tlen tepinajti kichiuaj yeskia kentla iaposonalyo yejon atl tlen koxoni. Yejuamej kentla on sitlalimej tlen san kanon yauej, yokinxelojkej para komonkauaskej kampa kentla melak tlayouatok niman nochipa ompa nemiskej.
14 Enoc, iuejkaixuiuj Adán,* noijki ijkin okijto itech yejuamej: “¡Xkitakan! Jehová ouajla imiuan melak miyekej iángeles 15 para nochimej kintlajtlakolmakas niman kiteititis ika akin xkuajkualtin melauak yokichijkej tlen xkuajli. ToTajtsin ijkon okichiuj pampa yejuamej tlajtlakolejkej niman yokichijkej tlen xkuajli, xokitlakaitakej niman yokijtojkej tlen xkuajli itech yejua”.
16 Yejuin tlakamej san nochipa kijtojtinemij tlen xkuajli inpan nochiua niman kichiuaj tlen kileuiya intlalnakayo. Ika tlen kijtouaj kiteititiaj ika noueyimatij niman kuajli kinnotsaj oksekimej san para makinpaleuikan.
17 Pero, nemejuamej noknitsitsinuan, xkilnamikikan tlen yeuejkaui okijtojkej iapóstoles toTeko Jesucristo. 18 Yejuamej miyekpa ijkin kijtouayaj: “Ipan itlamiyan tonaltin nemiskej akin san tepijpinajtiskej niman kichiuaskej tlen xkuajli kileuiyaj”. 19 Yejuamej akin texexelouaj, yejuin tlakamej kichiuaj kentla yolkamej, xkipiyaj iespíritu santo toTajtsin. 20 Pero, nemejuamej noknitsitsinuan, xkauilikan ika nochi tlen chipauak itech tlen nentlaneltokaj mamechpaleui xmelajkanemikan. Niman xmokauilikan ika espíritu santo mamechyekana ipan nemooraciones 21 para toTajtsin nochipa mechtlasojtlas. Ijkon xchijtokan aman ika nenkichiatokej ika mamechikneli toTeko Jesucristo niman mamechmaka nemilistli tlen xkeman tlami. 22 Noijki, ok* xkimiknelijtokan akin xmás tlaneltokaj, 23 xkinmakixtikan itech tlitl. Xkimiknelikan oksekimej, pero xmotlajpiyakan. Yejuamej xok chipauak intlaken pampa kichiuaj tlen kileuiya intlalnakayo. Yejua ika, ijkuak nenkimikneliskej, xnoneki nenkinisiuiskej* intlakenuan tlen xok chipajkej.
24 ToTajtsin akin ueyixtika, uelis mechpaleuis maka xchiuakan tlajtlakojli, uelis kichiuas nochipa xmotelketstokan,* maka xpiyakan tlajtlakojli niman kichiuas ixpan xyolpakikan. 25 Akin san yejua toTajtsin, yotechmakixti ipampa* toTeko Jesucristo. San toTajtsin kinamiki makiueyiteneuakan, maueyixto, makipiya poder niman nochipa matlanauati ijkon ken desde yeuejkaui, aman niman para nochipa. Amén.