1 Corintios
6 Tla se de nemejuamej yonokualani iuan yakaj, ¿tleka nenyauej kampa tetlajtlakolmakaj akin kipiyaj xkuajli inyojlo niman xnenyauej kampa akin kitekichiuiliaj toTajtsin para mamechtlajtlakolmakakan? 2 ¿Xnenkimatij ika akin kitekichiuiliaj toTajtsin kitlajtlakolmakaskej yejuin mundo? Niman, tla nemejuamej nenkitlajtlakolmakaskej yejuin mundo, ¿xueli nentetlajtlakolmakaj niman nenkiyektlaliaj itlaj tlen xmás ueyi kijtosneki? 3 ¿Xnenkimatij ika tikintlajtlakolmakaskej ángeles? Kuakon, ¿tleka xtikyektlaliaj tlen aman panoua? 4 Yejua ika, tla noneki nenkitlajtlakolmakaskej tlen aman panoua, ¿tleka nenkintlapejpeniaj ken jueces yejon tlakamej akin ipan tlanechikojli xkintlakaitaj? 5 Nimechijlia yejuin para xpinauikan. ¿Xnemi nion se tlakatl akin tlamachilise akin uelis kintlajtlakolmakas tokniuan ijkuak kipiyaj se tlauejli? 6 ¡Pero, se tokniuj kuika okse tokniuj imixpan jueces akin xtlaneltokaj!
7 San nemopinajtiaj ijkuak nenkonteijliaj nemotlaueluan imixpan jueces. ¿Xmás kuajli yeskia tla nenkimokauiliaj mamechchiuilikan tlen xkuajli? ¿Xmás kuajli tla nenkimokauiliaj mamechkajkayauakan? 8 Pero, nemejuamej akin nenkitechiuiliaj tlen xkuajli niman nentekajkayauaj, ¡niman nemokniuan akin ijkon nenkinchiuiliaj!
9 ¿Noso xnenkimatij ika akin xkipiyaj kuajli inyojlo xkiseliskej iGobierno toTajtsin? Maka xmokajkayauakan. Akin auilnemij,* akin kinueyichiuaj imágenes, akin notekaj iuan xiixnamik, tlakamej akin kinokauiliaj ika tlakamej iuan manotekakan, tlakamej akin kitejtemouaj auilnemiskej imiuan tlakamej, 10 akin tlachtekij, akin miyek kinoyaxkatisnekij,* borrachos, akin teuijuikaltiaj* niman akin tekajkayauaj xkiseliskej iGobierno toTajtsin. 11 Yejon tlen nemejuamej kachtopa nenkichiuayaj. Pero, ipampa itoka toTeko Jesucristo niman ika iespíritu santo toTajtsin, nemejuamej yomechchipajkej niman yomechselijkej ken akin kipiyaj kuajli inyojlo.
12 Nochi uelis nikchiuas, pero xnochi uelis nechpaleuis. Nochi uelis nikchiuas, pero xnijkauilis yejon manechyekana. 13 Comida onochijchiuj para tojti* niman tojti onochijchiuj para comida, pero toTajtsin nochi yejon kipopolos. Totlalnakayo xokichijchijkej para matiauilnemikan,* okichijchijkej para matiktekichiuilikan toTeko, niman toTeko kitlajpiya totlalnakayo. 14 Pero toTajtsin okiyoliti* toTeko, niman noijki techkuiteuas ika ipoder intech akin yomikkej.
15 ¿Xnenkimatij ika nemotlalnakayo yonochiuj san se iuan itlalnakayo Cristo? Kuakon, ¿noneki nikixtilis tlen kipiya itlalnakayo Cristo para niksentlalis iuan itlalnakayo se siuaauilnenki? ¡Ka! 16 ¿Xnenkimatij ika tla yakaj noteka iuan se siuaauilnenki nochiua san se tlalnakayotl iuan yejua? Pampa yejua kijtoua: “On omemej nochiuaskej san se”. 17 Pero akin yenemi iuan toTeko, tlanemilia ijkon ken yejua. 18 ¡Xtlalkauikan auilnemilistli!* Akin kichiua okseki tlajtlakojli xkijtlakoua itlalnakayo, pero akin auilnemi kijtlakoua itlalnakayo. 19 ¿Xnenkimatij ika nemotlalnakayo yeskia kentla itemplo espíritu santo tlen nemopan onka niman tlen toTajtsin mechmaka? Noijki, nemotlalnakayo xnemoyaxka. 20 Pampa toTajtsin yotlatlaxtlauj para omechkouj. Yejua ika, xtekitiltikan* nemotlalnakayo para nenkiueyiteneuaskej toTajtsin.